YESU paāfundije bandi bana ba bwanga mwa kusapwila myanda miyampe, wādi uyukile amba ke bonsopo baketabija musapu wa Bulopwe. (Luka 10:3, 5, 6) Potusapula, tubwanya kutana bantu bamo ba mityima myūmu nansha babilobo. Na bubine, bantu ba uno muswelo babwanya kwitulengeja tukomenwe kwivwanina lusa boba botusapwila.

Muntu wa lusa utanga mutyima ku bisakibwa ne ku makambakano a bakwabo, witūla pa kyabo kyaba ne kwikala na mutyima wa kwibakwasha. Inoko, shi tujimije mutyima wa lusa ku boba botusapwila, nankyo tukajimija bupyasakane bwetu bityebitye kadi mwingilo wetu keukekalapo biyampe. Ino shi tutamije mutyima wa lusa, bidi pamo bwa batwe bapēpula mudilo​—tukalama bupyasakane bwetu mu mwingilo kashā bwaka mudilo!​—1 Tesalonika 5:19.

Le tukatamija mutyima wa lusa namani nansha ke pobimweka bu bikomo? Twisambilei’ko pa bimfwa bisatu byotufwaninwe kwiula​—kimfwa kya Yehova, kya Yesu, ne kya mutumibwa Polo.

Pano ke myaka tununu ne tununu, Yehova ūminina’nka kūminina kufutululwa kwa dijina dyandi. Nansha nankyo, aye’ko udi na “kanye ku bampikwa kufwija’ko ne ku babi.” (Luka 6:35) Kano kanye i kamwekele ku kitūkijetyima kyandi. Yehova usakilanga “bantu ba miswelo yonso” bapande. (1 Temote 2:3, 4) Nansha Leza byashikilwe bubi, ino umwene bantu na mvubu kadi kasakilepo muntu nansha umo ajimije būmi.​—2 Petelo 3:9.

Yehova wivwanije muswelo usabile Satana meso a bantu bampikwa kwitabija. (2 Kodinda 4:3, 4) Bavule i bafundijibwe nkulupilo ya bubela ne mumweno mubi tamba ku bwanuke, bine bibalengeja bakomenwe kwitabija bubine. Yehova usakanga kukwasha bano bantu. Le tubayuka kino namani?

Langulukila pa muswelo wāmwene Yehova bene Nineva ba pa kala. Nansha byobādi na bilongwa bya bukalabale, Yehova wānenene Yona amba: “Le ami nami mbulwepo kwivwanina Nineva lusa, kibundi kikatampe, mudi bantu 120 000 ne kupita, kebayukilepo nansha kiyampe ne kibi kine?” (Yona 4:11) Yehova wāmwene amba bene Nineva basakilwa bukwashi bwa ku mushipiditu, penepa webakwatyilwa lusa ne kutuma Yona akebadyumune.

Netu tumwene bantu na mvubu pamo bwa Yehova. Tubwanya kumwiula shi tudi na mutyima wa kukwasha boba bonso bateja, nansha shi bamweka bu kebasangedilepo musapu.

Shi bantu kebasangedilepo musapu wetu, ketufwaninwepo kwimanina’nka pa mumwekelo  wabo wa panja ino tufwaninwe kujingulula kine kyobalongela nabya. Bamo babwanya kwikala na mumweno mubi pa Bible nansha pa bene Kidishitu mwanda’tu wa bilongwa bibi bya boba betela bu bene Kidishitu. Pakwabo kudi bantu bebalombwele myanda ya bubela pa nkulupilo yetu. Bakwabo nabo batyinanga kufutululwa na bantu ba mu kibundi nansha na ba mu kisaka shi betutambule biyampe.

Bantu bamo botwitana nabo mu busapudi babwanya kupela kwitutambula pa mwanda wa kuvutakanibwa ñeni na byamalwa byebatene. Kaka umo mishonele witwa bu Kim unena’mba: “Mu kipindi kimo kya mu wetu mwaba, bantu batanwanga’nka na mavita ne kujimija bintu byabo byonso. Kebadipo na lukulupilo lwa bine lwa mu mafuku a kumeso. Badi na bululu kadi kebadipo na mutyima-ntenke. Mu uno mwaba, tutananga’mo kyaba kyonso bantu bapela musapu wetu. Difuku dimo būmi bwami bwaikele’nka ne mu kyaka ponadi mu busapudi.”

