Bene Kidishitu Babine Bonso I Basapudi ba Myanda Miyampe
Bene Kidishitu Babine Bonso I Basapudi ba Myanda Miyampe
“Imbai kudi Yehova, eselai dijina dyandi. Mobukila mobukila sapulai myanda miyampe ya lupandilo lwandi.”—MITŌTO 96:2, NW.
1. I myanda miyampe’ka isaka kwivwanwa na bantu, ne Batumoni ba Yehova i balete kifwa’ka kiyampe kya kusambakanya ino myanda miyampe?
MU NTANDA ya bimpengele bya bukile bukya, i busengi bukatampe pa kuyuka amba divita, bupolapola, nzala, ne kasusu bikafula panopano ponka, pamo na munenena’kyo Bible. (Mitōto 46:9; 72:3, 7, 8, 12, 16) Mwene ino yo myanda miyampe isaka kuteja muntu ne muntu? Mo mulangila ne Batumoni ba Yehova. Bayukene pi na pi amba bo basapula “myanda miyampe ya dyese.” (Isaya 52:7) I kyabine, Batumoni bavule bapangwapañwanga pa mwanda wa kusumininwa kobasumininwe kusapula myanda miyampe. Ino abo basakilanga bantu biyampe. Bine, Batumoni i batumbe pangala pa bupyasakane ne kūminina kwabo!
2. I buluji’ka bumo bupyasakenine Batumoni ba Yehova?
2 Bupyasakane bwa Batumoni ba Yehova mu ino myaka bwiifwene na bobwa bwādi na bene Kidishitu ba mu myaka katwa imbajinji. Julunale umo wa Katolika Loma (L’Osservatore Romano) wēsambile byabine pobadi, amba: “Bene Kidishitu babajinji, pobāpwile’tu kubatyijibwa, bāmwene amba kiselwa kyabo i kusambakanya Evanjile. Ku kyakanwa na kyakanwa, bano bapika bādi basambulula Evanjile.” Mwanda waka Batumoni ba Yehova i bapyasakane pamo bwa bene Kidishitu babajinji? Dibajinji, mwanda myanda miyampe yobasapula itambanga kudi Yehova Leza mwine. Mwene buno bo buluji bupite bonso bwa kupyasakena? Kusapula kwabo i kwitaba kobetaba ku binenwa bya mulembi wa mitōto wānene amba: “Imbai kudi Yehova, eselai dijina dyandi. Mobukila mobukila sapulai myanda miyampe ya lupandilo lwandi.”—Mitōto 96:2, NW.
3. (a) I buluji’ka bwa bubidi bupyasakenine Batumoni ba Yehova? (b) Mu “lupandilo [lwa Leza], mubadilwa ne bintu’ka?
3 Binenwa bya mulembi wa mitōto bituvuluja buluji bwa bubidi bupyasakenine Batumoni ba Yehova. Musapu wabo i wa lupandilo. Bantu bamo bepēne mu myanda ya kiñanga, ya kukwasha bantu mu mushikatyilo ne mu misokwe, ne mu myanda mikwabo ya kulumbulula būmi bwa bakwabo, ne kino i kintu kya kutendelwa. Ino kintu kyo-kyonso kilongelwa muntu na muntu mukwabo kekibwanyapo kudingakana nansha bityetye na “lupandilo [lwa Leza].” Yehova, kupityila kudi Yesu Kidishitu, ukanyongolola babutūkanye ku bubi, ku misongo ne ku lufu. Bakapebwa ano madyese bakekala bōmi nyeke! (Yoano 3:16, 36; Kusokwelwa 21:3, 4) Dyalelo, lupandilo lubadilwa mu ‘mingilo ya kutendelwa’ isekununwa na bene Kidishitu pobetaba ku bino binenwa binena’mba: “Sapulai ntumbo ya [Leza] umbukata mwa mizo, ne mīngilo yandi ya kutendelwa umbukata mwa bantu bonso. Ke-muntu Yehova i mukatampe, wakutendelwa pakatampe pene; [u]tabukile baleza bonso kwakamibwa.”—Mitōto 96:3, 4.
