KINTU 5
Mvubu ya Buludiki bwa Muntu Mutame
LE I ANI UFWANINWE KULUDIKA BANA?
Bana basakilwanga bantu batame ba kwibaludika mu būmi ne kwibapa madingi. Byodi mbutwile, abe ye ufwaninwe kwingila uno mwingilo; na bubine i kiselwa kyobe. Inoko bantu bakwabo batame nabo babwanya kufundija bobe bana.
MWANDA WAKA BULUDIKI BWA MUNTU MUTAME BUDI NA MVUBU?
Mu matanda mavule, bankasampe kebapityijangapo kitatyi kivule na bantu batame. Languluka’po bidi:
-
Mu bula bwa difuku bana bapityijanga kitatyi kivule na bakwabo bavule ba ku masomo kupita’ko badimu ne bantu bakwabo batame.
-
Shi abatambe bankasampe bamo bajokelanga ku mobo batana bambutwile bonso ku kaji.
-
Bwifundi bumo bulombola’mba mu États-Unis, bana ba myaka 8 kutūla ku 12 bapityijanga kintu kya mansá asamba bakaya na bisanji difuku ne difuku. *
Dibuku dimo Hold On to Your Kids dinena’mba: “Bankasampe kebakisakengapo kufundijibwa, kwiula, nansha kuludikwa na bainabo, bashabo, badimu, ne bantu bakwabo batame . . . ino basaka’ko bantu ba yabo myaka.”
MWA KULUDIKILA MWANA
Pityija kitatyi na bobe bana.
MUSOÑANYA WA MU BIBLE: “Fundija mwana dishinda dyafwaninwe kwenda’mo; nansha shi wanunupa kakasāsuka’mopo.”—Nkindi 22:6, kunshi kwa dyani.
Mungya kipangila, bana basakanga kuludikwa na bambutwile. Na bubine bashayuka banena’mba nansha shi bana kebatame’ko, bamonanga madingi a bambutwile na mvubu kupita’ko a bantu ba yabo myaka. Dokitele Laurence Steinberg walembele mu dibuku You and Your Adolescent amba: “Bambutwile badi nyeke na lupusa pa mwikadila ne mwiendelejo wa babo bana tamba pa bwanuke ne pa bukulu pene.” Ubweja’ko amba: “Bankasampe batanga mutyima ku byolanga ne kuteja byonena nansha shi kebetabije’byopo.”
Twelela pa kipangila kya bana kya kukimba buludiki kodi. Pityija kitatyi na bobe bana, wibalombole momwena bintu, bintu byomona na mvubu, ne myanda ke mikutane mu būmi.
Mukimbile wa kumukwasha.
MUSOÑANYA WA MU BIBLE: “Yewa unanga na ba tunangu ukekala wa tunangu.”—Nkindi 13:20.
Lelo ubavuluka’ko muntu umo mutame ubwanya kuleta kimfwa kiyampe kudi obe mwana? Ubulwepo kukwata’ko mulangwe amba uno muntu anze kupityija kitatyi pamo na obe mwana? Na bubine kufwaninwepo kunyema kiselwa kyobe kya bu mbutwile. Inoko kimba’ko muntu mutame ukulupilwa oyukile biyampe amba kakasanshijapo obe mwana, mwine ukakukwasha’ko na kumufundija. Mu Bible, Temote—nansha ke pa bukulu—wāmwenine bininge mu kipwano kyawādi upwene na mutumibwa Polo, Polo nandi wāmwenine mu kino kipwano.—Bene Fidipai 2:20, 22.
Mu myaka katwa ipityile, bisaka bivule kebyadipo bishikatyila pamo na bankambo, bamuyomba, bamama-nkaji, ne babutule bakwabo mwanda wa kuvilukaviluka. Shi ye momushikatyile, kimbila bobe bana mikenga ya kuboila ñeni ku bantu batame badi na ngikadila yosakila bobe bana.
^ mus. 9 Buno bwifundi, bwalombwele amba bankasampe bapityijanga kubwipi kwa mansá kitema ku difuku bakaya na bisanji. Mu kino kibalwa kemubadilwapo mansá apityijanga bana ne bankasampe pa Entelenete, pobadi ku masomo, nansha pobalonga madevwala.
