KISHINTE KYA KWIFUNDA 7
LWIMBO 15 Tendela Mwana Umbedi wa Yehova!
Lelo Umwenanga Namani mu Lulekelo lwa Yehova?
“Kodi ko kudi lulekelo lwa bine.”—ÑIM. 130:4.
PEMANINE KISHINTE
Kubandaula muneneno wa kyelekejo ukunka mutyima udi mu Bible, kusa kwitukwasha tuningijije’ko mutyima wetu wa kufwija’ko pa lulekelo lwa bine lwa Yehova ku umo ne umo motudi.
1. Mwanda waka divule lulekelo lwa bantu lwikalanga lukomo kwivwanija?
“NAKULEKELA.” Bine bino binenwa bitūkijanga mutyima, nakampata shi tuyukile amba twanenene nansha kulonga bintu byasanshije muntu kampanda! Ino le uno musemwa “nakulekela” ushintulula bika? Le ko kunena’mba muntu owasanshije ukulombolanga’mba kipwano kyenu kibajoka monka mokyadi kikadile mafuku kunyuma? Nansha ukulombolanga’tu amba kakisakepo monka kwisambila pa mwine mwanda’wa? Bine lulekelo lwa bantu lubwanya kwikala lukomo kwivwanija.
2. Le lulekelo lwa Yehova i lulombolwe namani mu Bisonekwa? (Tala ne kunshi kwa dyani.)
2 Muswelo witulekelanga Yehova batwe bantu ba kubulwa kubwaninina i mwishile bininge na muswelo otwilekelanga umo ku mukwabo. Lulekelo lwa Yehova i lwa pa bula. Kaimba wa mitōto wānenene padi Yehova amba: “Kodi ko kudi lulekelo lwa bine, amba bakwivwane nzuba.” a (Ñim. 130:4) Bine lulekelo lwa Yehova i “lulekelo lwa bine.” Aye kete ye witulombolanga mwine mushintulwila lulekelo lwa bine. Mu bisonekwa bimo bya Kihebelu, balembi ba Bible bālombwele muswelo ulekelanga Yehova na kwingidija kishima kyokebāingidijepo nansha dimo pa muswelo ulekelanga bantu.
3. Le lulekelo lwa Yehova i lwishile namani na lwetu? (Isaya 55:6, 7)
3 Shi Yehova walekela muntu, bubi bwandi bubulwanga. Kipwano kyadi kyonekele kijokejibwanga monka mokyadi kikadile. Bine tufwijanga’ko Yehova pa kwitulekela na mutyima umo kyaba ne kyaba.—Tanga Isaya 55:6, 7.
4. Le Yehova i mwitukwashe namani twivwanije mwikadile lulekelo lwa bine?
4 Shi lulekelo lwa Yehova i lwishile na lwetu, le i muswelo’ka otubwanya kwivwanija mushintulwila lulekelo lwa bine batwe bantu bampikwa kubwaninina? Yehova i mwingidije muneneno wa kyelekejo mwanda wa kwitukwasha twivwanije mwikadile lulekelo lwandi. Mu kino kishinte, tusa kubandaula’mo muneneno kampanda. Uno muneneno usa kwitulombola’mba kitatyi kyotwisāsa, Yehova utalulanga bubi bwetu ne kwaluja kipwano kyotwadi tupwene nandi, kine kyaonekele pa mwanda wa bubi. Kitatyi kyotubandaula uno muneneno wa kyelekejo, tusa kuningijija’ko mutyima wetu wa kufwija’ko pa kanye ka Tata wetu mwine witulekelanga mu miswelo mivule.
YEHOVA UTALULANGA BUBI
5. Le i bika bilongekanga shi Yehova wetulekela bubi?
5 Divule mu Bible, bubi budingakanibwanga na biselwa bilēma. Mulopwe Davida wēsambīle pa bubi bwandi amba: “Bilubo byami bibampite mutwe; pamo bwa kiselwa kilēma, bibampityila bungi pa kusela.” (Ñim. 38:4) Inoko Yehova ulekelanga bubi bwa banonga-bibi besāsa. (Ñim. 25:18; 32:5) Kishima kya Kihebelu kyalamwinwe bu “kulekela” mu ano mavese, kishintulula “kutekuna” nansha “kusela.” Tubwanya kumona Yehova pamo bwa muntu umo mukomo utekuna mu muswelo wa kyelekejo kiselwa kya bubi pa bipuji byetu ne kwikisela.