Kifwa kya Mfumwetu
4-6. (a) I buluji’ka bwa busatu bupyasakenine Batumoni ba Yehova? (b) Yesu wālombwele bupyasakane bwandi namani mu mwingilo wa kusapula myanda miyampe?
4 Batumoni ba Yehova i bapyasakane pa buno buluji bwa busatu. Balondanga kifwa kya Yesu Kidishitu. (1 Petelo 2:21) Uno mwana-mulume mubwaninine wāitabije na mutyima umo kiselwa kya ‘kusapula myanda miyampe ku bimonya-malwa.’ (Isaya 61:1; Luka 4:17-21) Kino kyo kyāmwikadije musapudi, mwedi wa lubila lwa myanda miyampe. Wādi wenda mu bula ne mu bunkimbwa bwa Ngadilea ne Yudea monso, “usapula Myanda Miyampe ya Bulopwe.” (Mateo 4:23, MB) Byaāyukile amba bavule baketabija ino myanda miyampe, wānene bandi bana-babwanga amba: “Byakwangula umbudimi i bivule bīne, nanshi bakuputuminamo i batyetye. I binebīne, lombelai bidi amba mwine byangulwa alundule bakuputumina mu byangulwa byandi.”—Mateo 9:37, 38.
5 Penepo Yesu, pa kulongela mungya milombelo yandi, wāfundija bakwabo nabo bekale basapudi ba myanda miyampe. Mwenda mafuku wātuma batumibwa bandi bunka bwabo, wēbalaija’mba: “Byo muya’byo, mwenda musapula’mba, bulopwe bwa mūlu bubafwena pa bwipi.” Lelo kyādi kya kwikala kiyampe shi bāshilwile kwitūdila’ko mpangiko ya kutyepeja’ko makambakano a bantu ba mu yoya myaka? Lelo bādi bafwaninwe kwikuja mu myanda ya politike mwanda wa kulwa na mboloji yādi yenda muongo pa ntanda mu kine kitatyi’kya? Nansha dimo. Ino Yesu wātūdile’ko musoñanya wa kulonda basapudi bonso bene Kidishitu, wāsapwidile balondi bandi amba: “Byo muya’byo, mwenda musapula.”—Mateo 10:5-7.
6 Kupwa, Yesu wātuma kisumpi kikwabo kya bana-babwanga bakasapule amba: “Bulopwe bwa Leza bubemufwenenena pa bwipi.” Abo pa kujoka kuleta lapolo wa kubwanya kobābwenye lwendo lwabo lwa busapudi, Yesu wāsangala mpata. Wālombela ne kulombela’mba: “Nakufwijapo abe Tata, Mwine wa mūlu ne panshi, ubafuko byo wafīle byobya ku bakudyumuka, ne ku bañeni, nanshi ku twana-twa-lukeke ubasokola’byo.” (Luka 10:1, 8, 9, 21) Bana-babwanga ba Yesu bādi bepēne mu buluwe, mu kudima ne mu twaji tukwabo pa kala, bādi pamo bwa twana twa lukeke pa kwibadingakanya na bendeji ba mitōtelo bafundile masomo malampe a muzo wabo. Ino bana-babwanga bo bafundijibwe mwa kusapwila myanda miyampe ipityile yonso.
7. Yesu pa kupwa kukanda mūlu, i kwepi kwābadikile balondi bandi kusapula myanda miyampe?
7 Yesu pa kupwa kukanda mūlu, balondi bandi bāendelela na kusambakanya myanda miyampe ya lupandilo. (Bilongwa 2:21, 38-40) Lelo bābadikile kusapwila bāni? Lelo bāendele bidi ku mizo yampikwa kuyuka Leza? Mhm, mwaba wabo umbajinji wādi Isalela, bantu bādi kala bayukile Yehova mu myaka 1 500 ne kupita. Lelo bādi bapebwe kishima kya kusapula mu ntanda mobādi kala batōta Yehova? Eyo, bāpelwe’kyo. Yesu wēbalombwele amba: “Mukēkal[a] basapudi bami bakusapula mu Yelusalema, ne monso mu Yudea, ne mu Samadia, ne kulampe kwine kumfulo kwa ntanda.” (Bilongwa 1:8) Isalela wādi ufwaninwe kwivwana myanda miyampe pamo’nka na mizo mikwabo.
