Kōkelai Bakumbi Ba Yehova

“Kōkelai boba bemulelele, ne kwibakōkelelela; ke-bantu abo batengele ponka pa mityima yenu.”​—BAH. 13:17.

USA KULONDOLOLA NAMANI?

Le bakulumpe ba kipwilo bakumbanga mikōko ya Leza namani?

Mwanda waka mikōko ifwaninwe kwivwana bakumbi batyebatye?

Mwanda waka kutupatupa kwa bakumbi batyebatye ke bubingapo bwa kulekela kwivwana madingi abo a mu Bisonekwa?

1, 2. Mwanda waka kwidingakanya kwidingakenye Yehova na mukumbi kudi na mvubu?

 YEHOVA widingakenye aye mwine na mukumbi. (Ezek. 34:11-14) Kino kidi na mvubu mwanda kitukwashanga tuyuke mwikadile Yehova. Mukumbi wa banyama wa buswe wingilanga bininge mwanda wa kupandija ne kwikadija biyampe luombe lwa mikōko yamunine. Wiitwala ku madyo ne ku masulo a mema (Mit. 23:1, 2); wiikengelela dyuba ne bufuku (Luka 2:8); wiikinga ku banyema babudyani (1 Sam. 17: 34, 35); ukwatakanya twana (Is. 40:11); ukimba mikōko mijimine ne kuta mutyima yoya idi na bilonda.​—Ezek. 34:16.

² Bantu ba Yehova ba mu bitatyi bya kala byobādi babiluwe ne babidimye, bāpelelwe kwivwanija kwidingakanya kwidingakenye Yehova Leza na mukumbi muyampe. Bādi bayukile amba mikōko isakilwa kukwatakanibwa ne kutebwa mutyima mwa kutamina’yo biyampe. Ne ku mushipiditu nako, bantu basakilwa kutebwa mutyima. (Mako 6:34) Kwampikwa kukwatakanibwa ne kwendejibwa biyampe ku mushipiditu, bantu basusukanga. Bakomenwa kuyuka biyampe ne bibi​—pamo bwa “mikōko ya mpikwa mukumbi” isalankene. (1 Bal. 22:17) Inoko, Yehova uvuijanga bisakibwa bya bantu bandi na buswe.

3. Le i bika byotusa kwisambila’po mu kino kishinte?

³ Kwidingakanya kwidingakenye Yehova na mukumbi kudi na mvubu ne dyalelo. Kadi Yehova ukivuijanga bisakibwa bya bantu bandi badi pamo bwa mikōko. Tutalei bidi muswelo waendeja mikōko yandi ne kuvuija bisakibwa byayo dyalelo. Kadi tusa kwisambila pa bifwaninwe kulonga mikōko pa kusaka Yehova eite mutyima na buswe.

MUKUMBI MUYAMPE UTOÑANGA BAKUMBI BATYEBATYE

4. Le Yesu wingilanga mwingilo’ka pa kuvuija bisakibwa bya mikōko ya Yehova?

⁴ Yehova wātongele Yesu bu Mutwe wa kipwilo kya  bwine Kidishitu. (Ef. 1:22, 23) Byadi “mukumbi muyampe,” Yesu umwekejanga, mpango ne ngikadilo ya Shandi. Yesu ‘waelēle’nka ne mikōko muya wandi.’ (Yoa. 10:11, 15) Bine, kitapwa kya kikūlwa kya Kidishitu i dyese ku muzo wa muntu! (Mat. 20:28) Na bubine, mpango ya Yehova i ya amba “bonso bakumwitabija [Yesu] nankyo kebakonekapo, ehe, poso batambule būmi bwa kulādila monka nyeke ne nyeke”!​—Yoa. 3:16.

5, 6. (a) Lelo Yesu i mutonge bāni bakulela mikōko yandi, ne mikōko ifwaninwe kulonga bika pa kumwena mu ino mpangiko? (b) Le i bubinga’ka bubajinji botufwaninwe kukōkelela bakulumpe mu kipwilo?

⁵ Le mikōko ilombolanga namani amba Yesu Kidishitu i Mukumbi Muyampe? Yesu wānene amba, “mikōko yami īngivwananga diwi dyami, nami neīyūkile ne kulonda īnonda.” (Yoa. 10:27) Kwivwana buludiki bwa Mukumbi Muyampe kushintulula kulonda buludiki bwandi mu bintu byonso. Mubadilwa ne kwingidila pamo na bakumbi batyebatye ba ku mushipiditu batongele. Yesu wālombwele amba batumibwa ne bandi bana babwanga bādi banenwe kwendeleja mwingilo wandi. Bādi banenwe ‘kufundija’ ne ‘kudisha mikōko ya Yesu.’ (Mat. 28:20; tanga Yoano 21:15-17.) Kitatyi kyādi kyenda kisambakana myanda miyampe ne bana babwanga belundila’ko, Yesu wātūdile’ko bene Kidishitu batame ku mushipiditu ba kukumba kipwilo.​—Ef. 4:11, 12.

