Paladisa Pano pa Ntanda—Keidi Pabwipi!

“Abe Tata wetu wa mūlu, dijina dyobe dijile kijila. Bulopwe bobe bufike. Muswidile mutyima obe mūlu ne panopantanda pene i monka.” —Mateo 6:9, 10.

INO milombelo, iyukilwe na bavule bu ya Tata Wetu nansha bu Milombelo ya Mfumwetu, ipa bantu lukulupilo. Namani? Monka mwikilombwela ino Milombelo ya Mfumwetu, Bulopwe bwa Leza bukafikidija kiswa-mutyima kya Leza pano pa ntanda monka mokilongekela momwa mūlu ne pano pene. Ne kadi, kiswa-mutyima kya Leza i kya kujokeja Paladisa. (Kusokwelwa 21:1-5) Lelo Bulopwe bwa Leza bwine i bika, ne bukajokeja Paladisa pano pa ntanda namani?

Umbikalo Udi’ko Bine

Bulopwe bwa Leza i umbikalo udi’ko bine. Umbikalo o-onso wingilanga enka shi kudi balopwe, bijila, ne babikalwa. Lelo Bulopwe bwa Leza nabo bubwenye bino bisakibwa? Tala mulondolwela Bible ku bino bipangujo bisatu bilonda’ko:

Lelo balopwe ba Bulopwe bwa Leza i Bāni? (Isaya 33:22) Yehova Leza i mutonge wandi Mwana, Yesu Kidishitu kwendeja buno Bulopwe. (Mateo 28:18) Kupityila ku buludiki bwa Yehova, Yesu i mutonge kibalwa kityetye kya bantu “ba mu ndimi yonso, ne ba ku bantu bonso, ne ba ku mizo” bakabikala pamo nandi bu “bakukabikala panopantanda.”—Kusokwelwa 5:9, 10.

Bulopwe bwa Leza i butūdile’ko babikalwa bijila’ka bya kulonda? Bijila nansha misoñanya kampanda ilombanga bantu balonge’po kintu. Yesu wāyukenye bijila bikatampe kutabuka mu bino, na kunena’mba: “Ukasanswa Yehova Leza obe, ne mutyima obe onso, ne muya obe onso, ne manwa obe onso. Kino kyo kibajinji kidipo ne bukata’kyo. Kya bubidi kikwabo kidingakene nakyo’mba: Ukasanswa mukwenu na abe mwine.”—Mateo 22:37-39.

Bijila bikwabo nabyo bilomba babikalwa ba Bulopwe bwa Leza belame ku kulonga bintu kampanda. Kimfwa, Bible ulombola patōkelela namino, amba: “Kemukyongolwai. Ke-bantu babusekese nansha bakutōta bakishi, nansha bamakoji, nansha badi bwa bāna-bakaji, nansha bakwionakanya abo bene, nansha bangivi, nansha bakilokoloko, nansha bakukolwakolwa, nansha babutukani, nansha bakōngola, kebakapyanapo bulopwe bwa Leza, mhm.”—1 Kodinda 6:9, 10.

Lelo babikalwa ba Bulopwe bwa Leza i bāni? Yesu wādingakenye babikalwa ba Bulopwe bwa Leza na mikōko. Wānene amba: “Ī kēvwane diwi dyami, nabya īkēkalanga luombe lumo, ne mukumbi aye umo.” (Yoano 10:16) Boba basaka kubadilwa mu babikalwa ba Bulopwe bwa Leza, kebafwaninwepo  enka kwitela bitupu bu balondi ba Yesu, Mukumbi Muyampe, ino bafwaninwe ne kulonga byobya byaebasoñanya. Yesu wānene amba: “Ke bonsololopo bantu bakuntela’mba; Mfumwami! Mfumwami! bakatwele umbulopwe bwa mūlu, ehe, poso enka wakulonga kiswa-mutyima wa Tata udi mūlu.”—Mateo 7:21.

O mwanda, boba bonso babikalwa ba Bulopwe bwa Leza, bengidijanga dijina dya Leza, Yehova, ne kwidilēmeka, pamo na mwālongele Yesu. (Yoano 17:26) Balondanga musoñanya wa Yesu wa kufundija bantu “myanda-miyampe ya buno bulopwe.” (Mateo 24:14; 28:19, 20) Kadi i besanswe bya binebine abo bene na bene. —Yoano 13:35.

Konakanya “Boba Bonakanya Panopanshi”

Ngikadilo idi’mo ntanda dyalelo ilombola’mba Bulopwe bwa Leza busa kuleta kushinta kukatampe pano pa ntanda. Le tubekiyuka namani? Yesu wālombwele kiyukeno kya bintu bivule, ke padi pano myaka tununu tubidi, kilombola’mba “bulopwe bwa Leza bubafika” pabwipi. (Luka 21:31) Enka na mokilombwedilwe mu kishinte kibadikile’ki, pano bilomboji bya kino kiyukeno bimwekelelanga patōka pano pa ntanda ponso.

