Fwenai Kudi Leza

Aye Umonanga Biyampe Bidi mu Muntu

1 BALOPWE 14:13

“YEHOVA usaatanga mityima yonso, wivwanija milangwe yonsololo ya mifwatakanyo.” (1 Bilongwa 28:9) Bino binenwa bya ku bukomo bwa mushipiditu bitulengeja tufwije’ko mpata pa muswelo witutele Yehova mutyima bininge. Yehova umonanga biyampe bidi mu mityima yetu nansha byotudi kulampe na bubwaninine. Kino i kimweke patōka mu binenwa byandi bitala padi Abidya, bidi mu 1 Balopwe 14:13.

Abidya wādi mu kisaka kibi. Shandi Yeloboame, wādi mutwe wa kisaka kya bulopwe bupondoke. * Yehova wātūdile’ko mpangiko ya kutukija njibo ya Yeloboame, “pamo’nka na mukombela muntu bityakuku.” (1 Balopwe 14:10) Ino Leza wasoñanya amba enka Abidya umo wa mu njibo ya Yeloboame—ubela bininge—ajīkwe bya bulēme. * Mwanda waka? Leza ushintulula amba kudi “kintu kilumbuluke kya kudi Yehova, Leza wa Isalela, mu njibo ya Yeloboame” (1 Balopwe 14:1, 12, 13) Le bino binenwa bitulombola bika padi Abidya?

Bible kalombwelepo amba Abidya wādi mutōtyi wa Leza wa kikōkeji. Inoko, mwandi mwādi kintu kilumbuluke. Kino kintu kilumbuluke “kya kudi Yehova,” padi kyādi kitala butōtyi Bwandi. Balembi Balabi balombola amba Abidya wādi ukatōta ku tempelo ya mu Yelusalema ne amba wātalwile balami bātudile’ko shandi bādi bakankaja Bene Isalela kwenda ku Yelusalema.

Nansha shi ketuyukilepo senene bulumbuluke bwādi mudi Abidya, inoko abo bwādi bwende nkuo. Dibajinji bidi bwādi bwa binebine. Buno bulumbuluke bwādi “mwandi”—kokunena’mba, mu mutyima wandi. Dya bubidi, bwādi bwa pa bula. Abidya wāmwekeje bulumbuluke bwandi nansha byaādi “mu njibo ya Yeloboame.” Mufundi umo unena amba: “Bantu balamine bulumbuluke bwabo mu bifuko nansha mu bisaka bibi bafwaninwe kufwijibwa’ko bininge.” Bantu bakwabo banenanga amba bulumbuluke bwa Abidya bwādi “bumweke patōka . . . , enka na mukelelanga ñenyenye bufuku, ne mulumbulukilanga mutondo shi mujokolokwe na mityi mikukuke manyi.”

Kya mvubu mpata, binenwa bidi mu 1 Balopwe 14:13 bitufundija kintu kilumbuluke kitala padi Yehova ne byobya byakimba motudi. Vuluka amba kintu kilumbuluke ‘kyatenwe’ mudi Abidya. Bimweka amba Yehova wāsaatyile mu mutyima wa Abidya kufika ne byaatene’mo kiyukeno kya bulumbuluke. Kudingakanya na kyandi kisaka, Abidya wadi pamo bwa mufundi utūla dilungo dilēme “mu mulwi wa minono.” Yehova wāsenswe buno bulumbuluke ne kwibwesela, kadi wafwila lusa uno muntu wa mu kisaka kibi.

Mwene kino kitupa kikulupiji pa kuyuka amba Yehova ukimbanga ne kumona na bulēme kintu kilumbuluke kidi motudi nansha byotudi bakubulwa kubwaninina? (Mitōto 130:3) Kuyuka kino kwitutononanga tufwene kudi Yehova, Leza usantaula mityima yetu ukimba’mo kabulumbuluke nansha katyeñeneñene.

[Kunshi kwa dyani]