“Waundekela” (Ñim. 32:5)
6. Le i kwepi kwelanga Yehova bubi bwetu?
6 Muneneno mukwabo wa kyelekejo ulombola kwine kwelanga Yehova bubi bwetu. Ñimbo ya Mitōto 103:12 itusapwila’mba: “Monka mwikadile kutambanga dyuba kulampe na kuponanga dyuba, mo monka mwatūdilanga kujilula kwetu kulampe netu.” Kutunduka i kulampe bininge na kushika. Bino bifuko bibidi kebibwanyapo kwitana nansha dimo. Mu muneneno mukwabo, Yehova uselanga bubi bwetu ne kwibwela kulampe bininge kutabuka muswelo otwadi tulanga. Uno shao o muswelo usenga ulombola mwitulekelanga Yehova bya binebine!
“Monka mwikadile kutambanga dyuba kulampe na kuponanga dyuba” (Ñim. 103:12)
7. Le Bible ulombola namani biloñanga Yehova na bubi bwetu? (Mika 7:18, 19)
7 Nansha Yehova byaselelanga bubi bwetu kulampe mu muswelo wa kyelekejo, lelo wendelelanga kwibusela? Aa. Mulopwe Hezekia wālembele pangala pa Yehova amba: “Ubaela bubi bwami bonso kunyuma kobe.” Nansha na munenena kunshi kwa dyani amba, “ubatalula bubi bonso ku meso obe.” (Isa. 38:9, 17; kunshi kwa dyani.) Uno muneneno wa kyelekejo ulombola’mba, Yehova uselanga bubi bwa boba besāsa ne kwibwela kulampe kwakabwanyapo kwibumona monka. Kadi bino binenwa bibwanya kwalamunwa’mba: “Ubalonga [bubi bwami] enka na abo kebwalongekelepo.” Kadi Bible ukomeneja uno mulangwe na muneneno mukwabo wa kyelekejo utanwa mu Mika 7:18, 19. (Tanga.) Yehova unena mu ano mavese amba welanga bubi bwetu mu mushike wa dijiba. Mu kitatyi kya kala, muntu kādipo ubwanya kusokola kintu kyelelwe mu mushike wa dijiba.
“Ubaela bubi bwami bonso kunyuma kobe” (Isa. 38:17)
“Abe ukela bubi bwabo bonso mu mushike wa dijiba” (Mika 7:19)
8. Le i bika byotwefunda kufikija pano?
8 Tubefunde kupityila ku muneneno wa kyelekejo amba, kitatyi kitulekela Yehova witutalulanga kiselwa kya bubi bwetu. Bine, monka mwānenene’kyo Davida, “ba nsangaji i boba bobalekēle kujilula kwabo ne bobapūtyila bubi bwabo; wa nsangaji i yewa muntu wa bubi kebukabalwapo nansha dimo na Yehova.” (Loma 4:7, 8) Luno shalo lo lulekelo lwa bine!
YEHOVA UBULANGA BUBI
9. Le i muneneno’ka wa kyelekejo wingidije Yehova mwanda wa kulombola mubaile lulekelo lwandi?
9 Yehova i mwingidije muneneno mukwabo wa kyelekejo, mwanda wa kwitulombola muswelo wabulanga bubi bwa boba besāsa kupityila ku kitapwa kya kinkūlwa. Yehova i mulombole mu muneneno wa kyelekejo pamo bwa aye oija ne utōkeja buno bubi. Kino kilengejanga yewa ulongele bubi atōkejibwe. (Ñim. 51:7; Isa. 4:4; Yel. 33:8) Yehova aye mwine ulombola bilupukanga’ko amba: “Nansha shi bubi bwenu budi pamo bwa bityila pyā, bukatōkejibwa pamo bwa mashika mekwate; nansha shi butyila pamo bwa kisandi kityididila pyū, bukekala pamo bwa myoya.” (Isa. 1:18) Bikalanga bikomo kutalula makeme atyila nansha atyididila pyū ku kisandi. Inoko Yehova witukulupija kupityila ku uno muneneno wa kyelekejo amba, bubi bwetu bubwanya kutōkejibwa tō kebukimwekapo monka.
“Nansha shi bubi bwenu budi pamo bwa bityila pyā, bukatōkejibwa pamo bwa mashika mekwate” (Isa. 1:18)
10. Le i muneneno’ka mukwabo wa kyelekejo wingidije Yehova mwanda wa kulombola muneñenine lulekelo lwandi?
10 Monka mokyalombwedilwe mu kishinte kibadikile, bubi budingakanibwanga ne na “mapu.” (Mat. 6:12; Luka 11:4) Nanshi kitatyi kyotulonga bubi ku meso a Yehova, mapu etu endanga avudila’ko. Tudi na mapu andi makatampe! Inoko kitatyi kitulekelanga Yehova, bikalanga pamo bwa aye utalula mapu otumwapwile. Kalombengapo mfutwa ya bubi bwalekēle. Kino shakyo kyo kyelekejo kitulombola muswelo otutūkijibwanga mutyima kitatyi kitulekela Yehova!
