Mfulo ya Masusu Ibafwena!

Langa’po bidi kwikala mu ntanda yampikwa masusu​—ntanda yampikwa butapani, divita, misongo, ne bimpengele bya kipangila. Fwatakanya’po bidi ubūka lubanga lonso pampikwa kulangalanga pa kwisañuna, kasusu nansha pa myanda itala lupeto. Lelo bino bintu byonso bikafikidila? Bine, kekudipo bantu nansha bulongolodi bwa muntu bubwanya kuleta bino bintu. Ino Leza i mulaye kutalula’ko bintu byonso bilengeja masusu asusuka bantu, kubadila’mo ne byotwisambile’po mu kishinte kibadikile. Tala milao ilonda’ko ilaile Bible, Kinenwa kya Leza:

◼ BULUDIKI BWA UMBIKALO MUYAMPE

“Leza wa mūlu ukemika bulopwe kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.”​—Danyele 2:44.

Bulopwe bwa Leza i Umbikalo wa mūlu. Yesu Kidishitu Mulopwe wabo mutongwe, ukapingakena pa buludiki bonso bwa bantu ne kulengeja kiswa-mutyima kya Leza kilongeke mūlu ne pano pa ntanda. (Mateo 6:9, 10) Umbikalo o-onso wa bantu keukapingakenapo pa uno umbikalo, mwanda i “bulopwe bwa nyeke bwa Mfumwetu, Umpandiji Yesu Kidishitu.” Mukekala ndoe ya nyeke ne nyekeke.​—2 Petelo 1:11.

◼ KEKUKEKALAPO MONKA MUTŌTELO WA BUBELA

“Satana nandi wialamunanga aye mwine, kādi mwikeulu wa mu mwinya. Penepo nanshi, kekudipo kintu kikatakata bengidi bandi pa kwialamuna abo bene, ke badi bengidi ba mu boloke; kadi kumfulo kwabo kukēkala monka mwikadile mīngilo yabo.”​—2 Kodinda 11:14, 15.

Mutōtelo wa bubela ukasokwelwa patōka bu i mwingilo wa Dyabola, kadi ukatalulwa’ko pano pa ntanda. Ntondo ne kumwanga mashi kwa bipwilo byonso ne kobyaya jimejime. Kino kikalengeja bonso basenswe “Leza wa būmi, wa binebine” bamutōte mu “kwitabija kumo” ne “mu mushipiditu ne binebine ponka.” Bine, ino yo ndoe ne bumo!​—1 Tesalonika 1:9; Efisesa 4:5; Yoano 4:23.

◼ BANTU BAKEKALA BABWANININE

“Leza mwine ukēkala nabo, ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”​—Kusokwelwa 21:3, 4.

Yehova Leza ukalonga kino kupityila kudi Yesu wandi Mwana, mwine wāpēne būmi bwandi pa mwanda wa bantu ba pano pa ntanda. (Yoano 3:16) Mu buludiki bwa Yesu, muzo wa muntu ukafikijibwa  ku bubwaninine. Masusu keakekala’kopo dikwabo, mwanda “Leza mwine ukēkala nabo,” kadi ukapampula “impolo yonso mu meso abo.” Panopano ponka kubulwa kubwaninina ne masusu a bantu kebikavulukwapo; “boloke bakapyananga ntanda, ne kwikala monka nyeke.”​—Mitōto 37:29.

◼ MISHIPIDITU MIBI KEIKEKALA’KOPO

“[Yesu Kidishitu] wakwata mukishi’wa, nyoka wa kala ne kalā, ke dyabola, Satana mwine, kadi, wamukuta myaka kanunu, wamwela monka mu lupongo’mo, washitako, watūlapo ne kiyūkeno pādi, amba wakongola dikwabo mizo, poso’mba myaka kanunu īfike; ebiya akutululwe kakitatyi katyutyu, e mo kyendelemo.”​—Kusokwelwa 20:2, 3.

Lupusa lonso lwa Satana lukapwa kitatyi kikakutwa Satana ne bademona ne kwibela mu “lupongo,” ko kunena amba mu ngikadilo ya kubulwa kulonga kintu. Kebakaludikapo kadi myanda ya bantu. Bine tukasengibwa’po kashā pa kwikala mu ntanda mwampikwa lupusa lwa Satana ne mishipiditu mibi!

