Lelo Ufwaninwe Kwikala Muntu Wa Muswelo’ka?

“Lelo kitufwaninwa kwikala muswelo wa bu-bantu ka? wakwikalamo bu-bakola ba bwine-Leza!”​—2 PET. 3:11.

USA KULONDOLOLA NAMANI?

Le ufwaninwe kwikala muntu wa muswelo’ka pa kwitabijibwa na Leza?

Le Satana ongolanga bantu namani?

Le ukalonga bika pa kulama kipwano kyobe na Yehova?

1, 2. ‘Le tufwaninwe kwikala bantu ba muswelo’ka’ pa kwitabijibwa na Leza?

 TUSAKANGA nyeke kuyuka byobya bitulangila bakwetu. Ino byotudi bene Kidishitu, le ketufwaninwepo kuta mutyima ku kuyuka muswelo witulangila Yehova? Ne kadi, i Muntu mukatakata mūlu ne pano panshi kadi aye i “nsulo ya būmi.”​—Mit. 36:9.

² Mutumibwa Petelo pa kwisambila pa ‘muswelo wa bu bantu botufwaninwe kwikala,’ witusoñanya kwikala “bu-bakola ba bwine-Leza.” (Tanga 2 Petelo 3:11.) Pa kusaka kwitabijibwa na Leza, ‘bilongwa ne mwiendelejo’ wetu ufwaninwe kwikala ujila, ko kunena’mba, utōka​—mu mwikadilo, mu ñeni ne ku mushipiditu. Pa kwabo kadi, tusakilwa kulonga bilongwa bya “bu-bakola ba bwine-Leza,” kulēmeka Leza ne kumulamata na dikōkeji. Pa kusaka kwitabijibwa nandi, ketunenwepo’nka kuta mutyima ku mwiendelejo, ino ne ku muntu wetu wa munda. Yehova ‘byatompanga mutyima,’ uyukile shi twi bajila mu mwiendelejo ne shi twi bepāne nansha kubulwa kwipāna bya binebine kwadi.​—1 Bil. 29:17.

3. Le i bipangujo’ka byotufwaninwe kubandaula pa mwanda utala kipwano kyetu na Leza?

³ Satana Dyabola kasakangapo twitabijibwe na Leza. Ino, uloñanga bine bukomo bwandi bonso mwanda wa tutyibe kipwano kyotupwene na Yehova. Satana keshisangapo kwingidija bubela ne bunwanwa mwanda wa kwitongola ne kwitupalula kudi Leza otutōta. (Yoa. 8:44; 2 Kod. 11:13-15) O mwanda i biyampe twiipangule amba: ‘Lelo Satana ongolanga bantu namani? Le i bika byombwanya kulonga pa kulama kipwano kyami na Yehova?’

 LELO SATANA ONGOLANGA BANTU NAMANI?

4. Le Satana wingidijanga bika mu bukomo bwalonga bwa kona kipwano kyetu na Leza, ne mwanda waka?

⁴ Mwanā bwanga Yakoba wāsonekele amba: “Bantu bonso, wa pandi, wa pandi, batompibwanga, pa kukokwa na kilokoloko kyāye mwine, waongolwa. Ebiya kilokoloko pa kwimita kibutula bubi, ino bubi nabo pa kutama bwabutula lufu.” (Yak. 1:14, 15) Mu bukomo bwalonga bwa kona kipwano kyetu na Leza, Satana wingidijanga nsulo ya bilokoloko byetu​—ke mutyima wetu kadi.

5, 6. (a) Le Satana wingidijanga bika pa kwitongola? (b) Le i makinga’ka engidijanga Satana mwanda wa kona bisakasaka mutyima wetu, ne udi na bwino’ka mu kwingidija’o?

⁵ Le Satana wingidijanga mutyima wetu bu kyambo kyandi muswelo’ka? Bible unena amba, “panopantanda ponsololo pēne palēle mudi yewa umbi.” (1 Yoa. 5:19) Mu bya bulwi bya Satana mubadilwa ne “byapanopantanda.” (Tanga 1 Yoano 2:15, 16.) Mu bula bwa tununu twa myaka, Dyabola i mone bintu bitujokolokele. Byotukidi mu ino ntanda, tufwaninwe kwilama ku manwa andi a budyumuku.​—Yoa. 17:15.