“Witulekele mapu etu” (Mat. 6:12)
11. Le panena Bible amba bubi bwetu ‘bujimankanibwanga’ bishintulula bika? (Bilongwa 3:19)
11 Yehova katalulangapo’tu mapu etu nansha bubi kete; wiajimankanyanga. (Tanga Bilongwa 3:19.) Kitatyi kitalulwa mapu, tubwanya kumona mu ñeni kiyukeno kikatampe kya kutalula mapu (X) kilembwe pa kibalwa, nansha nankyo muntu ubwanya kwendelela kumona kibalwa kya lupeto kidi munshi mwa kiyukeno kya kutalula mapu (X). Ino kujimankanya kintu i kwishile. Pa kwivwanija uno muneneno wa kyelekejo, tufwaninwe kuvuluka’mba bwīno bwādi bwingidijibwa mu kitatyi kya kala bwādi bupēla kubula. Muntu wādi ubwanya kwingidija kya kubula nakyo kyumu, wābula bilembelwe. Nanshi kitatyi kyādi ‘kijimankanibwa’ mapu, ādi abulwa lonso. Bintu byādi bilembelwe dibajinji kebyādipo bibwanya kumonwa na meso. Byāikala pamo bwa ako kekwadipo mapu. Bine bikunka’po mutyima kuyuka’mba Yehova katalulangapo’tu mapu etu kete, ino wiajimankanyanga lonso!—Ñim. 51:9.
“Mwanda wa bubi bwenu bujimankanibwe” (Bil. 3:19)
12. Le i bika byotwifunda ku muneneno wa kyelekejo wa dikumbi difīta fututu?
12 Yehova i mwingidije muneneno mukwabo wa kyelekejo mwanda wa kulombola muswelo wajimankanyanga bubi. Unena’mba: “Nkabula kujilula kobe pamo’nka bwa na dikumbi ne bubi bobe pamo’nka bwa na dikumbi difīta fututu.” (Isa. 44:22) Kitatyi kilekela Yehova, wikalanga pamo bwa aye wingidija dikumbi difīta fututu mwanda wa kufya kujilula kwetu amba kuleke kumonwa na meso.
“Nkabula kujilula kobe pamo’nka bwa na dikumbi” (Isa. 44:22)
13. Le twiivwananga namani kitatyi kitulekela Yehova bubi?
13 Le kino kitufundija bika? Kitufundija’mba shi Yehova wetulekela bubi, ketufwaninwepo kwimona bwa batwe badi na dikeme dya bubi’bwa mu būmi bwetu bonso. Kupityila ku mashi a Yesu Kidishitu, twi balekelwe mapu etu lonso. Enka ne bubi bwetu kebudi pamo bwa abo kebwalongelwepo. Uno o muswelo witulekelanga Yehova bya binebine kitatyi kyotwisāsa bubi bwetu.
YEHOVA WALUJANGA KIPWANO KIYAMPE
Lulekelo lwa Tata wetu wa mūlu lwitulengejanga twikale nandi mu kipwano kiyampe (Tala musango 14)
14. Mwanda waka tubwanya kukulupila’mba Yehova uketulekela bya binebine? (Tala ne bifwatulo.)
14 Lulekelo lwa bine lwa Yehova lwitulengejanga twikale nandi mu kipwano kiyampe. Lwitulengejanga tuleke kulēmenenwa na milangwe ya kwitopeka. Ketufwaninwepo kukwatwa moyo amba Yehova witulamīne kīji, ne amba ukimbanga muswelo wa kwitupa mfuto. Kakalongapo kino nansha dimo. Mwanda waka tubwanya kukulupila Yehova kitatyi kyanena’mba wetulekela? Mupolofeto Yelemia wāpitulukile mu binenwa bya Yehova paānenene amba: “Nkebalekela kilubo kyabo, kadi nkikavulukapo monka bubi bwabo.” (Yel. 31:34) Polo nandi wāpitulukile mu bino binenwa paānenene amba: “Nkikavulukapo monka bubi bwabo.” (Bah. 8:12) Ino le kino kishintulula bika?