Le Kim ulombolanga lusa namani nansha byaatenwe na ano makambakano? Unena’mba: “Shi kebantambwilepo biyampe, mvulukanga kisonekwa kya Nkindi 19:11, kinena’mba: ‘Bujinguludi bwa muntu bine butalajanga bulobo bwandi.’ Kuta mutyima ku bitamina bya bantu ba mu wetu mwaba kunkwashanga nebakwatyilwe lusa. Ne kadi ke bonsopo botwitana nabo babilobo. Mu uno mwaba umo onka, tuloñanga’mo ne kujokela’mo kusangaja.”

Tubwanya kwiipangula’mba, ‘Le nadi wa kumona namani musapu wa Bulopwe shi nadi mu ngikadilo na idi’mo boba bonsapwila?’ Kimfwa, le twadi ba kulonga namani shi betusapwila kyaba kyonso myanda ya bubela itala Batumoni ba Yehova? Mu uno muswelo, padi netu twadi ba kupela musapu ne kusakilwa kwivwaninwa lusa. Shi tuvuluka musoñanya wa Yesu wa kulongela bakwetu bintu na motusakila betulongele’byo, nabya tukebevwanina lusa nansha ke pobimweka bu bikomo.​—Mateo 7:12.

Mutumibwa Polo wālombwele lusa nansha ke ku bantu bādi bamulwa. Mwanda waka? Mwanda wādi uvuluka mwaādi wikadile pa kala. Unena’mba: “Byonadi pa kala muntu utuka Leza ne upangapanga bantu bandi ne wa kibengo. Inoko nafwidilwe lusa, mwanda nadi nonga nabya pampikwa kuyuka kadi pampikwa lwitabijo.” (1 Temote 1:13) Wāyukile amba ba Yehova ne Yesu bāmufwidile lusa lukatampe. Padi nandi mu bantu baādi usapwila, wādi utana’mo bamo badi na mwaādi wikadile pa kala.

Kyaba kimo, Polo wātene nkulupilo ya bubela yādi ke myāle miji. Le wālongele’po namani?  Bilongwa 17:16 ushintulula’mba Polo paādi mu Atene, “mutyima munda wamufīta fututu pa kumona’mba kibundi i kiyule bilezaleza bā.” Nansha nankyo, Polo wāpingakenye kufītwa kwandi kwa mutyima na kusapula bukamoni bulumbuluke. (Bilongwa 17:22, 23) Wādi ukwatañanya musapwilo wandi mungya bibidiji bya bantu beshileshile pa kusaka’mba apandije’mo “bamo mu miswelo yonso.”​—1 Kodinda 9:20-23.

Tubwanya kwiula Polo na kujingulula mumweno mubi ne nkulupilo ya bubela yotutana ne kusapula na bunwa “myanda miyampe ya kintu kilumbuluke.” (Isaya 52:7) Kaka umo witwa bu Dorothy unena’mba: “Mu mwaba wetu, bantu bavule i bafundijibwe amba Leza udi na mutyima mūmu kadi upanga bantu mfuto. Nebafwijanga’ko pa ino nkulupilo yabo mikomo itala padi Leza, kupwa nakokela milangwe yabo pa byobya binena Bible pa buswe bwa Yehova ne pa milao yandi ya mu mafuku a kumeso.”

Kadi tufwaninwe kuta mutyima ku muswelo wa kukankamika boba botusapula nabo. Jessica ubweja’ko amba: “Shi mwanetu watanwa na myanda mibi mu mwingilo, nkisakengapo twisambile’po. Inoko, nshintanga mīsambo’ya na myanda miyampe, pamo bwa kwisambila pa bintu biyampe bilupuka ku mwingilo wetu nansha bamo byobapela kwituteja.”

Yehova uyukile bikoleja byonso byotutana mu mwingilo. Fwatakanya’po bidi mwasangelanga paetumona twiula lusa lwandi! (Luka 6:36) Inoko, Yehova kakalombolapo lusa nyeke ne nyeke. Nanshi tukulupilei amba Yehova mwine uyukile kitatyi kyakaleta mfulo ya ino ngikadilo ya bintu. Pano’ko bidi, musapu wetu i wa kampeja-bukidi. (2 Temote 4:2) Nanshi twendelelei kuvuija mwingilo wetu na bupyasakane ne kwikala na lusa ku “bantu ba miswelo yonso.”