Myanda Miyampe ku Balanda

KINENWA kya Leza kitukulupija’mba: “Bafudilwe kebakavulaminibwapo mafuku onso mhm.” (Mitōto 9:18) Kadi Bible unena pa Mupangi wetu amba: “Abe ubalanga kuboko kobe, wikutyija mityima ya bintu byonso byumi.” (Mitōto 145:16) Luno lukulupilo ludi mu Kinenwa kya Leza ke kilotwapo bitupu. Leza mwine bukomo bonso ukokeja kulonga kine kisakibwa pa kupwa bulanda. Lelo balanda basakilwa bika?

Muntu umo utala myanda ya lupeto mu Afrika wanene amba, matanda malanda asakilwa “mulopwe nkomonkomo.” Mulangwe wandi i wa mba, pa kupwa bulanda bilomba muntu wa bukomo bwa kulonga kintu kadi wa kanye ka kilelo. Tukokeja kubweja’mba mwendeji ubwanya kupwa bulanda ufwaninwe kwikala mulopwe wa ntanda yonso, mwanda bulanda bwa malwa bulupukanga ku mwiabidilo mubi wa ntanda yonso. Kadi mulopwe wa kupwa bulanda ufwaninwe kwikala muntu ubwanya kupwa kine kilengeja bulanda—mutyima wetu wa kwisakila. Le i kwepi kukokeja kutanwa mulopwe wa uno muswelo?

Leza wātumine Yesu na myanda miyampe ku balanda. Kitatyi kyāimene Yesu kutanga myanda itala mwingilo wāmupele Leza, wānene amba: “Mushipiditu wa Yehova wangikadilako, Ke-muntu wanshingile mani ngikale wakusapwila myanda-miyampe ku balanda.”—Luka 4:16-18.

Le Myanda Miyampe I Myanda’ka?

Leza wātongele Yesu bu Mulopwe. Ino bine i myanda miyampe. I Mulopwe mufwaninwe kupwija bulanda mwanda (1) usa kubikala pa muzo wa muntu onso kadi udi na bukomo bwa kulonga kintu; (2) wivwaninanga balanda lusa kadi ufundijanga balondi bandi kuta balanda mutyima; kadi (3) ukokeja kupwa kine kileta bulanda, kibutwila kyetu kya kwisakila. Tubandaule bino bipindi bisatu bya myanda miyampe.

1. Lupusa lwa Yesu pa mizo yonso Kinenwa kya Leza kinena padi Yesu amba: “Kwamupebwa bufumu, . . . amba bantu bonsololo, ne mizo, ne ndimi, bakamwingidile.” (Danyele 7:14) Le ubamone kamweno ka kwikala na muludiki umo enka wendeja muzo wa muntu onso? Kekudipo ba kulwila ne kūmanina bupeta bwa ntanda. Bonso bamwena’mo muswelo umo. Yesu witukulupija amba ukekala Mulopwe wa ntanda wa bukomo bwa kulonga kintu. Wānene’mba: “Lupusa lonsololo napebwa’lo lwa mūlu ne panopantanda pene.”—Mateo 28:18.

2. Lusa lwa Yesu ku balanda Umbula bwa mwingilo wandi pano panshi, Yesu wādi wivwanina balanda lusa. Kimfwa, mwana-mukaji umo wāpwibwe tonso twaādi nato ku bañanga, wātengele ku mutwelo wa Yesu amba nsa kukoma. Wādi ubela muyeye wa mashi umbula bwa myaka 12, ne bine mashi e ano amupwile. Kukwatañana na Mukanda wa Bijila, muntu yense waādi wa kutenga wādi wa kwikala wa disubi. Ino Yesu kāmufuninepo. Wāmunene amba: “Abe mwana’mi lwitabijo lobe lubakupandija. Endapo ne ku mutyima talala! Ubapwibwa ku kizwa kyobe kyo wadi nakyo.”—Mako 5:25-34.

Bufundiji bwa Yesu budi na bukomo bwa kushinta mityima ya bantu mwanda wa nabo balonge bintu na lusa. Kimfwa, tala malondololo a Yesu ku muntu wādi usaka kuyuka muswelo wa kusangaja Leza. Uno mwana-mulume wādi uyukile amba Leza usaka tusanswe bakwetu, ino wāipangwile Yesu amba: “Lelo mukwetu kadi i ani le?”

