Bipangujo bya Batangi

Kipwilo kya bwine Kidishitu kimonanga namani mudyopolo?

Kinenwa kya Leza kipeleja bunkolwankolwa ne mudyopolo mwine amba i mwikadilo kewitabijibwepo ku boba bengidila Leza. Nanshi kipwilo kya bwine Kidishitu kimwene muntu wa mudyopolo wa endaenda pamo’nka bwa nkolwankolwa wambulwa kwalamuka. Nkolwankolwa ne wa mudyopolo bonso babidi kebabwanyapo kubadilwa mu kipwilo kya bwine Kidishitu.

Nkindi 23:20, 21 unena’mba: “Kokekalapo umbukata mwa batomatoma vinyu; nansha mubukata  mwa badyadyadya mwita: Mwanda ntomi ne ndyanga bakefikija ku bulanda; kadi kukunuka kukavwika muntu bisasa.” Mu Kupituluka 21:20 (BB) namo tutanga’mo pangala pa “ntomboki ne mupupakane” ufwaninwe kwipaibwa mungya Bijila bya Mosesa. Kukwatañana na uno vese, tuto tubidi twa uno ntomboki wampikwa kwisāsa i tuno: i muntu “wa kadyakata ne wa bunkolwankolwa.” I kimweke patōka amba mu Isalela wa kala, mudyopolo wādi umonwa bu kilongwa kibi ku boba basaka kwingidila Leza.

Le mudyopolo mwine i bika, ne i bika binena’po Bisonekwa bya Kingidiki bya Bwine Kidishitu? Wa mudyopolo i “muntu udi nyeke na lwiso ne witobelwe kudya ne kutoma kutondwa mpika.” Nanshi mudyopolo i muswelo umo wa lwiso, kadi Kinenwa kya Leza kitulombola amba “balwiso lubi” kebakapyanapo Bulopwe bwa Leza. (1 Kodinda 6:9, 10, MB; Fidipai 3:18, 19; 1 Petelo 4:3) Ne kadi, mutumibwa Polo pa kudyumuna bene Kidishitu baleke kulongalonga “mīngilo ya ngitu,” wātelele “bunkolwankolwa, ne lupotopoto [“byamunyanji bisuluka ku bukadyakata,” BB], kadi bikwabo byonso bidi namino’bi.” (Ngalatea 5:19-21) Kadyakata divule kendelanga pamo na bunkolwankolwa ne lupotopoto. Ne kadi mudyopolo ubadilwa ne mu byobya bitela Polo bu “bikwabo byonso bidi namino’bi.” Monka mwikadile “mīngilo ya ngitu” mikwabo, ne mwine Kidishitu uyukene bu wa mudyopolo ne ntomboki upela kushinta mwikadilo wandi wa lwiso nandi ufwaninwe kufundulwa mu kipwilo.—1 Kodinda 5:11, 13. *

Nansha Kinenwa kya Leza byokitūla nkolwankolwa mu ludingo lumo na wa mudyopolo, nkolwankolwa ye upēla kuyuka kupita’ko wa mudyopolo. Biyukeno bya nkolwankolwa divule bimwekanga patōka. Ino pa kuyuka amba muntu kampanda wafikila pa bu wa mudyopolo wa endaenda i bikomo mwanda kubwanyapo kumuyukila ku mumwekelo wa panja. O mwanda kutyiba mbila mu uno mwanda kulomba bakulumpe ba pa kipwilo bayuke kutadija senene ne kunañuna.

Kimfwa, bukata bwa kutatuka bukokeja kwikala kayukeno ka mudyopolo, ino ke ponsopo. Muntu ukokeja kububuka pa mwanda wa misongo. Bukata bukwabo bwa kutatuka bukokeja kwikala bwa kisaka nansha bwa kupyana. Tuyukei kadi amba bukata i bwa umbidi bitupu, ino mudyopolo i mwikadila wa ku mutyima. Bukata bwa kutatuka bushintululwa bu “ngikadilo ya umbidi kuyula māni mavule,” ino mudyopolo ao i “lwiso nansha kubulwa kutondwa.” Pa kino, mudyopolo keutadilwangapo ku bukata bwa muntu, mhm, ino i ku muswelo wamona byakudya. Muntu ukokeja kwikala na bukata bwepele, pakwabo mutyetye, ino aye wa mudyopolo. Kadi muswelo umonwa bukata ne kubaya kufwaninwe i mwishile mungya bifuko.

Le i tuyukeno’ka twa kuyukila’po mudyopolo? Muntu wa mudyopolo i muntu wambulwa kwishisa, witumpa mu kudya ku mfulo wakolelwa ne mwa kwikadila biyampe pakwabo wabela’nka ne kubela mwanda wa ludyo. Kubulwa kwibeja ko kulombola amba uno muntu kabangilepo mutonko wabwanya kutukija Yehova ne kufutulwija bantu Bandi. (1 Kodinda 10:31) Ku mutamba mukwabo, muntu udya bininge mu bitatyi bimobimo kakamonwepo kala bu “wa mankomwameso.” (Efisesa 5:5, MB) Inoko, mungya mulangwe udi mu Ngalatea 6:1, uno mwine Kidishitu unenwe kukwashibwa. Polo unena’mba: “Bānwe bāna betu, shi muntu upīle mambo, nankyo bānwe ba mushipiditu mwikale kumwaluja udi namino konka ku mutyima wa kikōkeji.”

Mwanda waka madingi a mu Bible a kwepuka kudya bipitepite adi na mvubu mpata dyalelo? Mwanda Yesu wādyumwine nakampata pa ano mafuku amba: “Mwikale kudyumuka bānwe bene, mwanda wa kunena’mba mityima yenu yakaīle kulemenenwa, ne mu dyopolo, ne bunkolwankolwa, ne byakūmininwa bya buno būmi ino dyodya difuku dikemupulumukila bitupu, enka na lufimbo lwa kwimuponena.” (Luka 21:34, 35) Kwepuka mudilo-mpata i muswelo wa mvubu wa kupela kwikuja mu mwikadila wa umbūmi uleta lufu ku mushipiditu.

Kwīfula mu bintu i ngikadilo miyampe ku bene Kidishitu. (1 Temote 3:2, 11) Bine, Yehova kakabulwepo kukwasha boba bakimba kulonda madingi andi adi mu Bible a kudya pa ndīlo ne kutoma pa ntomeno.—Bahebelu 4:16.

[Kunshi kwa dyani]