8. Batumoni ba Yehova ba mu ino myaka beulanga balondi ba Yesu ba mu myaka katwa imbajinji muswelo’ka?
8 Ne Batumoni ba Yehova nabo monka na monka, dyalelo basapulanga pano pa ntanda ponso. Bengidila pamo na mwikeulu obāmwene kudi Yoano, wādi na “myanda-miyampe ya nyeke ya kusapwila bēkele panopantanda, ne mizo yonso, ne bisaka byonso, ne ndimi yonso, ne bantu bonso bēne kumo.” (Kusokwelwa 14:6) Mu mwaka wa 2001, basapwile mu matanda ne myaba 235, kubadila’mo ne matanda amwenwe kala amba i a bene Kidishitu. Lelo i bibi bilonga Batumoni ba Yehova pa kusapula mu bifuko mushimikile kala Bipwilo bya Kine Kidishitu bipwilo byabo? Bamo ye mobanenenanga, bamona uno mwingilo wa kusapula bu “kwiba mikōko” ya bakwabo. Inoko Batumoni ba Yehova bavulukanga mwēivwanine Yesu pa kumona Bayuda bakwityepeja ba mu myaka yabo’ya. Abo bādi kala na butobo, ino Yesu kāikelepo kwikaka kwibasapwila myanda miyampe. “Webakwatyilw[e] lusa, mwanda basusukile ne kususuka, ne kusansana badingakana pamo na mikōko yampikwa mukumbi.” (Mateo 9:36) Ne Batumoni ba Yehova nabo mo monka, shi abatana bantu bakwityepeja kebayukile Yehova ne Bulopwe bwandi, lelo bafwaninwe kuleka kwibasapwila myanda miyampe mwanda’po’tu mutōtelo kampanda wipapile’bo amba i bao? Tubalondolola amba mhm, mwanda tulondanga kifwa kya batumibwa ba Yesu. Myanda miyampe ifwaninwe kusapulwa “ku mizo yonso ya bantu,” pampikwa amba yeu ye yeu.—Mako 13:10.
Bene Kidishitu Babajinji Bonso Bādi Basapula
9. Mu myaka katwa imbajinji, i bāni mu kipwilo kya bwine Kidishitu bādi bengila mwingilo wa kusapula?
9 I bāni bādi bengila mwingilo wa busapudi mu myaka katwa imbajinji? Myanda yonso ilombola patōka amba bene Kidishitu bonso bādi basapudi ba myanda miyampe. Mulembi Williams unena’mba: “Bukamoni i buyukane konso amba bene Kidishitu bonso ba mu Kipwilo kibajinji . . . bādi basapula evanjile.” Bible usekununa binkumenkume bya mu difuku dya Pentekosa wa 33 K.K. amba: “Abo bonsololo [bana-balume ne bana-bakaji] bayūlwa [m]ushipiditu [s]andu, bashilula kwisamba ne ndimi ya mineneno īngi nayo, monka mo bapelelwe’byo kwisamba’byo kudi [m]ushipiditu.” Mu bano basapudi mwādi bana-balume ne bana-bakaji, banuke ne batame, bapika ne banapabo. (Bilongwa 1:14; 2:1, 4, 17, 18; Yoela 2:28, 29; Ngalatea 3:28) Kupangwapangwa kwālengeje bene Kidishitu bavule kunyema mu Yelusalema, ino boba ‘bāpalakenibwe kungi, bādi benda basapula myanda miyampe.’ (Bilongwa 8:4) Boba bonso ‘bāpalakanibwe kungi’ bādi basapula, ke enkapo bantu batongwe babala-banga kete, mhm.
