Mutumibwa Polo wāyukile amba lunsafwakanwa lwa Satana luletanga kyaka. Inoko ke bene Kidishitu bonsopo bādi bayukile kino kyaka. Kimfwa, bene Kidishitu bamo mu Kodinda bādi balanga’mba kebabwanyapo kuponejibwa na Satana mwanda bādi bamona’mba i bemanije mu bubine. (1 Kodinda 10:12) O mwanda Polo wēbadyumwine amba: “Nkwetwe moyo amba mu muswelo kampanda, monka mwāongwedilwe Eva na nyoka na budyumuku bwandi, ñeni yenu yakoneka isonsoloke ku bubinebine ne ku butōki, bintu bifwaninwe Kidishitu.”​—2 Kodinda 11:3.

Binenwa bya Polo bilombola mvubu ya kuleka kwikulupila bipitepite. Pa kunekenya bulwi bolwa na lunsafwakanwa lwa Satana, ufwaninwe bidi kuyuka kyaka kyoludi nakyo ne kuyuka mwa kwikingila’ko.

Mu uno mwanda, lunsafwakanwa i myanda ya bubela nansha ya bongojani, ingidijabwanga mwanda wa kudimba bantu nansha kwibaloba tudi mu kanwa. Mungya dibuku Propaganda and Persuasion, lunsafwakanwa i binenwa “bibi, bisansa, ne bya bukondame.” Kadi bantu belushintululanga bu “bubela, kunyengakanya myanda, buvubavuba, kutādilañana, [ne] kuvidijañana.”

Lunsafwakanwa luletanga kyaka mwanda lubwanya kutādila bityebitye mulangilo wetu, batwe papo kuyuka mpika. Tubwanya kwiludingakanya na sumu ya mu luvula yoketubwanyapo kumona nansha kwivwana luvumba. Vance Packard, mwifundi mwendelele wa ngikadila ya bantu wanenene amba  lunsafwakanwa lutādilanga muswelo otulonga bintu “batwe papo kuyuka mpika.” Mwifundi mwendelele mukwabo wanenene amba lunsafwakanwa i lulengeje bantu bekale na mwikadilo uleta bininge kyaka, wampikwa kulangila bakwabo, kadi lufikijanga bantu ku kwiyoa (kwine kukubija bantu ba nkoba yonso), ku mavita, ne ku kwipangapanga pa mwanda wa lukoba nansha kipwilo.​—Easily Led​—A History of Propaganda.

Shi bantu babwanya kwituvidija na lwabo lunsafwakanwa, le Satana ke pepi? Wēfundile mwikadila wa bantu tamba pobāpangilwe. Kadi, pano uludikanga “ntanda yonsololo,” nanshi ubwanya kwingidija kifuko kyo-kyonso kya pano pa ntanda mwanda wa kusambakanya bubela bwandi. (1 Yoano 5:19; Yoano 8:44) Satana “i musabe meso a ñeni” ya bantu bavule na lunsafwakanwa lwandi lwine lwaongola nalo “ntanda yonso ikelwe na bantu.” (2 Kodinda 4:4; Kusokwelwa 12:9) Le ubwanya kukomena namani lunsafwakanwa lwandi?

Yesu witufundija’mba kudi muswelo upēla wa kulwa na lunsafwakanwa, amba: “Mukayuka bubine, bubine nabo bukemupa bwanapabo.” (Yoano 8:31, 32) Mu divita, sola ufwaninwe kuyuka kokwa kwabwanya kutana myanda ya bine, mwanda walwana nandi ubwanwa kusambakanya bubela mwanda wa kumudimbakanya. Ino le i kwepi kokatana myanda ya bine? Yehova i mwitulombole’yo mu Bible, Kinenwa kyandi. Ubwanya kutana’mo myanda yonso yosakilwa pa kulwa na lunsafwakanwa lwa Satana.​—2 Temote 3:16, 17.

