Michelle: Wakoma’po, Sophia. Nasangala pa kukutana ku njibo.

Sophia: Eyo-mwa, nami nasangala.

Michelle: Musunsa wa mfulo onaile, twesambīle pa muswelo uteñwanga Leza na masusu otususuka. * Wanenene amba kino kyo kintu kyowiipangulanga mu kitatyi kilampe, nakampata kitatyi kyetapile inobe bilonda mu akishida ya motoka. Ino, le pano inobe udi namani?

Sophia: Eyo, udi’tu mafuku amo biyampe, ino makwabo nao bibi. Dyalelo udi BIYAMPE.

Michelle: Ah, nasangala pa kwivwana’mba udi biyampe. I bikomo bine kwikala na mumweno muyampe mu ngikadilo pamo bwa ino.

Sophia: I amo. Inoko, kyaba kimo neipangulanga shi masusu akekala’ko mu bula bwa bitatyi binga.

Michelle: Bine, ao i malondololo mendele’mo. Ino, ubwanya kuvuluka’mba ku mfulo kwa mwisambo otwesambile mu bupempudi bwetu bwa mfulo, nakushile na kipangujo kinena’mba, mwanda waka Leza ulekele masusu endelela shi udi na bukomo bwa kwiapwa.

Sophia: Bine, navuluka.

Michelle: Kumeso kwa kwisambila pa malondololo aleta Bible, tupituluke bidi mu bintu bityetye byotwesambīle’po ponaile dya mfulo.

Sophia: BIYAMPE.

Michelle: Kintu kimo bidi i kino, twefundile amba nansha ke muntu umo wa kikōkeji waikele’ko mu kitatyi kyāsonekelwe Bible, wēipangwile kine kilekēle’ko Leza masusu. Kadi, Leza kāmutopekelepo nansha dimo pa kwipangula kino kipangujo, nansha kumulombola’mba usakilwa’tu lwitabijo lukomo.

Sophia: Uhm, wao i mulangwe mupya kondi.

Michelle: Kadi twefundile’mba Yehova Leza ushikilwe kwitumona tususuka. Kimfwa, Bible unena’mba kitatyi kyādi bantu mu disusu, “aye wasusulwa.” * Le ketusengibwangapo pa kuyuka’mba Leza uteñwanga kitatyi kyotususuka?

Sophia: Bine, tusengibwanga.

Michelle: Ku mfulo, twaitabije’mba Umpangi wetu byadi na bukomo bukatampe, ubwanya bine kulonga’po kintu ne kupwa masusu mu kitatyi kyo-kyonso.

Sophia: Byabyo nkitabija’byopo. Mwanda waka Leza ulekele bino bintu byonso bibi bilongeka shi udi na bukomo bwa kwibimika?

Michelle: Tubwanya kukimba malondololo a kipangujo kyobe mu mukanda mubajinji wa mu Bible wa Ngalwilo. Le uyukile biyampe nsekununi ya ba Adama ne Eva ne kipa kyādi kijidikwe?

Sophia: En-en, twifundanga yayo mānga ku masomo a mu Dya Yenga. Leza wāpeleje kudya ku mutyi kampanda, ino abo baendelela ne kudya’ko.

 Michelle: I amo. Pano, tubandaule bidi bintu byālengeje Adama ne Eva bajilule. Bino bintu bikwatañene bininge na kipangujo kya kuyuka kine kyotususukila. Le ubwanya kutanga Ngalwilo shapita 3, vese 1 kutūla ku 5?

Sophia: BIYAMPE. “Pano nanshi nyoka wadi mutabuke kudyumuka ku banyema bonso ba muntanda balongele Yehova Leza. Ino wanena mwana-mukaji amba: Lelo i nankyo nanshi Leza wanene’mba: Kemukadyako ku mityi yonso, shi mityi ka, shi mityi ka, idi mu budimi’ni, a? Kwivwana mwana-mukaji kamulondolola nyoka amba: Kudya tudya bitupu ku bipa bya mityi ya budimi. Ino ku bipa bya mutyi udi umbukata mwa budimi Leza wanene’mba: Kemukadyako, nansha kwikutenga kwine, kutyina’mba mwakafwa. Penepo kwivwana nyoka kanena mwana-mukaji amba: Mhm, binebine kemukafupo. Mwanda Leza uyukile’mba difuku dyo mukadyako ponkapo meso akemuputuka. Kabidi mukekalanga bwa Leza, kuyuka biya ne bibi.”

Michelle: Wafwa’ko. Twisambile’po bidi bityetye pa ano mavese. Dibajinji, tubamone’mba nyoka wēsambile na Eva, mwana-mukaji. Kipindi kikwabo kya mu Bible kilombola’mba, i Satana Dyabola wādi wisamba nandi kupityila kudi nyoka. * Satana wāipangwile Eva musoñanya wāletele Leza pa mutyi kampanda. Lelo ubamonenga mfuto yēbalaile Leza kitatyi kyādi kya kudya ba Adama ne Eva ku uno mutyi?

