BYA KULONGA SHI ÑENI IBAKUVUTAKANA
Lelo Wi Muvutakanibwe Ñeni?
“Muntu ense uvutakanibwanga ñeni mu muswelo kampanda, ino ami nemuvutakanibwe ñeni bininge. Ke mwandapo mukatampe umvutakenye ñeni, ino i myanda mivule, bikoleja, ne kulela wami mulume ubela misongo ya ku ngitu ne mu ñeni mu bula bwa myaka mivule.”—Jill. a
“Wami mukaji waunyemene, kadi byaunombele kulela betu bana babidi bunka bwami. Kulela bana bunka kwadi kukomo. Ne kadi najimije kaji, nkyadipo nakibwanya kusokola lupeto lwa kulongolweja nalo motoka. Nakomenwe kya kulonga. Ñeni yaumvutakene bininge. Shako nadi ndyukile amba i bibi kwiipaya, ino nalomba Leza angipaye.”—Barry.
Pamo bwa ba Jill ne Barry, le nobe kyaba kimo ñeni ikuvutakananga bininge? Shi i amo, bishinte bilonda’ko bisa kukusenga ne kukukwasha. Bīsambila pa bine bivudile kuvutakanya ñeni, pa bintu bibwanya kulupuka ku kuvutakanibwa ñeni, ne byotubwanya kulonga shi ñeni ibetuvutakana.
a Majina i mashintwe.
Tala'po Bidi ne Bino:
KITEBA KYA MULAMI
Kuzumbija Mutyima Kudi Konso!
Bufundi bulombola amba enka ne kuzumbija mutyima kutyetye kubwejanga’ko kyaka kya kufwa mubishimubishi. Lelo i muswelo’ka obwanya kulwa nako?