◼ ‘MAFUKU A MFULO’ AKAFULA

‘Mafuku a mfulo’ akafula na kyokya kyātelele Yesu bu “kyamalwa kibūke.” Wānene amba: “kukēkalanga kyamalwa kibūke kya kubulwa, nansha kingi kikwabo kidingakene nakyo, kushilwila konka kungalwilo kwāpangile mwine Leza, ne kutūla ku dyalelo kuno’ku, nansha kumeso kwine.”​—Mateo 24:21.

Kyamalwa kibūke kekikekalapo na kidingakene nakyo mu buluji bwa amba, kukalongeka bimpengele kebyalongekele kashā. Kino kyamalwa kibūke kikanana pa “divita dya difuku dikatakata dya Leza, Mwinebukomobonso,” diyukene biyampe bu “Amakedona.”​—Kusokwelwa 16:14, 16.

Bantu ba pi na pi basenswe boloke batengele kwimwena mfulo ya ino ngikadilo imbi ya bintu. Tubandaulei’ko bidi madyese matyetye’tu ebatengele mu Bulopwe bwa Leza.

LEZA UKALONGA BIVULE BINE!

“Kibumbo kikatampe” kikalamwa mu ntanda impya ya ndoe: Kinenwa kya Leza kinena’mba, “kibumbo kikatampe” kya bantu kebabadika ‘bakalupuka mu malwa makatakata’ ne kulamwa bōmi mu ntanda mipya ya boloke. (Kusokwelwa 7:9, 10, 14; 2 Petelo 3:13) Bakanena’mba i bapebwe lupandilo na Yesu Kidishitu, “Mwana-mukōko wa Leza wakushikuna bubi bwa panopantanda.”​—Yoano 1:29.

Bufundiji bwa Leza bukaletela bantu madyese makatampe: Mu ntanda mipya, “panopanshi pakayula ne kuyukidija kwa [Yehova].” (Isaya 11:9) Mu buno bufundiji bwa Leza mukabadilwa ne bulombodi bwa mwa kwikadila mu ndoe na bantu bonso ne kukwatañana na bifuko byotushikete. Leza ulaile amba: “Ami ne Yehova Leza obe ukulombola kakumwenamo wakukukunkuja pa dishinda dyokōkeja kwenda.”​—Isaya 48:17.

Baswe betu bafwile bakasangulwa: Yesu paādi pano pa ntanda, wāsangwile mulunda nandi Lazalasa mu lufu. (Yoano 11:1, 5, 38-44) Mu uno muswelo, wālombwele’mba ukalonga bipite pano mu Bulopwe bwa Leza.​—Yoano 5:28, 29.

Ndoe ne boloke bikekala’ko nyeke: Mu buludiki bwa Kidishitu, kujilula kwa bijila kekukekala’kopo. Le tubayuka kino namani? Mwanda Yesu udi na bukomo bwa kuyuka bidi mu mityima, kadi ukengidija buno bukomo mwanda wa kusansanya kiyampe ne kibi. Boba bapela kushinta mashinda abo mabi kebakekalapo mu ntanda mipya ya Leza.​—Mitōto 37:9, 10; Isaya 11:3, 4; 65:20; Mateo 9:4.

Tubabandaula’tu bupolofeto butyetye bwa mu Bible bulombola bitatyi bya kutendelwa bīya kumeso. Kitatyi kikaludika Bulopwe bwa Leza pano pa ntanda, “bungi bwa ndoe” bukekela’ko nyeke. (Mitōto 37:11, 29) Bintu byonso bilengeja misanshi ne masusu biponena bantu kebikekala’kopo. Akyo kine Kinenwa kya Leza kitulombola pa uno mwanda amba: “Monaipo bidi byo mpangulula byonso ke bipya. . . . Ino myanda īno’ī ya binebine, milumbuluke.”​—Kusokwelwa 21:5.

[Kifwatulo pa paje 6]

[Kutambile Kifwatulo]

© Silke Woweries/Corbis