Le Tukekala’tu na Mutyima-Ntenke wa Bine?

BANA bakaya bela nsadi na bambutwile bebaswele—i kutupu muntu upelanga kumona kino, mwene i amo? Bana bekalanga na mutyima-ntenke shi badi pamo na bambutwile bebatele mutyima. Ino yō, bankasampe bavule babudilwe byaba bya nsangaji pamo bwa bino. Kudi’nka ne bana bamo bakalakala dyuba dyonso bakimba kwa kulāla bufuku. Le kudi lukulupilo kampanda ku bano bana basasāla ne boba babudilwe mutyima-ntenke?

Nansha byobimweka amba kekudipo kikulupilwa, ino Kinenwa kya Leza kitupa lukulupilo. Mupolofeto Isaya wālaile amba kudi difuku dikekala bantu bonso na mutyima-ntenke. Wāsonekele amba: “Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakōbakapo amba ungi ekalemo, ehe; kadi kebakadimapo amba ungi adyeko, ehe.”—Isaya 65:21, 22.

Ino le luno lukulupilo i lwa bine? Eyo, kishima “lukulupilo” kyonkakyonka divule kekilombolangapo myanda moikalongekela. Kimfwa mu Brezile, bantu bevwananga divule banena’mba: “A esperança é a última que morre.” Pa bute pa bute amba, “Lukulupilo kyo kintu kya mfulo kufwa.” Ko kunena’mba bantu bavule bakulupilanga nyeke nansha popa pampikwa lukulupilo lwa bine. Inoko lukulupilo lwitupa Leza mūmi i lwishile na luno. Mutumibwa Polo wāsonekele amba: “Wakwitabija kudi [Leza] kafwijibwapo bumvu, ehe.” (Loma 10:11) Bupolofeto bwa mu Bible bupwile kala kufikidila bo bwitupa kikulupiji amba ne milao mikwabo yonso ilaile Yehova Leza nayo isa kufikidila. Pakafikidila ino milao, ngikadilo itonona bana balāle ne kuzeuluka mu mashinda ikapwa pwē.

Ino ne dyalelo dine madingi mayampe a mu Bible akwashanga boba bampikwa lukulupilo bekale na būmi bulumbuluke ne na mutyima-ntenke wa bine. Akwashanga namani? Batumoni ba Yehova ba mu kyenu kibundi bakasangela kukukwasha usokole malondololo a kino kipangujo.

[Kapango pa paje 32]

LELO UKETABIJA KUPEMPULWA?

Nansha byotudi mu ino ntanda ya masusu, ukokeja kutana nsangaji itamba ku buyuki bwa binebine butala padi Leza, Bulopwe bwandi, ne mpango yandi milumbuluke itala padi bantu, na kwifunda Bible. Shi usaka kuyuka myanda mivule nansha shi usaka muntu kampanda āye ku yobe njibo kwifunda nobe Bible ku bitupu, nankyo tuma mukanda kudi Batumoni ba Yehova, B.P. 634 Limete, Kinshasa, République démocratique du Congo, nansha ku adelese imo mu alombwelwe pa paje 2.