Lelo i bika bikalonda’po? Yesu ulondolola’mba: “Kukēkalanga kyamalwa kibūke kya kubulwa, nansha kingi kikwabo kidingakene nakyo, kushilwila konka kungalwilo kwāpangile mwine Leza, ne kutūla ku dyalelo kuno’ku, nansha kumeso kwine.” (Mateo 24:21) Kino ke kinzengelepo kikakolomonwa na bantu. Inoko, i Leza mwine ukaleta’kyo mwanda “wakwibonakanya boba bonakanya panopanshi.” (Kusokwelwa 11:18) Bantu babi, ne boba balonga bya kwisakila biletela ntanda musala, “bakatyibibwa ku ntanda’ya.” Inoko boba babwaninine bengidila Leza mu muswelo umusangaja, abo “bakekadidilanga monka.”—Nkindi 2:21, 22.

Yehova Leza udi na bubinga bwa kulonga kino. Mwanda waka? Tulete kimfwa: Langa’po bidi shi udi na mobo. Bafutyila bamo balēmekele’o; bafuta ne kwialama biyampe. Inoko, bakwabo i ba kyonakanya ne kakama; bapela kufuta, kadi bonakanya ne mobo mene. Ubebanenanena, kwalamuka mpika. Le ukalonga’po namani? Byodi mwine mobo, kukasupo bekadi babi uno muswelo.

Mu muswelo umo onka, Yehova Leza, byadi Umpangi wa ntanda ne byonso bidi’mo, udi na lupusa lwa kutonga i ani ufwaninwe kwikala mu ino ntanda. (Kusokwelwa 4:11) Yehova i mulombole amba mpango yandi i ya kutalula pano pa ntanda bantu babi bonso bapela kulonga kiswa-mutyima kyandi ne boba balonga bakwabo bibi.—Mitōto 37:9-11.

Paladisa Mijokejibwe

Pano pano ponka, Bulopwe bwa Leza bupelwe Yesu Kidishitu bo busa kuludika ntanda. Yesu wātelele kino bu “kupangulula.” (Mateo 19:28) Lelo ngikadilo ikekala namani? Tala milao ilaile Bible:

Mitōto 46:9. “Watukija mavita ne ku mfulo ya ntanda.”

Isaya 35:1. “Muntanda mutuputupu ne panshi pōmu bikasangala, ne ntanda yampikwa bumeni ikasepelela ne kutōya buluba pamo bwa diluba diyampe.”

Isaya 65:21-23. “Batongwe bami bakalēpejeja biyampe mingilo ya makasa abo. Kebakengilapo bitupubitupu, nansha kubutulapo babimona malwa.”

Yoano 5:28, 29. “Mwaka wiyako’wa bonso badi mu bibundu bakēvwana diwi [dya Yesu]. Ne kutamba bakatambemo.”

Kusokwelwa 21:4. “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika.”

 Bubinga bwa Kukulupidila

Lelo nobe witabije milao idi mu Bible? Bible i mulaye amba bavule bakapela kwitabija’yo. Unena’mba: “Mu mafuku a kumfulo bakibengo bakāyanga . . . banangila monka mupityila bilokoloko bya abo bene, ke banena’mba: Lelo mwanda-wamulao wa kukāya kwandi udi kwepi? ke-kuntu kushilwila ponka pa difuku dyaponene bakulutuba mu tulo, bintu byonso byendangaendanga’tu pamo ponka, ne byadi kungalwilo kwa kipangwa.” (2 Petelo 3:3, 4) Bano bantu bampikwa lwitabijo beongola bikata. Tubandaulei’ko bubinga buná bofwaninwe kwitabijija binena Bible:

(1) Leza wāpwijije myanda ya ntanda pa kala. Dilobe dya mu mafuku a Noa i kimfwa kimo kya kutendelwa.—2 Petelo 3:5-7.

(2) Kinenwa kya Leza kyālaile ngikadilo ya ntanda idi’ko dyalelo enka moimwekela’mu.

(3) Bintu byonso ‘ke byendangaendangapo’tu pamo ponka, ne byadi kungalwilo kwa kipangwa.’ Pano būmi bwa bantu, mwikadila, ne bintu bitujokolokele, i byoneke pano pa ntanda mu muswelo kewamwekele kashā.

(4)  Ino “myanda-miyampe ya buno bulopwe” isapulwanga pano pa ntanda ponso, mwanda wa kulombola’mba ‘mfulo isa kufika’ enka pano pano.—Mateo 24:14.

Batumoni ba Yehova bakwita witunde nabo Kinenwa kya Leza, Bible, amba nobe uyuke bivule bitala pa lukupilo lwa būmi bwa nyeke mu Bulopwe bwa Leza. (Yoano 17:3) Bine, kudi būmi bulumbuluke bubikilwe bantu kumeso. Bine, mafuku mayampe mpata etutengele kumeso’ku! Lelo nobe ukamona buno būmi?

[Bushintuludi pa paje 7]

Boba banena’mba bintu byonso byendangaendanga’tu pamo ponka beongolanga bikata

[Kifwatulo pa paje 8]

Lelo nobe ukamona buno būmi?