Bipangujo bya Batangi . . .

Lelo Paladisa Itelelwe mu Bible Idi Kwepi?

▪ Yesu wālaile muntu wādi kubwipi na kufwa wālombwele lwitabijo mwadi na kininga amba: “Ukēkalanga nami mu Paladisa.” (Luka 23:43) Lelo uno muntu wadi wa kukekala kwepi? Lelo Paladisa yadi ya kwikala mūlu, pano pa ntanda, nansha mu lwelele mukungīle bantu kutyibilwa mambo?

Bankambo betu bādi bekele mu Paladisa. Bible witulombola amba: “Yehova Leza wadima budimi kutunduka mu Edena; e mwātūdile muntu wāpungile’wa. Ebiya Yehova Leza wayata muntu wamubika mu budimi bwa Edena, kwibuneñenya ne kwibulama.” (Ngalwilo 2:8, 15) Kitatyi kyaālamwinwe bino binenwa mu Kingidiki, kishima “budimi” kyaālamwinwe bu pa·raʹdei·sos, kwine kutambile kishima kya Kiluba “paladisa.”

Monka mubailanga kipango shi ba mulume ne mukaji ababutula bana, mo monka ne bambutwile betu babajinji bādi ba kutandabula Paladisa kupita pa mikalo ya Edena kisaka pokyādi kya kubaya. Leza wēbanene amba: “Muyujei panopanshi ne kwipanekenya.”—Ngalwilo 1:28.

Inoko, mpango ya Umpangi wetu, yādi ya amba bantu bekale mu Paladisa pano pa ntanda ne kulela’mo bana. Bādi ba kwikala’ko nyeke mu budimi bwa pano panshi mwakubulwa kabudi nansha kamo. Ntanda yādi ya kwikala kifuko kya nyeke kya muzo onso wa muntu. Ke kya kutulumukapo shi bintu bya kipangila bidi mu umbuo wetu wa ntanda bituletelanga nsangaji mivule! Twāpangīlwe kwikala mu ntanda milumbuluke.

Lelo mpango ya Leza i mishinte? Mhm. Mwanda Yehova witukulupija amba: “E monka mukekadila ne kinenwa kyami kyalupuka mu kyakanwa kyami; kekiketolelapo bitupu ko ndi; ehe, nanshi kikalonga kyoki kyo nswele.” (Isaya 55:11) Myaka 3000 ne kupita kupwa kwa muntu kupangwa, Bible wānene pangala pa yewa “wabumbile panopanshi ne kulongapo” amba, “kapangīle’popo kwikala bitupubitupu ehe,” ino “wabumbile’po amba pekalwe.” (Isaya 45:18) Kiswa-mutyima kya Leza kekishintyilepo. Ntanda ikekala ke paladisa monka.

Mwanda usangaja i uno, bisonekwa bivule mu Bible bisambila pa Paladisa bilombolanga biyampe būmi bwa pano panshi. Kimfwa, bupolofeto bwa Isaya bunena amba: “Bakōbaka mobo ne kwikala monka; kadi bakadima madimi a mañanza ne kudya bipa byayo.” (Isaya 65:21) Lelo i kwepi kobakwanga mobo ne kudimwanga madimi a mañanza? Ne i kwepi kudibwanga bipa? I pano pa ntanda. Nkindi 2:21 unena patōkelela amba: “Babuluji bakekalanga mu ntanda’ya.”

Yesu nandi wēsambile pa paladisa ya pano panshi. Bine, kadi wālaile paladisa ya momwa mūlu, ino ku bantu batyetye kete batongelwe. (Luka 12:32) Pa kufwa, bano bantu basangwilwanga mu Paladisa ya momwa mūlu ne kwilunga na Kidishitu mwanda wa kuludika Paladisa ya pano panshi. (Kusokwelwa 5:10; 14:1-3) Bano ba kubikala nandi pamo bakatala amba Paladisa ya pano panshi iludikwe ne kulamwa biyampe mungya misoñanya ya Leza.

Yesu wāyukile amba kino kyo kiswa-mutyima kya Leza pano pa ntanda. Ne kadi, wādi na Shandi momwa mūlu kitatyi kyāpangilwe budimi bwa Edena. Būmi mu paladisa iya’ko ya pano pa ntanda bukapebwa bantu bonso betabija dyalelo. (Yoano 3:16) Yesu ulaya bano bantu amba: ‘Mukekalanga nami mu Paladisa.’—Luka 23:43.

[Kutambile Kifwatulo pa paje 10]

© FORGET Patrick/SAGAPHOTO.COM/Alamy