⁶ Mutumibwa Polo pa kwisambila pa batadi ba kipwilo kibajinji kya mu Efisesa, wālombwele patōkelela’mba mushipiditu sandu wēbatongele bu batadi “[bakudisha] kipwilo kya Leza.” (Bil. 20:28) Mo monka ne batadi bene Kidishitu dyalelo, nabo batoñwanga kukwatañana na misoñanya ya mu Bisonekwa bya ku bukomo bwa mushipiditu sandu. Nanshi, kukōkela batadi bene Kidishitu i kulombola bulēme botulēmekele Yehova ne Yesu, bakumbi babidi bakatampe. (Luka 10:16) Na bubine, buno i bubinga bwinebwine bwa kukōkelela bakulumpe. Inoko, kudi bubinga bukwabo botufwaninwe kulondela bulombodi bwabo bwa tunangu.

7. Le bakulumpe bakukwashanga namani wikale nyeke mu kipwano kilumbuluke na Yehova?

⁷ Pa kupa banababo mu lwitabija buludiki, bakulumpe bebakankamikanga ne kwibapa madingi emanine pa Bisonekwa nansha pa misoñanya ya mu Bisonekwa. Kitungo kyabo po bapāna buno bulombodi ke kya kulombolapo banababo mobafwaninwe kwikadila mu būmi. (2 Kod. 1:24) Ino, i kya kupa banababo bene Kidishitu bulombodi bwa mu Bisonekwa mwanda wa bakwate butyibi buyampe ne kutuntwila ku ndudi ne ndoe mu kipwilo. (1 Kod. 14:33, 40) Bakulumpe “batengele ponka pa mityima” mu buluji bwa amba, basakanga kukwasha muntu ne muntu mu kipwilo ekale nyeke mu kipwano kiyampe na Yehova. Mu uno muswelo, bakapelakana kuleta bukwashi kitatyi kyobamona amba tutu nansha kaka washilula nansha ke mupwe kala ‘kupya mambo.’ (Ngat. 6:1, 2; Yude 22) Lelo buno ke bubingapo bwinebwine bwa ‘kukōkelela boba bemulelele’?​—Tanga Bahebelu 13:17.

8. Le bakulumpe balwilanga luombe lwa Leza namani?

⁸ Mutumibwa Polo, mukumbi wa ku mushipiditu, wāsonekēle banababo ba mu Kolose amba: “Dyumukai kadi, mwanda wa kunena’mba wakemukwata bu-misungi ku byamanwa byandi, ne kyongo kyampikwa kwendelamo, monka mwikadile bisela bya bantu, ne bya bunkasampe bya panopantanda, kemwikadilepo bya Kidishitu nabya, mhm.” (Kol. 2:8) Kino kidyumu kilombola bubinga bukwabo botufwaninwe kutela mutyima ku madingi a mu Bisonekwa etudingila bakulumpe. Balwilanga luombe  na kudyumuna banababo bate mutyima ku kintu kyo-kyonso kibwanya kona lwitabijo lwabo. Mutumibwa Petelo wādyumwine pa mwanda utala “bapolofeto ba bubela” ne “bafundiji ba bubela” bādi bakulonga bukomo bwa ‘kongola mityima yampikwa kuninga’ ilonge bibi. (2 Pet. 2:1, 14) Bakulumpe ba mu ano etu mafuku nabo, bafwaninwe kuleta bidyumu bya uno muswelo shi bilomba kwibileta. Byobadi bana-balume bene Kidishitu batame ku mushipiditu, ke bemwene bivule mu būmi. Kadi, balombwele kumeso kwa kutongwa amba bevwanije Bisonekwa biyampe ne amba i babwanye bisakibwa bya kufundija bintu bya kamweno. (1 Tem. 3:2; Tet. 1:9) Bukomo bwabo bwa ku mushipiditu, bujalale ne tunangu twa mu Bible tobadi nato bibakwashanga bape luombe buludiki na bwino.