“Nkikavulukapo monka bubi bwabo” (Yel. 31:34)
15. Le Yehova kavulukangapo bubi bwetu mu buluji’ka?
15 Mu Bible, kishima “kuvuluka” kekifunkilangapo nyeke pa muntu uvuluka kintu kampanda, nansha ulangulukila’po. Ino kibwanya kufunkila ne pa muntu ulonga kintu kampanda. Nkuma-bibi wāyeyekelwe ku mutyi pamo na Yesu wālombele amba: “A Yesu, umvuluka’ko posa kutwela mu Bulopwe bobe.” (Luka 23:42, 43) Kādipo’tu ulomba Yesu alangulukile pādi mu kine kitatyi’kya. Kilondololwa kya Yesu kyālombwele amba ukalonga’po kintu mwanda wa kusangula uno nkuma-bibi. Nanshi panena Yehova amba kakavulukapo bubi bwetu, ushintulula’mba kakalongapo kintu kya kwitusanshija. Kaketupepo mfuto mu mafuku a kumeso pangala pa bubi bwaetulekele.
16. Le Bible udingakanya namani bwanapabo botwikalanga nabo kitatyi kitulekela Yehova bya binebine?
16 Bible wingidija muneneno mukwabo wa kyelekejo mwanda wa kwitukwasha twivwanije bwanapabo butamba ku lulekelo lwa bine. Pa mwanda wa kibutwila kyetu ne milangwe yetu ya bubi, twi badingakanibwe na “bapika ba bubi.” Inoko kitatyi kitulekela Yehova, twikalanga pamo bwa bapika ‘bakūlwe ku bubi.’ (Loma 6:17, 18; Kus. 1:5) Bine, kuyuka’mba Yehova i mwitulekele, kwitulengejanga tusangale pamo bwa umpika wakutululwa.
‘Mwakūdilwe ku bubi’ (Loma 6:18)
17. Le lulekelo luletanga bundapi namani? (Isaya 53:5)
17 Tanga Isaya 53:5. Muneneno wa mfulo wa kyelekejo oketwisambila’po, witudingakanya na bantu babela misongo itwala ku lufu. Yehova i mwitundape mu muswelo wa kyelekejo kupityila ku kinkūlwa kya wandi Mwana. (1 Pe. 2:24) Kinkūlwa kitukwashanga tulongolole kipwano kyetu na Yehova kine kyaonenwe na misongo ya ku mushipiditu. Monka musangelanga bininge muntu wakoma ku misongo mikatampe, netu ye motusangelanga kitatyi kyotukoma ku mushipiditu ne kwitabijibwa monka na Yehova kupityila ku lulekelo lwandi.
“Twaundapilwe pa mwanda wa bilonda byandi” (Isa. 53:5)
BYOTUMWENANGA MU LULEKELO LWA YEHOVA
18. I bika byotwefunda mu kubandaula muneneno palapala wa kyelekejo udi mu Bible wisambila pa lulekelo lwa Yehova? (Tala ne kapango “Muswelo Witulekelanga Yehova.”)
18 I bika byotwefunda mu kubandaula muneneno palapala wa kyelekejo udi mu Bible wisambila pa lulekelo lwa Yehova? Tubefunde amba shi Yehova wetulekela, witulekelanga lonso pampikwa kuvuluka monka bubi’bwa. Kino kitulengejanga twikale mu kipwano kiyampe na Tata wetu wa mūlu. Kadi tuvulukanga’mba lulekelo lwa bine i kyabuntu. Yehova ulekelanga bantu ba bubi pa mwanda wa buswe bwandi ne kanye kandi ka ku buntu bitupu. Ketulekelangapo mwanda tufwaninwe lulekelo lwandi.—Loma 3:24.
19. (a) Le i bika byotufwaninwe kufwijija’ko? (Bene Loma 4:8) (b) I bika byotukesambila’po mu kishinte kilonda’ko?
19 Tanga Bene Loma 4:8. Batwe bonso tufwijanga’ko Yehova mwanda i Leza wa “lulekelo lwa bine”! (Ñim. 130:4) Inoko pa kusaka’mba Yehova etulekele, kudi kintu kya mvubu kyotufwaninwe kulonga. Yesu wānenene amba: “Shi kemulekelapo bantu bilubo byabo, ne Shenu nandi kakemulekelapo bilubo byenu.” (Mat. 6:14, 15) Nanshi tufwaninwe kwiula Yehova na kwikala na lulekelo. Ino le i muswelo’ka otubwanya kumwiula? Kishinte kilonda’ko kiketulombola bya kulonga.
LWIMBO 46 Wafwa’ko Yehova
a Bilembwa bibajinjibajinji bya Kihebelu, i bingidije kishima kyalamwinwe bu “lulekelo,” kine kilombola’mba luno i lulekelo lumo kete lwa bine lwishidile na miswelo mikwabo ya lulekelo. Malamuni mavule a Bible kealombwelepo kuno kwishila kwa mvubu, inoko Bisonekwa Bijila—Bwalamuni bwa Ntanda Mipya i bulombole kuno kwishila, kwine kwibulengeje bwikale bwa pa bula mu muswelo walamwinwe’mo Ñimbo ya Mitōto 130:4.
