BIPANGUJO BYA BATANGI

Lelo i biyampe bambutwile bene Kidishitu bashikate pamo na wabo mwana mupangwe ku kupwila kwa pa kipwilo?

▪ Kekudipo bubinga bwa kutela mutyima ku kifuko kya kushikata’po muntu mupangwe mu Njibo ya Bulopwe. Kino Kiteba kya Mulami i kilupulwe mwanda wa kukakankamika bambutwile bene Kidishitu bakwashe ku mushipiditu wabo mwana mupangwe ukidi kwabo kwinjibo, shi bimweka bu byendele’mo kulonga uno muswelo. Enka mokilombwedilwe pa paje 19 ne 20 wa Kiteba kya Mulami kya 15 Kweji 11, 1988 kya Falanse, bambutwile bakokeja’nka ne kwifunda Bible na wabo mwana mutyetye mupangwe ukidi mu yabo njibo. Kudi kikulupiji kya amba, mwana ukakankamikwa ashinte mwiendelejo wandi. *

Pa mwanda utala mpangiko ya kushikatyija bantu ku Njibo ya Bulopwe, i biyampe mwana mutyetye mupangwe ashikate talala pamo na bambutwile bandi. Muntu mupangwe byakanenwepo’nka kushikata kunyuma mu Njibo ya Bulopwe, kekudipo kintu kikukaja shi mwana mupangwe washikata pamo na bambutwile bandi, pa kifuko kyo-kyonso kyobashikete. Bambutwile byobatele wabo mwana mutyima ku mushipiditu, na bubine bakasaka kuyuka shi ulondanga kupwila na katentekeji. Kushikata na wabo mwana pa kyaba kya kumuleka ashikate kungi, kubwanya kukwasha mu uno mwanda.

Ino bikekala namani, shi mwana mupangwe kakidipo ku njibo ya bambutwile bandi? Le kino kilombola amba kakokejapo kushikata na bambutwile bandi? Pa kala, dino dipepala dyālombwele patōkelela ngikadilo ifwaninwe kwikala na mwine Kidishitu pa mwanda utala kupwana na mubutule mupangwe kashikatangapo kwinjibo. * Inoko, kushika kukashikata muntu mupangwe talala pamo na babutule bandi mu kitatyi kya kupwila i kwishile kulampe na kukimba byampikwa kwendela’mo kwikala nandi mu kipwano. Shi bantu ba kikōkeji ba mu kisaka badi ne mumweno muyampe pa mubutule wabo mupangwe, ne baloñanga bukomo bwa kulonda madingi a mu Bisonekwa atala pa kupwana nandi, kekukekalapo bubinga bwa kwibatela mutyima.—1 Kod. 5:11, 13; 2 Yoa. 11.

Ekale shi muntu mupangwe washikata na mubutule nansha na muntu mukwabo mu kipwilo, kekudipo kya kumutela mutyima shi wiendeja biyampe. Kupeleja muntu pa kushikata, kukokeja kuleta makambakano meshileshile kukwatañana na ngikadilo. Shi bonso badi ku kupwila, kubadila’mo ne babutule ba dikōkeji baloñanga bukomo bwa kulonda misoñanya ya mu Bible itala pa mupangwe, ne shi kebikukajapo banabetu, kekudipo kya kuzumbijija mutyima pa mwanda utala pa kushikata boba baile ku kupwila kwa bwine Kidishitu. *

[Kunshi kwa dyani]