10. I mwingilo’ka umo pabidi wāingilwe kumeso kwa ngikadilo ya Bayuda konakanibwa?
10 Uno mwanda wādi wabine mu yoya myaka imbajinji yonsololo. Yesu wālaile mu bupolofeto amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.” (Mateo 24:14, MB) Pa kufikidila kwa bino binenwa mu myaka katwa imbajinji, myanda miyampe yādi isapulwa pi na pi kumeso kwa bibumbo bya bene Loma konakanya ngikadilo ya mitōtelo ne ya kipolitike ya Bayuda. (Kolose 1:23) Kadi balondi ba Yesu bonso bākōkele ku luno lubila lwāebapele amba: “Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya [m]ushipiditu [s]andu. Kadi ne kwibalombola balaminine byonso byo nemulaīle.” (Mateo 28:19, 20) Bene Kidishitu babajinji kebādipo’nka bakankamika batūkanye amba itabijai mudi Yesu kupwa bebaleka besokwele abo bene dishinda dya mwa kutōtela, na mulongela basapudi ba mu ino myaka. Ino bādi bebafundija amba bekale bana-babwanga ba Yesu, bebabunga pamo mu bipwilo, ne kwibeija mwingilo wa kusapula myanda miyampe ne kulonga bana-babwanga. (Bilongwa 14:21-23) Ne dyalelo nadyo mo monka, Batumoni ba Yehova balondanga kino kifwa.
11. I bāni dyalelo basapwila bantu myanda miyampe milumbuluke kupita yonso?
11 Batumoni ba Yehova bamobamo, pa kulonda’bo kifwa kya ba Polo, Banabasa ne bakwabo ba mu myaka katwa imbajinji, i bende kukengila bu bamishonele mu matanda a bweni. Mwingilo wabo udi na kamweno kabinebine, mwanda kebekujangapo mu mapolitike, nansha kwepa mu muswelo kampanda mwingilo wa kusapula myanda miyampe obapelwe. Abo bakōkele enka ku lubila lwa Yesu lwibasoñanya’mba: “Byo muya’byo, mwenda musapula.” Inoko Batumoni ba Yehova bavule ke bamishonelepo bakengidile ntanda-bene. Bangi umbukata mwabo bengilanga kaji ka ngitu, bakwabo nabo bakifunda masomo. Bamobamo balelanga bana. Nansha nankyo, Batumoni bonso basapwilanga bakwabo myanda miyampe yobafundile. Banuke ne batame, bana-balume ne bana-bakaji, bonso betabanga na nsangaji ku lwito lwa mu Bible lunena’mba: “Sapula uno mwanda, ne kupyasakana monka, mo pafikila, ne mo kepafikile.” (2 Temote 4:2) Balondanga kifwa kya bantangye babo ba mu myaka katwa imbajinji, o mwanda bendelela “kuleka’byo kufundija mpika, ne kusapula [myanda miyampe itala padi Kidishitu] Yesu.” (Bilongwa 5:42) Basapwilanga bantu myanda miyampe milumbuluke kupita yonso.
I Kukoka Bantu’ni, I Kwibasapwila?
12. Kukokela bantu mu mutōtelo mukwabo kumonwanga namani dyalelo?
12 Mu ano mafuku, bamo banenanga amba kukokela bantu mu mutōtelo mukwabo i kibi kutabuka. Kilembwa kyalupwilwe na Kitango kya Ntanda Yonso kya Bipwilo i kifule ne ku kwisambila pa “bubi bwa kukokela bantu mu mutōtelo.” Mwanda waka? Julunale umo (Catholic World Report) unena’mba: “Pa mwanda wa kwiuningauninga kwa bene Orthodoxe, ‘kukokela bantu mu mutōtelo ungi’ pano ke kumwekanga bu kwibaningila kwitabija ku bukomo.”
13. I bifwa’ka bimo bilombola bubi bwa kukokela bantu mu mutōtelo?
13 Lelo kukokela bantu mu mutōtelo i kubi? Eyo, kubwanya kwikala kubi. Yesu wānene amba kukoka kwādi kukokela basonekeji ne Bafadiseo bantu mu mutōtelo wabo kwādi kubi. (Mateo 23:15) I bine, ‘kuningila muntu amba enka etabije’ ke kuyampepo. Kifwa, kukwatañana na Jozefu mulembi wa mānga, pāikele John Hyrcanus, mwine Makabe, kunekenya bene Idyumea, “wēbanene kushala mu ntanda yabo mafuku onso enka shi abaitabija kutwela kwisao ne kulama bijila bya Bayuda.” Nanshi pa kusaka amba bene Idyumea bendejibwe na buludiki bwa Bayuda, bādi banenwe kulonda mutōtelo wa Bayuda. Balembi ba mānga betulombola kadi amba mu myaka ya tutwa mwanda K.K., Charlemagne wānekenye bene Saxon bapakano kungala kwa Bulaya, wēbaningila na kwibamwesha malwa amba poso enka betabije. * Le bine kwitabija kwa bene Saxon ne kwa bene Idyumea kwādi kwabinebine? Tulete kifwa, Mulopwe Heloda mwine Idyumea—mwine wādi ukimba kwipaija Yesu paākidi mwana wa lukeke—lelo wādi ulamete byabinebine ku Bijila bya Mosesa bya ku bukomo bwa mushipiditu wa Leza?—Mateo 2:1-18.