Na bubine, Satana uyukile kino. O mwanda wingidijanga ntanda yaludika mwanda wa kwitulabika ne kwituzozeja tuleke kutanga Bible ne kwifunda’ye. Ketwakyongolwai na “bilongwa bya bukosoke bya Dyabola”! (Efisesa 6:11) Kwivwanija’tu’nka bubine bwa kyalwilo kekubwenepo. Tufwaninwe kulonga bukomo bwa kuvudija buyuki bwa bubine. (Efisesa 3:18) Mulembi umo witwa bu Noam Chomsky wanenene amba, “I kutupu muntu nanshsa umo ubwanya kukupungulwila bubine mu bongolo bobe. Ino i kintu kyofwaninwe kwisokwela abe mwine.” Nanshi “wisokwele’bo” na kubandaula “senene Bisonekwa difuku ne difuku.”​—Bilongwa 17:11.

Satana kakusakilangapo ulangulukile senene pa bubine bowifunda ne kwibwivwanija  biyampe. Mwanda waka? Mwanda lunsafwakanwa lumweka bu “manwa mafike’po” shi bantu i “batyumukwe mutyima bininge.” (Media and Society in the Twentieth Century) Kokakulupila’tu kintu kyo-kyonso kyoivwana pampikwa kulangulukila’po na mushike. (Nkindi 14:15) Leza i mukupe “kusansanya” ne “malango,” o mwanda wibingidije amba ukomeje lwitabijo lobe.​—Nkindi 2:10-15; Loma 12:1, 2.

Shi basola abatādilwa na lunsafwakanwa bekalanga bevwana moyo kebatyina kulwa. Lunsafwakanwa lubwanya’nka ne kwibalengeja banze kwilwa abo bene na bene ne kwiketakanya mu bisumpi. Mudyavita umo wa mu Alemanye wanenene amba lunsafwakanwa bo bubinga bumo bwaponeje Alemanye mu Divita I dya Ntanda. Wanenene amba bantu batādilwe na lunsafwakanwa, lwebavutakanya’nka ne ñeni. Satana wingidijanga manwa a uno muswelo mwanda wa kuvutakanya bumo bwa bene Kidishitu dyalelo. Kimfwa, utompanga kulengeja kwisusa umbukata mwa banabetu. Kadi ukimbanga kwibatambija mu bulongolodi bwa Yehova na kwibalengeja balange amba ke bolokepo nansha amba buloñanga bintu bibi.

Kokyongolwa! Londa madingi adi mu Kinenwa kya Leza ne kulama bumo na banabenu. Kimfwa, Bible witukankamika twendelele “kwilekela na mutyima umo” ne kupwija bukidibukidi bonka kwisusa ko-konso. (Kolose 3:13, 14; Mateo 5:23, 24) Kadi witudyumuna tuleke kwikalañanya na kipwilo. (Nkindi 18:1) Ikala mwiteakanye mwa kukomena lunsafwakanwa lwa Satana. Wiipangule’mba, ‘Paundubile banabetu musunsa wa mfulo, le nalongele bintu mu muswelo usangaja Leza’ni nansha Satana?’​—Ngalatea 5:16-26; Efisesa 2:2, 3.

Shi sola kakōkelepo mwendeji wandi, kalungapo senene. O mwanda balwana bengidijanga lunsafwakanwa mwanda wa kulengeja basola bajimije kikulupiji kyabo ne kyobakulupile bendeji babo. Shi bendeji a balonga kilubo, balwana baloñanga bukomo bwa kwikizambalaja ne kunena’mba: “Kemwakebakulupilai!” kadi “Kemwakibalekai bemufikije ku musala!” Ye mulongelanga ne Satana. Utompanga kukujimijija kikulupiji mu boba  bengidijibwa na Yehova mwanda wa kuludika bantu bandi.

Le ukekinga namani? Sumininwa kushala nyeke mu bulongolodi bwa Yehova. Kōkela nyeke bana-balume batangidile bantu ba Leza ne kwibakwatakanya, nansha byobadi bampikwa kubwaninina. (1 Tesalonika 5:12, 13) Batupondo ne bañongojani bakwabo babwanya kulwa na bulongolodi na kwibunenena bibi. (Tetusa 1:10) Nansha shi byobanena’bya bimweka bu bya bine, ino abe kokatenkanibwa “bukidi bonka mu milangwe” yobe. (2 Tesalonika 2:2) Londa madingi a Polo aāpele Temote a amba: “Endelela mu bintu byowafundile,” kadi vuluka “bene bakufundije’byo.” (2 Temote 3:14, 15) Langulukila pa bubinga bonso bwa kukulupidila umpika mukōkele mwine wingidijibwa na Yehova mwanda wa kwitufundija bubine, pano kepadi kintu kya myaka isenselela ku katwa.​—Mateo 24:45-47; Bahebelu 13:7, 17.

