Ñeni Yotuboila Kudi Yesu

Pa Bitala “Mfulo”

I Mfulo ya Bika?

Bana ba bwanga ba Yesu bāmwipangwile amba: “Lelo kadi ne kyo tukayūkilapo pa kwiya kobe pano ne pamfulo ya panopantanda i kika le?” (Mateo 24:3) Yesu pa kulondolola kino kipangujo, kānenepo amba ino ntanda yotutyampile’i isa kufula. Kumeso kwa kunena bino wēsambīle pa “bya panopantanda,” kadi wātelele kino kishima mwanda wa kwisambila pa ngikadilo yonso ya ntanda ne ya bipwilo imbikalwe na Satana. (Mateo 13:22, 40, 49) Byo abyo bya pano pa ntanda byaādi ulanga paānene amba: “Po pakafikidila ne pamfulo pene.”—Mateo 24:14.

Le Yesu washintulwile namani mfulo?

Mfulo ya ino ngikadilo yampikwa boloke ibadilwa mu “myanda-miyampe.” Yesu wānene amba: “Īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.” Yesu wālombwele mukekadila mfulo ya ino ngikadilo ya bintu amba: “Kukēkalanga kyamalwa kibūke kya kubulwa, nansha kingi kikwabo kidingakene nakyo, kushilwila konka kungalwilo kwāpangile mwine Leza, ne kutūla ku dyalelo kuno’ku, nansha kumeso kwine. Kadi shi oa mafuku keatyepijibwe longa kekukapande muntu, nansha umo.”—Mateo 24:14, 21, 22.

Lelo i bāni bakonakanibwa?

Enka boba kebasenswepo Yehova ne Yesu nansha kumwingidila mpika, bo bakonakanibwa. Bano bantu kebatelepo mutyima kudi Leza. Yesu wānene amba: “Monka mwadi mwikadile myaka ya Noa ne kukāya kwa Mwanā muntu nako kukēkalanga’nka nabya. Ke-bantu monka mo badi bēkadile mu oa mafuku abadikile kumeso a dilobe dya mema, . . . ne kuyūkapo mpika, ino pa kufika dilobe dyatukija  bonso.” (Mateo 24:36-39) Yesu wānene amba bavule badi mu dishinda ditwala ku konakanibwa. Inoko, wākulupije bantu amba kudi “dishinda” dityetye ditwala ku “būmi.”—Mateo 7:13, 14.

Lelo mfulo ya pano pa ntanda ikaya kitatyi’ka?

Yesu pobamwipangwile kiyukeno kya kuyukila pa kwiya kwandi “ne pamfulo ya panopantanda,” wālondolwele amba: “Muzo ukataluka kukatamba muzo mukwabo, ne bulopwe nabo monka. Kadi kukēkalanga bipengele bya nzala, ne bintenshi bya kutenkanya ntanda . . . Ebiya pa mwanda wa bubi bwa kujilula bijila lusa lwa bangi bangi bene lwenda lutalala munda.” (Mateo 24:3-12) Nanshi myanda ya bulanda yonso imvwanikwa dyalelo idi na buluji—amba panopano ponka Bulopwe bwa Leza busa kuletela bantu ba kikōkeji ndoe. Yesu wānene amba: “Bānwe pa kumona byobya bifike, mukayūka’mba, bulopwe bwa Leza bubafika.”—Luka 21:31.

Le ufwaninwe kulonga bika?

Yesu wānene amba Leza “wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Pa kwikala na lwitabijo mudi Leza ne wandi Mwana, bilomba kwibayuka bidi biyampe. O mwanda Yesu wānene amba: “Bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.”—Yoano 17:3.

Dyumuka kutyina’mba kuzumbija mutyima nansha makambakano byakakukankaja uleke kwifunda mwa kuswela Leza. Yesu amba: “Mwikale kudyumuka bānwe bene, mwanda wa kunena’mba mityima yenu yakaīle kulemenenwa, . . . ne byakūmininwa bya buno būmi ino dyodya difuku dikemupulumukila bitupu, enka na lufimbo lwa kwimuponena. Ke-pantu i yenka nabya dikaponena bonso.” Shi uteje kidyumu kya Yesu, ubwanya “kupanda ku byobya byonso bisa kufika.”—Luka 21:34-36.

Shi usaka kuyukila’ko myanda mikwabo, tala dibuku Lelo I Bika Bine Bifundija Bible? * shapita 9, unena’mba, “Lelo Tudi mu ‘Mafuku a Mfulo’?”

[Kunshi kwa dyani]