14. Bamishonele ba Bipwilo bya Kine Kidishitu baningilanga bantu kwitabija namani?
14 Lelo kwitabija ku bukomo kukidi’ko ne dyalelo? Mu muswelo kampanda, kukidi’ko. Mungya malapolo, bamishonele bamo ba Bipwilo bya Kine Kidishitu benda bukila-lui batūlanga masomo a kufundija enka boba babwanya kwitabija mu bipwilo byabo kete. Bakwabo bashikatyija bapando bafwa nzala amba bevwane bidi busapudi penepo ke kwibatambwija bidibwa. Kukwatañana na kunena kwanenwe mu 1992 ku kitango kya Baeveke ba Orthodoxe, “kukokela bantu mu mutōtelo kyaba kimo kuloñwanga na kongola bantu na bintu, kyaba kikwabo na miswelo pala pala ya bukalabale.”
15. Lelo Batumoni ba Yehova bakokelanga bantu mu kipwilo kyabo dyalelo? Shintulula.
15 Kuningila bantu amba bashinte mutōtelo wabo ke kuyampepo. Bine, Batumoni ba Yehova kebaloñangapo uno muswelo. * O mwanda kebakokelangapo bantu mu kyabo kipwilo. Ino abo basapwilanga muntu ne muntu myanda miyampe, mwādi musapwila’yo bene Kidishitu ba mu myaka katwa imbajinji. Yewa witaba aye mwine ku lwito, utambulanga buyuki kupityila ku kifundwa kya Bible. Bano bantu basangela musapu bafundanga mwa kwikadila na lwitabijo lukomo mudi Leza ne mu mpango yandi, lwitabijo lwimanine pa buyuki bwabinebine bwa mu Bible. Ku mfulo nabo kebete pa dijina dya Leza, Yehova, mwanda wa bakamone kupanda. (Loma 10:13, 14, 17) Kwitabija nansha kupela myanda miyampe i mwanda utala muntu mwine. Ke kwa kuningilwapo. Shi kwadi amba i kwa kuningilwa, longa kwalamuka pa mutyima kekudipo na mvubu. Pa kwitabijibwa na Leza, butōtyi bwetu bufwaninwe kutamba ku mutyima.—Kupituluka 6:4, 5; 10:12.
Kusapula mu Ino Myaka
16. Mwingilo wa kusapula wa Batumoni ba Yehova i mwilundile’ko muswelo’ka mu ino myaka?
16 Mu ino myaka yonso Batumoni ba Yehova basapulanga myanda miyampe ya Bulopwe na kufikidija bikatampe mpata Mateo 24:14. Kingidilwa kyabo kikatampe kyobengidija mu mwingilo wa kusapula i dipepala Kiteba kya Mulami. * Mu 1879, pa kulupuka kwa manimelo mabajinji a Kiteba kya Mulami, kwādi kutampwa buvule bwa milami 6 000 mu ludimi lumo kete. Ino mu mwaka wa 2001, myaka 122 kupita’po, kwadi kutampwa buvule bwa milami 23 042 000 mu ndimi 141. Kuno kwilundila’ko i kukwatañane na kutanta kwa mwingilo wa Batumoni ba Yehova wa kusapula. Enzankanya tununu tutyetye twa nsaa yapityijibwe mu busapudi mu myaka ya tutwa 19 na nsaa 1 169 082 225 yapēnwe mu mwingilo wa kusapula mu mwaka wa 2001. Kadi tala mwayene wa bifundwa bya Bible 4 921 702 byaendejibwe ku bitupu ku kweji ne kweji. Bine, kuno ko kwingila mwingilo mulumbuluke’po kashā! Uno mwingilo onso waingilwe na basapudi ba Bulopwe bakankamane 6 117 666.
