Lelo Ubwanya Kuyuka Bine Dijina dya Leza?

Kunenwa kwimuna nansha kutela muntu wa kitenta pa dyandi dijina i kintu kya kamweno. Bakatampe ba lupusa betyilwanga pa bitenta byabo, pamo bwa “Mfumwami,” “Mwine ntanda,” nansha amba “Mwine ntumbo.” Nanshi shi muntu wa kitenta wakunena’mba, “Ngite’tu pa dijina,” bine ukemona bu mulēme.

LEZA wa bine witulombola mu Bible, Kinenwa kyandi kisonekwe amba: “Ami ne Yehova, dyo dyami dijina.” (Isaya 42:8) Nansha byadi na bitenta bivule, pamo bwa “Umpangi,” “Mwine bukomo bonso,” ne “Mfumu mubikadi,” ulemekanga bengidi bandi ba kikōkeji na kwibaleka bamutēla pa dyandi dijina dya kasuku.

Kimfwa, kyaba kimo mupolofeto Mosesa wāshilwile kulomba Leza amba: “Nakwisashila, a Yehova.” (Divilu 4:10, New Wold Translation) Pa kufikijija tempelo mu Yelusalema, Mulopwe Solomone wāshilwile milombelo yandi na bino bishima amba: “A Yehova.” (1 Balopwe 8:22, 23) Kadi mupolofeto Isaya pa kusapwila Yehova myanda ya bantu ba Isalela, wānene amba: “Abewa a Yehova wi tata wetu” (Isaya 63:16) Bibamweka patōka amba, Tata wetu wa mūlu witwita tumutēle pa dijina.

Nansha kwita Yehova pa dijina byo kudi na kamweno, inoko na bubine, kuyuka dijina dyandi binebine kulomba bivule. Yehova i mulaye pangala pa muntu ense umusenswe ne umukulupile amba: “Nkamupudikanga kūlu, ke-muntu wayūka dijina dyami.” (Mitōto 91:14) Bine, kuyuka dijina dya Leza kukokeja kulomba bivule mwanda o muswelo umo kete otubwanya kukingwa nandi. Penepa, i bika bikusakila kulonga pa kuyuka binebine dijina Yehova?