⁶ Satana wingidijanga manwa mwanda wa kona kusakasaka kwa mutyima. Mutumibwa Yoano utela makinga asatu engidijanga Satana: (1) “kilokoloko kya ngitu,” (2) “kilokoloko kya meso,” ne (3) “ntumbo ya kwitatula ya būmi.” Satana wēbingidije pa kutompa Yesu mu ntanda mutuputupu. Byaāingidije ano makinga mu bula bwa myaka, Satana wiengidijanga dyalelo biyampe, wiashinta kukwatañana na bintu bilēmenene’ko muntu ne muntu . Kumeso kwa kubandaula bintu byotubwanya kulonga pa kwikinga, tutalei bidi muswelo wābwenye Satana kwingidija makinga amo mwanda wa kongola Eva, ino wākomenwa kongola nao Mwanā Leza.

“KILOKOLOKO KYA NGITU”

7. Le Satana wāingidije “kilokoloko kya ngitu” namani pa kutompa Eva?

⁷ Bantu bonso basakilwa kudya bidibwa pa kwikala na bukomo bwa ngitu. Umpangi wāpangile ntanda mwanda wa imene bidibwa bilumbuluke. Satana ubwanya kulonga bukomo bwa kwingidija kilokoloko kya kipangila kya kusaka kudya bidibwa mwanda wa kwitubombola tuleke kulonga kiswa-mutyima kya Leza. Tutalei mwaāingidije’kyo kudi Eva. (Tanga Ngalwilo 3:1-6.) Satana wālombwele Eva amba, ubwanya kudya kipa kya “mutyi wakuyukanya buya ne bubi” ne kufwa mpika, na kunena’mba difuku dyokadya’ko ukekala bwa Leza. (Ngal. 2:9) Mu uno muswelo Dyabola wātopekele Eva amba kasakilwapo kukōkela Leza pa kwikala mūmi. Buno shabo i bubela bwa bumvu! Uno mulangwe powātamine mu ñeni ya Eva, wāikele na bintu bibidi bya kutonga’po kimo: Wādi ukokeja kupela uno mulangwe, nansha kwiwitabija,  ne kuleka kwabila kwandi kwa kino kipa kutame. Nansha byaādi na mityi mikwabo yonso mu budimi, wātongele kwitabija byānene Satana pa mutyi wādi mu bukata bwa budimi, ebiya “waapako bipa byao ne kudya wadya.” Mu uno muswelo, Satana wātamije mwadi mutyima wa kwabila kintu kyādi kijidikilwe na Umpangi wandi.

8. Le i muswelo’ka wālongele Satana bukomo bwa kukoka Yesu na kwingidija “kilokoloko kya ngitu,” ne mwanda waka kamubwenyepo na dino ditompo?

⁸ Satana wāingidije bunwa bumo bonka kitatyi kyaātompele Yesu mu ntanda mutuputupu. Yesu pa kupwa kushikilwa na nzala mafuku 40 mwinya ne bufuku, Satana wāingidije kusakasaka kwa Yesu kwa kukimba kudya bidibwa. Satana wāmunene amba: “Shi wi Mwana Leza abewa, nankyo unene dibwe dino dyalamuke ke bibibwa.” (Luka 4:1-3) Yesu wādi na bintu bibidi bya kutonga’po kimo: Wādi ubwanya kutonga kuleka kwingidija bukomo bwandi bwa kulonga bingelengele mwanda wa kuvuija kisakibwa kyandi kya kudya bidibwa, nansha kutonga kwibwingidija. Yesu wādi uyukile amba kafwaninwepo kwingidija buno bukomo mwanda wa bitungo bya kwisakila. Nansha byaādi na nzala, katangidijepo kumeso kupwa nzala yandi pa kyaba kya kulama kipwano kyandi na Yehova. Yesu wālondolwele amba: “Kilembelwe’mba: Mu bidibwa byonka muntu kamwenamopo būmi, poso ku myanda yonsololo ya kunena Leza.”​—Luka 4:4.

“KILOKOLOKO KYA MESO”

9. Le muneneno wa amba, “kilokoloko kya meso” ulombola bika, ne Satana wāingidije kino kilokoloko namani padi Eva?

⁹ Kadi Yoano wātelele “kilokoloko kya meso” bu dikinga. Uno muneneno ulombola amba muntu ubwanya kushilula kwabila kintu na kwela’ko’tu diso. Mu mwanda wa Eva, Satana wāingidije kino kilokoloko na kunena amba: “Meso akemuputuka.” Eva pa kubambila’ko meso, kipa kijidikwe nakyo kyamukoka. Eva wāmwene amba uno mutyi “wadi wa buya bwa dyangi kutalako.”

