BIPANGUJO BYA BATANGI

Mwanda waka Yesu wādidile kumeso kwa lusangukilo lwa Lazalasa, na mokilombwedilwe mu Yoano 11:35?

▪ Kitatyi kifwa muntu otusenswe, tudilanga mwanda ketukimumonepo dikwabo. Nansha Yesu byaādi usenswe Lazalasa, kādidilepo mwanda wa Lazalasa wāfwile. Wādidile pa mwanda wa lusa lwaāivwanine bantu bādi bafwidilwe monka mokilombwedilwe na myanda idi kūlu ne kunshi kwa nsekununi ya Yoano.​—Yoa. 11:36.

Kitatyi kyāivwene Yesu amba Lazalasa wabela, kaendelepo bukidibukidi kukamubelula. Nsekununi inena amba: “Ebiya [Yesu] byāivwene nabya’mba, [Lazalasa] ubela; kaikele pamo ponka washikilwapo mafuku abidi.” (Yoa. 11:6) Mwanda waka Yesu wāijije? Wādi na kitungo kampanda pa kulonga namino. Wānene amba: “Luno luba kelwalufupo, mhm, nanshi i lwa ntumbo ya Leza’mba, Mwana Leza atumbijibwe ntumbo ponka.” (Yoa. 11:4) Lufu kelwādipo bu ‘kitungo,’ nansha bu mfulo ya misongo ya Lazalasa. Yesu wādi na mulangwe wa kwingidija lufu lwa Lazalasa mwanda wa “ntumbo ya Leza.” Muswelo’ka? Yesu wādi usaka kulonga kingelengele kitulumukwa na kusangula mulunda nandi muswe mu kibundu.

Mu mīsambo yāesambile na bandi bana babwanga mu kino kitatyi, Yesu wādingakenye lufu na tulo. O mwanda wēbasapwidile amba, “ke ñenda konka nkamulangule [Lazalasa].” (Yoa. 11:11) Kudi Yesu, kusangula Lazalasa mu lufu kwādi pamo bwa mbutwile ulangula mwana ukōkolokwa mu tulo. O mwanda ke kwādipo bubinga bwa kujingilwa mutyima pa mwanda wa lufu lwa Lazalasa.

Penepo, le i bika byālengeje Yesu adile? Kadi, binenwa bidi kulu ne kunshi bileta malondololo. Kitatyi kyētene Yesu na Madia kakwa Lazalasa ne kumona aye ne bantu bakwabo badila, “bulobo bwamukwata, ku mutyima ke kudi fututu.” Yesu pa kumona njia yabo ku mutyima kwa musansa wafula’nka ne ku ‘kufitwa ku mutyima fututu.’ Uno o mwanda mwine ‘wasumije Yesu impolo.’ Yesu wāivwene bulanda bukatampe pa kumona balunda nandi basenswe batengwe na njia.​—Yoa. 11:33, 35.

Ino nsekununi ilombola amba, Yesu udi na bukomo bwa kwalwija baswe betu būmi ne bukomo bwa ngitu mu ntanda mipya īya’ko. Kadi itulombola amba Yesu wivwananga misanshi imo yonka na ya boba bajimija baswe babo mu lufu lwāpyenwe kudi Adama. Ñeni mikwabo yotubwanya kuboila ku ino nsekununi i ya amba, tufwaninwe kwivwanina lusa boba badi na njia ya baswe babo bafwile.

Yesu wādi uyukile amba wādi wa kukasangula Lazalasa. Ino, wādidile mwanda wa buswe bukatampe bwaādi uswele balunda nandi ne lusa lwaēbevwanine. Mu muswelo umo onka, lusa lwetu nalo lubwanya kwitutonona ‘tudile na boba badila.’ (Loma 12:15) Kulombola njia ya uno muswelo kekulombolapo amba muntu wabulwe lwitabijo mu lukulupilo lwa lusangukilo. Nanshi, kyādi kyendele’mo Yesu etushile kimfwa kya kulombola lusa ku boba bafwidilwe na kudila bya binebine nansha byaādi wa kusangula Lazalasa.

[Kifwatulo pa paje 32]