Kadi Satana utompanga kukutamba mu muswelo wa patōkelela. Kyaba kimo utompanga kukukwatyija moyo. Kuzakajañana i “muswelo umo wa tamba kala wa lunsafwakanwa.” (Easily Led​—A History of Propaganda) Philip M. Taylor, polofesele umo wa mu Beletanye, walembele amba, kimfwa bene Ashidia, bāingidije kuzakajañana ne lunsafwakanwa mwanda wa kutādila balwana nabo. Satana nandi wingidijanga moyo, kimfwa moyo wa kutyina bantu, wa kutyina kupangwapangwa, ne wa kutyina kufwa, mwanda wa uleke’byo kwingidila Yehova.​—Isaya 8:12; Yelemia 42:11; Bahebelu 2:15.

Kokaleka Satana akuzakaje! Yesu wānenene amba: “Kemwakityinai boba bepaya umbidi, ino kupwa kino kebabwanyapo kulonga kintu kikwabo.” (Luka 12:4) Kulupila ne pa mfulo amba Yehova ukafikidija mulao wandi wa kukukwatanya ne kukupa “bukomo butabukile bwikalanga na bantu,” kadi ukakukwasha ukomene bulwi bwa Dyabola.​—2 Kodinda 4:7-9; 1 Petelo 3:14.

Na bubine, kitatyi kimo ubwanya kwivwana moyo ne buzōze. Ino vuluka binenwa bya Yehova byaākankamikile nabyo Yoshua bya amba: ‘Wikomeje bidi kadi winingishe abe mwine, kokakwatyibwapo moyo nansha kwikala ne nzuba mine mpika; mwanda Yehova Leza obe udi nobe konso konso koēnda.’ (Yoshua 1:9) Shi ubaanza kukambakanya mutyima, nabya lomba Yehova kiponka na ponka. Ubwanya kukulupila’mba ‘ndoe ya Leza itabukile milangwe yonso ikalama mutyima obe ne ñeni yobe.’ Penepa ukamona bukomo bwa kukomena lunsafwakanwa lo-lonso lwa Satana.​—Fidipai 4:6, 7, 13.

Le uvulukile lunsafwakanwa lwāingidije Labashake, mukendi wa bene Ashidia mwanda wa kuzakaja bantu ba Leza? Wādi usaka kwibakulupija amba kekudipo nansha umo wādi wa kwibakinga ku bene Ashidia nansha ke Yehova mwine. Wānenene’nka ne kunena’mba Yehova wāsoñenye bene Ashidia bakonakanye Yelusalema. Lelo i bika byānenene’po Yehova? Wānenene amba, “Kemukikwatyibwa moyo wa myanda yo mwaivwana ya bengidi ba mulopwe wa Ashidia wa mbaba.” (2 Balopwe 18:22-25; 19:6) Kupwa Yehova wātuma mwikeulu umo, mwine wāipaile bene Ashidia 185 000 mu bufuku bumo!​—2 Balopwe 19:35.

Le kwatadile kashā filime yobongola’mo muntu aye papo kuyuka mpika? Padi ye uno weneneje amba: ‘Kokikulupila’byo! Bakubepelanga!’ Penepa fwatakanya’po bidi bamwikeulu bakulombola’mba: “Kokyongolwa na bubela bwa Satana!”

Nanshi kokateja lunsafwakanwa lwa Satana. (Nkindi 26:24, 25) Teja’nka Yehova kadi mukulupile mu byonso byolonga. (Nkindi 3:5-7) Ukusenswe kadi ukusoñanya’mba: “Wami mwana, wikale wañeni ne kusangaja mutyima wami.” (Nkindi 27:11) Shi ulonge uno muswelo, nabya ukanekenya bulwi bwa mu ñeni!