MUKUMBI MUYAMPE UDISHANGA NE KUKINGA MIKŌKO

9. Le Yesu uludikanga ne kudisha kipwilo kya bwine Kidishitu namani dyalelo?

⁹ Kupityila ku bulongolodi bwandi, Yehova upanga banabetu kujokoloka ntanda yonso bidibwa bya ku mushipiditu. Madingi mavule a mu Bisonekwa aletwanga kupityila ku mabuku etu. Kadi, kyaba kimo bulongolodi bupanga bakulumpe ba pa kipwilo bulombodi, kupityila ku mikanda nansha ku bulombodi buletwa na batadi bendakana. Mu uno muswelo, mikōko ipebwanga bulombodi bupotoloke.

10. Le mukumbi wa ku mushipiditu udi na kiselwa’ka mu mwanda utala boba bapaluka mu luombe?

¹⁰ Batadi badi na kiselwa kya ku mushipiditu kya kukinga, kudisha ne kuta  mutyima ku būmi bwa bantu ba mu kipwilo, nakampata boba besanshije abo bene nansha boba babela ku mushipiditu. (Tanga Yakoba 5:14, 15.) Bantu bamo mu bano bakokeja kupaluka mu luombe ne kuleka’byo kwingila mingilo ya bwine Kidishitu. Shi bidi uno muswelo, le mukulumpe wa kilelo abulwe’po kulonga bukomo bwa kukimba mukōko ne mukōko mujimine ne kwiukumba ujokele mu kipombo, ko-kunena’mba mu kipwilo? Bine ukalonga uno muswelo! Yesu wānene amba, “Shenu udi mūlu [kaswile’mba] kamo ka totwa tutyetye kakoneke.”​—Mat. 18:12-14.

LE TUFWANINWE KUMONA KUTUPATUPA KWA BAKUMBI BATYEBATYE NAMANI?

11. Mwanda waka bamo babwanya kukomenwa kulonda buludiki bwa bakulumpe?

¹¹ Yehova ne Yesu i bakumbi babwaninine. Bakumbi batyebatye ba bantu bobapele kulela kipwilo i bantu bakubulwa kubwaninina. Kino kikokeja kulengeja bamo bakomenwe kulonda buludiki bwa bakulumpe. Bano bantu babwanya kulonga amba: ‘Bakulumpe i bantu bakubulwa kubwaninina pamo bwa batwe. Le i kika kyotufwaninwe kutejeja madingi abo?’ Na bubine, bakulumpe i bampikwa kubwaninina. Inoko, tufwaninwe kwikala na mumweno muyampe pa kutupatupa ne bukōkekōke bwabo.

12, 13. (a) Le i bika byotukokeja kunena pa bilubo bya bantu bamo bapelwe biselwa na Yehova? (b) Mwanda waka kutupatupa kwa bantu bāpelwe biselwa i kusonekwe mu Bible?

¹² Bisonekwa bisambila patōkelela pa bilubo bya boba bāingidije Yehova pa kala mwanda wa kuludika bantu bandi. Kimfwa, Davida wāshingilwe māni bu mulopwe ne mwendeji wa Isalela. Inoko, wātompelwe ne kupya mambo a makoji ne butapani. (2 Sam. 12:7-9) Kadi langulukila ne pa kimfwa kya mutumibwa Petelo. Nansha byaāpelwe kiselwa kikatampe mu kipwilo kya bwine Kidishitu kya mu myaka katwa kabajinji, wālongele bilubo bikatampe. (Mat. 16:18, 19; Yoa. 13:38; 18:27; Ngat. 2:11-14) Tamba pa Adama ne Eva, kekudipo muntu mubwaninine poso’nka Yesu.

¹³ Mwanda waka Yehova wānene balembi ba Bible basoneke nsekununi ya kutupatupa kwa bantu baāpele mingilo? Kutentekela pa bubinga bukwabo, Leza wālombwele amba ukokeja kuludika bantu bakubulwa kubwaninina baludike bantu bandi. Na bubine, uloñanga nyeke uno muswelo. Nanshi, ketufwaninwepo kwiuningila boba betwendeja dyalelo nansha kupela lupusa lwabo mwanda wa kubulwa kubwaninina kwabo. Yehova usakanga tulēmeke bano batutu ne kwibakōkela.​—Tanga Divilu 16:2, 8.

14, 15. Le i ñeni’ka yotubwanya kuboila ku muswelo wādi wisamba Yehova na bantu bandi ba pa kala?

