Kebakityinapo Monka Mfulo

MU MYAKA isenselela ku 1980, ba Gary ne Karen baitabije amba mfulo ya ntanda ibafwena pabwipi. Ebiya baviluka mu kibundi kikatampe kya ntanda’ya ne kutyiba mbila ya kusangela enka byobadi nabyo kete. Badi basaka kupanda.

Pa kwikala na bwino bo basaka, badi bapota bitabo, benda ku masomo ne ku maseminele, ne kwisamba na bantu bavule. Bakuna munamuna mu budimi ne miswelo 50 palapala ya mityi mityemitye ipa bipa. Babīka nkunwa ne bingidilwa. Befunda mwa kutamijija bidibwa ne kwibilama. Mulunda nabo webafundija mwa kupoila ne mwa kulamina mwita. Karen wefundile kujingulula mityi ne miji mu dīto mwa kudīla’byo shi byakudya bibakoma. Gary wefundile mwa kwengela māni a bulongo, kupunga lwanzo, ne mwa kūbakila njibo.

Karen unena “pangala pa ngikadilo mibi ya ntanda ya kino kitatyi, namone amba kushidimuka kwa ntanda kusa kufula’nka panō.” Gary ushintulula amba: “Nadi mukankamane pamo bwa bankasampe bakwabo, mu kutompa kufudija kwisañuna kwa nkoba, Divita dya Vietename, ne kutyiba milomo. Ino nkyaijijepo kutyumukwa mutyima. Nadi mona amba muzo wa muntu udi mu kashinda ka kwionakanya ao mwine.”

Gary unena’mba: “Difuku dimo nelamije’ko kitatyi, nasela Bible ne kutanga tamba ku Mateo kutūla ku  Kusokwelwa. Kupwa, mafuku aná alondele’po, natanga’ye monka. Mu difuku dya butano lubanga, nasapwila Karen amba: ‘Tudi mu mafuku a mfulo. Panopano ponka Leza usa kusubula ntanda. Tufwaninwe kusokola boba bakapanda.’” Gary ne Karen bashilula kwenda ku kipwilo ne kipwilo, benda bakimba bantu basaka kwiteakanya mwa kupandila ku ino mfulo.

Kepaijijepo, Kamoni wa Yehova umo waiya ku njibo yabo, ne kifundwa kyashilula. Karen uvuluka amba. “Nasangele bininge mwanda wa Bisonekwa byaunshitulwidilwe biyampe. Bubinebine butala pa kitatyi kya mfulo bo abo bonadi nkimba, ne mfulo mfulō nebusokola. Kudi lukulupilo lwa binebine lwa būmi bwa kumeso. Ino kintu kilumbuluke nakampata, nashilwile kusamba bulunda na Tata wami wa mūlu, Umpangi, Leza wa diulu ne ntanda.”

Gary unena amba: “Bwami būmi budi na mvubu ya binebine. Tamba nshilula kwifunda Bible, nkyalekele’byo. Nadi ntanga bupolofeto bwa Bible, mandaula bubinebine bulombola amba bufikidilanga, ne kwitabija amba panopano ponka Leza usa kufikidija byalaile. Namwene amba: ‘Bantu bafwaninwe kwiteakanya, ke ku kimpengelepo, ino i ku būmi bwitusakila Leza.’” Ba Gary ne Karen pano badi na mumweno muyampe pa būmi bwa kumeso. Pa kyaba kya kulangalanga pa mwanda wa mfulo ya ntanda, bakulupile amba Leza usa kutalula’ko makambakano abinza nao muzo wa muntu ne amba usa kulongolola ntanda ke paladisa.

Le pano byo kepadi kintu kya myaka 25, i bika bilonga ba Gary ne Karen? Karen unena amba: “Ñendelelanga kutamija buswe bonswele Yehova Leza ne lwitabijo lwami mwadi, kadi ntompanga kukwasha bakwabo balonge uno muswelo. Ami ne Gary twikwatakanyanga potukomeja kisaka kyetu ne kwikala mu bumo mu butōtyi bwa Leza. Tutompanga kwilongolola nyeke, ne kulonga bukomo bwa kupēleja būmi bwetu mwanda wa kuta bakwetu mutyima ne bisakibwa byabo.”

Gary ubweja’ko amba: “Nombelanga difuku ne difuku amba Bulopwe bwa Leza bwiye busenge midiyo ne midiyo ya bantu. Nsapwilanga bakwetu difuku ne difuku myanda miyampe ya Bulopwe bwa Leza, nombelanga mbwanye kusapwila muntu nansha umo akulupile binena Bible. Mu myaka 25 ne kupita, Yehova i mulondolole ino milombelo. Ami ne Karen tukulupile amba Leza usa panopano ponka kushinta ntanda, ino ketukityinangapo monka mfulo ya ntanda.”—Mateo 6:9, 10; 2 Petelo 3:11, 12.

[Kifwatulo pa paje 9]

Pano ba Gary ne Karen bakwashanga bantu bakulupile musapu wa mu Bible