17. (a) I baleza’ka ba bubela batōtwa dyalelo? (b) Muntu ne muntu, ekale wa ludimi’ka, wa muzo’ka, mutōkane nansha mukelenge, ufwaninwe kuyuka bika?
17 Mulembi wa Mitōto unena’mba: “Baleza bonso ba bantu i bankishi; ino Yehova aye wapangile madiulu.” (Mitōto 96:5) Mu ntanda ya dyalelo, bantu batōtanga muzo wabo, byelekejo bya muzo, bantu ba ntumbo, bituntwa ne bupeta. (Mateo 6:24; Efisesa 5:5; Kolose 3:5) Mohandas Gandhi wānene amba: “Nena na kusumininwa konso amba . . . Bulaya bwa dyalelo budi enka na bwine Kidishitu bwa ku kanwa bitupu. Kunena na bubine butōtanga Mamona [bupeta].” Ino kisakwa kine i kino, myanda miyampe ifwaninwe kwivwanwa konso konso. Muntu yense, ekale unena ludimi’ka, wa muzo’ka, mutōkane nansha mukelenge, ufwaninwe kuyuka Yehova ne mpango yandi. Tusaka bonsololo betabe ku binenwa bya mulembi wa mitōto wānene amba: “Panai kudi Yehova ntumbo ne bukomo. Panai kudi Yehova ntumbo mifwaninwe dijina dyandi.” (Mitōto 96:7, 8) Batumoni ba Yehova bakwashanga bakwabo befunde kuyuka Yehova amba nabo bamupe ntumbo imufwaninwe. Bonso betabija bamwenanga’mo byabuyabuya bikatampe. Lelo byabuyabuya bine i byabuyabuya’ka? Byo bisa kwisambilwa’po mu kishinte kilonda’ko.
[Kunshi kwa dyani]
^ Kukwatañana na dibuku dimo (The Catholic Encyclopedia), mu myaka ya Kupanduka kwa Bene Mishoni mu Katolika, bantu bādi baningilwa kwitabija mutōtelo ungi ku bukomo na bino bishima: Cuius regio, illius et religio (Ko kunena’mba: “Yewa uludika ntanda ye mwine ulombola ne mutōtelo wayo.”)
^ Ku lenyo ya Mwingilo Utala Bwanapabo bwa Mitōtelo ya Ntanda Yonso kwalongelwe mu Etats-Unis mu mafuku 16 Kweji 11, 2000, umo wa mu batenwe’ko washiyañenye boba baningila bantu kwitabija na mwingilo wingila Batumoni ba Yehova. Wanena amba Batumoni ba Yehova basapwilanga bakwabo, kadi pobasapula, muntu udi ne na bwanapabo bwa kwibanena amba “Kebisangejepo,” penepa washita ku kibelo kwapwa.
^ Dijina dituntulu dya dino dipepala i Kiteba kya Mulami Kisapula Bulopwe bwa Yehova.
Le Ukokeja Kushintulula?
• Mwanda waka Batumoni ba Yehova i basapudi bapyasakane?
• Mwanda waka Batumoni ba Yehova basapulanga ne mu bifuko mushimikilwe kala Bipwilo bya Kine Kidishitu?
• Mwanda waka Batumoni ba Yehova kebakokelangapo bantu mu kipwilo kyabo?
• Mwingilo wa kusapula wingila Batumoni ba Yehova ubatanta muswelo’ka mu ino myaka?
[Bipangujo bya Kifundwa]
[Kifwatulo pa paje 19]
Yesu wādi musapudi mupyasakane wa myanda miyampe kadi wāfundije ne bakwabo kwingila uno mwingilo
[Kifwatulo pa paje 20]
Bonso ba mu kipwilo kya mu myaka katwa imbajinji bādi basapula myanda miyampe
[Kifwatulo pa paje 21]
Kuningila bantu bashinte kipwilo kyabo ke biyampepo