10. Le i muswelo’ka wāingidije Satana “kilokoloko kya meso” mwanda wa kutompa Yesu, ne Yesu walondolwele namani?

¹⁰ Le tunena bika pa mwanda wa Yesu nao? Satana “wamulombwele [Yesu] malopwe onsololo a panopanshi kwa kakitatyi katyetye. Kadi kwivwana kudi dyabola’mba: Nkakupa lupusa lwa byobya byonso ne ntumbo yabyo.” (Luka 4:5, 6) Yesu kādipo wakumona na meso andi ano malopwe enka penepa, Ino Satana wālangile amba ntumbo ya ano malopwe, na moalombwedilwe mu kimonwa, akakoka Yesu. Satana wānene ne bumvu mpika amba: “Shi umfukatyile kuntōta, nakyo byonso bikēkalanga byobe.” (Luka 4:7) Yesu kāsakilepo nansha dimo kwikala muswelo wa bu muntu bwādi bumusakila Satana ekale. Wālondolwele kiponka na ponka. Wānene amba: “Kyasonekwa’mba: Ukafukatyila  kutōta Yehova Leza obe, ye enka okēngidila mīngilo.”​—Luka 4:8.

“NTUMBO YA KWITATULA YA BŪMI”

11. Le Eva wāongwelwe na Satana namani?

¹¹ Yoano pa kutela bintu bya ntanda, wātelele ne “ntumbo ya kwitatula ya būmi.” Kitatyi kyādi ba Adama ne Eva bunka bwabo pano pa ntanda, na bubine kebādipo babwanya ‘kwitatwila ntumbo ya būmi bwabo’ ku bantu bakwabo. Inoko balombwele mitatulo. Satana pa kutompa Eva, wātopekele Leza amba i mumufye kintu kya kutendelwa. Dyabola wālombwele Eva amba, difuku dyokadya “ku mutyi wakuyukanya buya ne bubi,” ‘ukekala bwa Leza, kuyuka biya ne bibi.’ (Ngal. 2:17; 3:5) Mu uno muswelo, Satana wānenenene’tu amba Eva wādi wa kwiludika aye mwine pa kyaba kya kuludikwa na Yehova. Mobimwekela, mitatulo yāmulengeje etabije buno bubela. Wādile kipa kijidikwe na kikulupiji kya amba kakafupo. Bine, weongwele!

12. Le i muswelo’ka mukwabo wātompelwe Yesu na Satana, ne Yesu wālongele’po namani?

¹² Kwishila na Eva, Yesu i mushiye kimfwa kya kutendelwa kya kwityepeja! Satana walongele bukomo bwa kumutompa mu muswelo mukwabo, Ino Yesu wapela’nka ne mulangwe wa kulonga kintu kitulumukwa kya kutula Leza pa ditompo. Bine kino kyādi kya kwikala kilongwa kya mitatulo! Inoko, malondololo a Yesu ādi padi tō kadi a kiponka na ponka amba: “Kyanenwe’mba: Kokatompa Yehova Leza obe.”​—Tanga Luka 4:9-12.

LE I MUSWELO’KA OTUBWANYA KULAMA KIPWANO KYETU NA YEHOVA?

13, 14. Shintulula muswelo wingidijanga Satana makinga amo dyalelo.

¹³ Dyalelo, Satana wingidijanga makinga amo onka na aāingidije padi Eva ne Yesu. Pa kukoka “kilokoloko kya ngitu,” Dyabola wingidijanga yandi ntanda mwanda wa kusonshila busekese, mudilo-mpata ne mutomeno-mpata. Kupityila ku bifwatulo bya bantu badi mutaka, nakampata bidi pa Entelenete, ubwanya kukoka milangwe ya bantu bampikwa kuyuka bebitala ne kwingidija “kilokoloko kya meso.” Kadi boba bakwitatula ne ba ‘kwitatwila ntumbo ya būmi bwabo’ baponenanga mu ditompo dya kuswa bya bupeta, lupusa ne ntumbo!

¹⁴ ‘Bintu bya ntanda’ bidi pamo bwa kyambo kya kiluwe. Kikokanga, ino kyombo ne kyambo kituñwanga ku bulobo. Satana waingidijanga bintu bibwanya kumona bantu bu byobasakilwa difuku ne difuku, mwanda wa balonge bintu bijilula bijila bya  Leza. Ino ano matompo a bunwanwa, adi’ko mwanda wa kona kusakasaka kwetu ne mutyima wetu. Bine, i matompo a kwitukulupija’mba kuvuija bisakibwa byetu ne kuta mutyima ku būmi bwetu bidi pa kifuko kibajinji kutabuka kulonga kiswa-mutyima kya Leza. Le tukapya mu ano makinga?