Yesu pa kumulondolola, wāletele kyelekejo kya muntu wādi utamba ku Yelusalema wenda ku Yediko wākwetwe na bakabwalala  bamushiya “mupungile.” Mupidishitu pa kutūkila monka mu dishinda’dya, wāpita kufula kufula. Mwine Levi nandi walonga muswelo umo onka. Ino “aye mwine Samadia, byādi mu lwendo wafikile kwādi, ebiya pa kumumona, ino wamukwatyila lusa.” Wamulamika bilonda, wamutentamija pa nyema wandi ne kufuta muntu wa kumulama. Yesu wamwipangula’mba, “Wamwalamukila ke mukwabo, wa yewa waponene mu bakabwalāla . . . i wepi le?” Malondololo i ano amba, “Ke yewa wamufwila lusa kadi!”—Luka 10:25-37.

Bantu bekala Batumoni ba Yehova befundanga buno bufundiji bwa Yesu ne kushinta muswelo obamona kukwasha boba basakilwa bukwashi. Kimfwa, mulembi umo wa Latvian wasonekele mu dibuku dyandi dimo (Women in Soviet Prisons) pa bitala misongo yandi paadi wingila mu komponi ku bilo ya kuketa mambo mu Potma mu myaka ya 1960 amba, “Mu misongo yami, abo bonso [Batumoni] badi bamiñanga bakankamane. Nkyadipo ngabila kadi muswelo mukwabo wa kuntala. Ubweja’ko amba: “Batumoni ba Yehova bamwene amba kukwasha muntu yense, pampikwa kubanga kipwilo nansha muzo i mwingilo wabo.”

Kitatyi kyasakene misokwe mu Ancón, mu Ekwatere, Batumoni ba Yehova bajimije twaji ne lupeto, penepo Batumoni bakwabo bakwata butyibi bwa kwibavudijija lupeto; badi batēka byakudya bya kupotoloja ku babiluwe bajoka bufuku ku kupoya. (tala kifwatulo ku lundyo). Kipwilo kyonso kyakweshe pamo, kubadila’mo ne bana. Badi bashilula na 1:00 ya bufuku mwanda wa mato pa kushīka na 4:00, bidibwa bikale ke bipye. Lupeto lwatambile’mo lwadi lwabanibwa mungya bisakibwa bya umo ne umo.

Uno mwanda mumweke ulombola amba kimfwa ne bufundiji bwa Yesu, bine bidi na bukomo bwa kushinta mwikadilo wa bantu mu mwanda utala kukwasha boba basakilwa bukwashi.

3. Bukomo bwa Yesu bwa kushinta kibutwila kya bantu Mutyima wa bantu wa kulonga bintu na kwisakila i muyukane ku bonso. Bible wiwita bu bubi. Nansha ke mutumibwa Polo wāsonekele amba: “Namona ne mukanda wa kunsapwila’mba; papo pōswele kulonga kiyampe bubi budi nobe.” Ubweja amba: “Le i ani wakunyongololapo mu ngitu ya lufu luno? Nanshi nafwijako Leza padi Yesu Kidishitu Mfumwetu.” (Loma 7:21-25) Pano Polo wādi wisambila pa muswelo ukokeja Leza kunyongolola batōtyi bandi, kupityila kudi Yesu, ku mutyima wa bubi obapyene, kimfwa kwisakila, kintu kine kileta bulanda. Lelo kino kikalongeka namani?

Kitatyi kimo, Yesu pa kupwa kubatyijibwa, Yoano Umbatyiji wātelele Yesu amba: “A! talaipo bidi ku Mwana-mukōko wa Leza wakushikuna bubi bwa panopantanda.” (Yoano 1:29) Panopano ponka, ntanda isa kuyula bantu banyongololwe ku bubi ne ku mutyima wa kusaka tumweno twa abo bene. (Isaya 11:9) Yesu usa kupwija kintu kine kileta bulanda.

Bine, i nsangaji’po kashā pa kwilaija kitatyi kikamona bonso bisakibwa byabo! Kinenwa kya Leza kinena’mba: “Bakashikata, ense munshi mwa muñanza wandi, ense munshi mwa muñanza wandi, kadi ne ense munshi mwa mukuyu wandi, ense munshi mwa mukuyu wandi; nansha umo ukebalengejapo moyo.” (Mika 4:4) Bino binenwa bya lulumbi bilombola kitatyi kikamona bonso mingilo isangaja, mutyima-ntenke, ne mukenga wa kusangela ntanda yampikwa bulanda, batendela Yehova.