1 Kulupila Bible

“Bisonekwa byonsololo bisonekeja Leza shi bika, shi bika, byo bimwenwamo pa kufundija, ne kukwasha, ne kudingila madingi.”—2 Temote 3:16.

BIKOLEJA I BIKA? Bavule balañanga amba Bible i kitabo kya ñeni ya bantu. Bamo betabije amba mānga ya Bible ke ya binepo. Bakwabo banena amba madingi a mu Bible keadipo na bukwashi kadi i dibuku dya kala.

LE UKANEKENYA BINO BIKOLEJA NAMANI? Divule, boba bapatanyanga Bible amba ke ya binebinepo kebakimbangapo kuyuka mwine mobikadile. Bapitulukanga bitupu mu binena bakwabo. Inoko, Bible witudyumuna’mba: “Mwendalale witabija binenwa byonso: Ino muntu mukosoke aye utadija biyampe matabula andi.”—Nkindi 14:15.

Pa kyaba kya kwitabija bupofu byobya binena bakwabo, ubulwe’po kulonda kimfwa kya Bene Kidishitu ba mu myaka katwa kabajinji ba mu Belea, kibundi kyādi kungala kwa Ngidiki wa dyalelo? Kebādipo betabija bitupu byobādi bebalombola. Bādi bayukene bu bantu babandaula “ke basakesake mu bisonekwa mafuku onso mo bukila, mo bukila’mba, shi momo byendele.” (Bilongwa 17:11) Tutalei mu kīpi bubinga bubidi botukokeja kukulupidila amba Bible i Kinenwa kya Leza kya ku bukomo bwa mushipiditu.

Mānga ya mu Bible i ya binebine. Pano ke myaka, bantu badi bapatana—ne pano pene bakipatana—pa bubinebine bwa majina a bantu ne bifuko bitelelwe mu Bible. Kadi, myanda imweka ilombola amba lupata lwabo ke lwa binepo ne amba nsekununi idi mu Bible i ikulupilwa.

Kimfwa, kitatyi kimo befundi bādi balakana kwikala’ko kwa Salekona, Mulopwe wa Bene Ashidia, utelelwe mu Isaya 20:1. Ino mu myaka ya tamba mu 1840, befundi ba bintu bya kishiyekulu bāsokwele panshi ndaku ya mulopwe. Pano, Salekona ubadilwa mu balopwe bayukane kutabuka ba Bene Ashidia.

Bantu bādi bapatana kwikala’ko kwa Pontyusa Pilato, mbikavu Mwine Loma wāletele lupusa lwa kwipaya Yesu. (Mateo 27:1, 22-24) Ino mu 1961 bāsokwele dibwe dyādi dilembelwe’po dijina dya Pilato ne kitenta kyandi kubwipi na kibundi kya Kesalea mu Isalela.

Lapolo imo ya mu États-Unis (U.S.News & World Report) ya mu mafuku 25 Kweji 10, 1999, inena pangala pa bubinebine bwa mānga ya Bible amba: “Bukimbi bwa dyalelo bulombola mu muswelo utulumukwa bubinebine bwa mānga ya Kipwanino Kikulu ne Kipwanino Kipya—na kukongakanya myanda mikatampe ya bakulutuba ba Isalela, Divilu,  bulopwe bwa Davida, ne būmi bwa Yesu ne kitatyi kyaāikele’ko.” Nansha shi lwitabijo lwa mu Bible kelwimaninepo pa byobya bisokolwa mu bukimbi, buno bubinebine bwa mānga bulombola amba dino i dibuku dya ku bukomo bwa mushipiditu wa Leza.

Tunangu twa binebine tudi mu Bible tumwenwa’mo na bantu ba mizo yonso. Kumeso kwa kusokola twishi tukomo kumona na meso ne motuletelanga mbá, Bible wādi kala kemwisambile pa bukundwe bukwasha ne dyalelo. (Levi 11:32-40; Kupituluka 23:12, 13) Boba badi mu bisaka bilonda madingi a Bible alombola mwa kwikadila na bakwabo i badyese. (Efisesa 5:28–6:4) Muntu ulonda misoñanya ya Bible wingilanga na mutyima umo ku kaji nansha kwikala mukulu wa kaji udi na bujalale. (Efisesa 4:28; 6:5-9) Kulonda misoñanya ya Bible kudi kadi na kamweno mwa kwikadila na bukomo bwa ngitu biyampe. (Nkindi 14:30; Efisesa 4:31, 32; Kolose 3:8-10) Tusakilwa madingi a uno muswelo atamba kudi Umpangi wetu.

LE I KAMWENO’KA KAMWENWA’MO? Tunangu tudi mu Bible tubwanya ne kwalamuna muntu mwendalale ke mudyumuke. (Mitōto 19:7) Ne kadi, kukulupila mu Bible, kuketukwasha kupita bitabo bikwabo, tutabule ditabula dikwabo ditutwala ku kwikala na lwitabijo lukomo.

Shi usaka kuyukila’ko myanda mikwabo, tala dibuku Lelo I Bika Bine Bifundija Bible? * shapita 2, unena’mba “Bible—Dibuku Ditambile Kudi Leza.”

[Kunshi kwa dyani]