15. Le i muswelo’ka otukokeja kwiula Yesu pa kukomena matompo a Satana?

¹⁵ Nansha matompo a Satana byoānekenye Eva, ino Yesu aye weākomene. Kyaba kyonso, wādi ulondolola na Kisonekwa amba: “Kilembelwe’mba” nansha’mba, “kyanenwe’mba.” Shi twifunda Bible na kininga, tukayuka Bisonekwa biyampe kadi tukabwanya kuvuluka mavese mu ñeni abwanya kwitukwasha twikale nyeke na milangwe myoloke kitatyi kyotutanwa na matompo. (Mit. 1:1, 2) Kuvuluka bimfwa bya mu Bisonekwa bya bantu ba kikōkeji bādi na dikōkeji kudi Leza kuketukwasha twibeule. (Loma 15:4) Kulēmeka Yehova bya binebine, kusanswa byobya byasenswe ne kushikwa byashikilwe kuketulama.​—Mit. 97:10.

16, 17. Le ‘bukomo bwetu bwa kulanga’ bukokeja kwika na lupusa’ka pa muswelo wa bu-muntu bwetu?

¹⁶ Mutumibwa Polo witukankamika twingidije ‘bukomo bwetu bwa kulanga’ mwa kwikadila bantu babumbwe na milangwe ya Leza, ke na ya ino ntandapo. (Loma 12:1, 2) Polo pa kulombola kamweno kadi mu kubandaula byotulanga, wānene amba: “Tuvutakanyanga byonso bimikwamba bizunzwile pa buyuki bwa Leza. Kadi tukwatanga milangwe yonso bu-misungi amba ikōkele Kidishitu.” (2 Kod. 10:5, DD) Milangwe yetu idi na lupusa lukatampe pa bu-muntu bwetu, o mwanda tufwaninwe ‘kufwatakanya’ bintu byubaka.​—Fid. 4:8.

¹⁷ Ketubwanyapo kwikala bajila shi tutamija milangwe ne bilokoloko byampikwa kwendela’mo. Tufwaninwe kusanswa Yehova na “mutyima wa mundamunda mulumbuluke.” (1 Tem. 1:5) Inoko, mutyima i ndimbañani kadi ketubwanyapo kujingulula muswelo ubwanya kwikala “byapanopantanda” na lupusa potudi. (Yel. 17:9) Penepa, tubulwe’po ‘kwibandaula batwe bene, shi tudi monka mu lwitabijo; ne kwitompa batwe bene’ na kwibandaula pampikwa budimbidimbi kupityila ku byobya byotwifunda mu Bible?​—2 Kod. 13:5.

18, 19. Mwanda waka tufwaninwe kusumininwa kwikala bu bantu musakila Yehova twikale?

¹⁸ Kintu kikwabo kitukwasha tukomene “byapanopantanda” i kulama mu ñeni binenwa bya Yoano bya ku bukomo bwa mushipiditu bya amba: “Panopantanda papitanga, ne kilokoloko kyapo kīne kumo; nanshi yewa ulonga kiswa-mutyima wa Leza aye wikele nyeke.” (1 Yoa. 2:17) Ngikadilo ya bintu ya Satana imwekanga bu i ya nyeke. Inoko, isa kufula difuku dimo. Kekudipo kintu nansha kimo kileta ntanda ya Satana kikekala’ko nyeke. Kuvuluka uno mwanda kuketukwasha tuleke kongolwa na makinga a Dyabola.

¹⁹ Mutumibwa Petelo witusoñanya twikale bantu betabijibwe na Leza pano ‘potutengele ne kusakidila byamalwa kwiya kwa difuku dya Leza, kwine kukasungulukila madiulu pa kutema’o mudilo, ne byamūlu bīne bikasunguluka ku kyanga kikatampe.’ (2 Pet. 3:12) Panopano ponka, dino difuku disa kufika, kadi Yehova usa konakanya ntanda yonso ya Satana. Pano’ko bidi, Satana ukendelela kwingidija “byapanopantanda” mwanda wa kwitutompa, na mwaātompele Eva ne Yesu. Ketufwaninwepo kwikala pamo bwa Eva ne kukimba kupwa bilokoloko byetu. Kulonga namino kudi pamo bwa kwitabija Satana bu leza wetu. Tufwaninwe kwikala pamo bwa Yesu ne kukomena ano makinga, nansha shi wianeñenya namani. Nanshi batwe bonso tusumininwei kwikala bu bantu musakila Yehova twikale.

[Bipangujo bya Kifundwa]

[Kifwatulo pa paje 23]

[Kifwatulo pa paje 24]

“Kilokoloko kya ngitu” kyāponeje Eva (Tala musango 7)

[Kifwatulo pa paje 25]

Yesu kālekepo kintu nansha kimo kimupuakanye (Tala musango 8)

[Bifwatulo pa paje 26]

Le i misoñanya’ka ya mu Bisonekwa yofwaninwe kuvuluka shi udi mu ino ngikadilo? (Tala musango 13, 14)