¹⁴ Kukōkela boba betwendeja dyalelo kudi na kamweno. Langulukila bidi pa muswelo wādi wisamba Yehova na bantu bandi mu bitatyi bibi bya pa kala. Kitatyi kyātambile bantu ba Isalela mu Edipito wa kala, Leza wēbapele misoñanya kupityila kudi ba Mosesa ne Alone. Pa kupanda ku mpupo dikumi, bene Isalela bādi banenwe kukōkela ku bulombodi bwa kwikala na bidibwa bya pa bula ne kushinga mashi a mukōko ku ñunji ne pa bibelo bya mobo abo. Buno bulombodi kebwādipo bwibapebwa kupityila ku diwi ditamba momwa mūlu. Ino bādi bateja banunu bana-balume ba Isalela, bādi nabo batambula bulombodi bupotoloke kudi Mosesa. (Div. 12:1-7, 21-23, 29) Mu bino bitatyi, Mosesa ne banunu bana-balume bālongele bintu pamo bwa basedi ba bulombodi bwa Yehova ku bantu bandi. Bakulumpe bene Kidishitu bavuijanga mwingilo umo onka wa kamweno dyalelo.

¹⁵ Nobe ubwanya kuvuluka bitatyi bikwabo bivule mu mānga ya mu Bible, byāletele Yehova bulombodi bupandija būmi kupityila ku bantu ne ku bamwikeulu. Mu  bino bitatyi byonso, Leza wāmwene amba i biyampe kupāna lupusa. Mikendi yādi isamba mu dijina dyandi ne kusapwila bantu bandi byobādi bafwaninwe kulonga pa kupanda ku kyamalwa. Le tutunye’po kulanga’mba Yehova ukalonga kintu pamo bwa kino pa Amakedona? Na bubine, bakulumpe bonso badi na biselwa dyalelo bya kwimanina Yehova nansha bulongolodi bwandi, bafwaninwe kuta mutyima ku kuleka kwingidija bibi lupusa lwibapelwe.

‘LUOMBE LUMO, MUKUMBI NANDI UMO’

16. Le i ‘kinenwa’ka’ kyotufwaninwe kwivwana na katentekeji?

¹⁶ Bantu ba Yehova babundile “luombe lumo” luludikwa na ‘mukumbi umo,’ Yesu Kidishitu. (Yoa. 10:16) Yesu wālombwele’mba ukekala na bandi bana babwanga “ne kumfulo kwine kwa panopantanda.” (Mat. 28:20) Byadi Mulopwe momwa mūlu, uyukile biyampe bintu bisa kulongeka kumeso kwa ntanda ya Satana konakanibwa. Pa kwikala nyeke umbumo ne mutyima-ntenke mu luombe lwa Leza, tufwaninwe kwivwana “kinenwa kunyuma” kitulombola dishinda dya kwenda. Mu kino “kinenwa” mubadilwa byobya binena mushipiditu sandu kupityila ku Bible ne byobya binena Yehova ne Yesu kupityila ku babo bobatongele bu bakumbi batyebatye.​—Tanga Isaya 30:21; Kusokwelwa 3:22.

17, 18. (a) Le luombe ludi mu kyaka’ka, ino le i bika byotukokeja kukulupila? (b) Le i bika byotukabandaula mu kishinte kilonda’ko?

¹⁷ Bible unena’mba Satana unangakananga “bwa ntambo ubuluma, ukimba wakubokota.” (1 Pet. 5:8) Pamo bwa nyema wa ntanda kadi wa budyani mukalabale, ubenzanga luombe, koku utengele mukenga wa kutamba boba bakōkekōke ne bapaluka. Buno bo bubinga bwinebwine botufwaninwe kushadila pabwipi na luombe ne na “mukumbi, Mukulumpe wa kilelo kya mityima [yetu].” (1 Pet. 2:25) Kusokwelwa 7:17 wisambila pa boba bakapanda ku malwa makatakata amba: “Kāna-ka-mukōko [Yesu] . . . ukēkalanga mukumbi wabo, wakwibalombola ku nsulo ya mema a būmi; kadi Leza nandi ukebapampula impolo yonsololo ku meso abo.” Lelo uno kemulaopo mulumbuluke?

¹⁸ Byotwapwa kubandaula mwingilo wa mvubu, wingila bakulumpe bene Kidishitu bu bakumbi batyebatye ba ku mushipiditu, i biyampe twiipangule’mba, lelo bano bana-balume batongwe bakayuka namani’mba bekele na mikōko ya Yesu mu muswelo muyampe? Tukesambila pa malondololo mu kishinte kilonda’ko.

[Bipangujo bya Kifundwa]