Sophia: Bādi ba kufwa.

Michelle: I amo. Na bino binenwa byandi bilonda’ko, Satana wātopekele Leza. Tala byaānene amba: “Binebine kemukafupo.” Satana wāityile Leza bu mbepai!

Sophia: E! Nadi nkyaivwene kashā ino mānga uno muswelo.

Michelle: Kadi Satana pa kutela Leza bu mbepai, wākolomwene mwanda wādi ulomba kitatyi pa kupwa’o. Uyukile mwanda waka?

Sophia: Uhm. Nkiyukilepo.

Michelle: Eyo, ino mbwanya padi kwelekeja uno mwanda uno muswelo. Tufwatakanye’po bidi shi nakufwena difuku dimo ne kukulombola’mba ngidi na bukomo kukupita. Le ubwanya kumbepulula namani?

Sophia: Nanga’mba mbwanya kukutompa mu muswelo kampanda.

Michelle: I amo. Padi tukasela kintu kilema bininge, kupwa ketutale i ani mu bukata mwetu ubwanya kutekuna’kyo. Na bubine, kukimba kuyuka i ani udi na bukomo i muswelo muyampe.

Sophia: An-an, nayuka byokimba kunena.

Michelle: Ino le ulanga namani shi pa kyaba kya kunena’mba ngidi na bukomo bupite, nanena’mba ne wabinebine kukupita? Uno i mwanda mwishile, mwene?

Sophia: Bine, ye monangila.

Michelle: Kadi, bubinebine ke kintupo kidi pamo bwa bukomo kibwanya kumweka kupityila ku kwitompa.

Sophia: En-en.

Michelle: Bine, muswelo umo wa kupwa mwanda i wa kupityija’po kitatyi kilampe mwanda wa bantu bakwabo betutala bamone mwine wa binebine pa batwe bubidi.

Sophia: Byabyo bidi na buluji.

Michelle: Pano, tutale monka ino nsekununi ya mu Ngalwilo. Le Satana wānene amba i mupite Leza bukomo?

Sophia: Mhm.

Michelle: Leza wādi’tu ubwanya kumumwekeja bukidi bonka amba i mbepai. Ino, Satana wānene’mba i wabinebine kupita Leza. Na bubine, wāsapwidile’tu Eva amba, ‘Leza i mwimubepele, ino ami nemulombolanga bya binebine.’

Sophia: Bine!

Michelle: Ino, Leza na tunangu twandi uyukile amba muswelo muyampe wa kupwa mwanda wādi wa kupityija’po kitatyi. Mwenda mafuku, mwine wānene bya bine ne bya bubela wāyukana.

Sophia: Ino, le kēbyamwekelepo amba Leza wānene bya bine kitatyi’tu kyāfwile Eva?

 Michelle: Mu buluji bumo i amo. Ino Satana wākolomwene myanda mivule. Tala monka vese 5. Le ubamone bintu bikwabo byālombwele Satana Eva?

Sophia: Wānene amba shi adye ku kino kipa, meso akamupūtuka.

Michelle: I amo, kadi amba wādi wa kwikala pamo “bwa Leza, kuyuka biya ne bibi.” Nanshi, Satana wānenene’tu amba Leza wādi ufīle bantu kintu kiyampe.

Sophia: An-an, naivwanija.

Michelle: Kadi uno nao wādi mwanda mukatampe.

Sophia: Le ukimba kunena bika?

Michelle: Na binenwa byandi, Satana walombwele amba Eva—kubadila’mo ne bantu bonso—ukekala biyampe pampikwa kuludikwa na Leza. Mu uno mwanda namo, Yehova wādi uyukile’mba muswelo muyampe wa kupwija uno mwanda i kuleka Satana abingije milangwe yandi. O mwanda Leza wālekele Satana aludike ino ntanda mu kitatyi kampanda. Kino kilombola bubinga bwine bwikadile’ko masusu mavule otumona—bwa amba Satana i mulopwe bine wa ino ntanda, * ke Lezapo. Inoko, kudi mwanda muyampe.

Sophia: Le i mwanda’ka?

Michelle: Bible ufundija bubinebine buyampe bubidi butala padi Leza. Bubajinji, Yehova uteñwanga kitatyi kyotususuka. Kimfwa, langulukila pa binenwa bya Mulopwe Davida bisonekelwe mu Mitōto 31:7. Davida wātenwe na masusu mavule mu būmi, ino tala byaānene mu milombelo kudi Leza. Le ubwanya kutanga uno vese?

Sophia: BIYAMPE. Panena amba: “Nkasangalanga ne kusepelela mu lusa lobe; ke-wi-muntu abe ubamone malwa ami, ubayūka . . . tusua [twami].”

Michelle: Inoko, nansha Davida byaātenwe na masusu, wāsengelwe pa kuyuka’mba Yehova wādi umwene bintu byonso byādi bilongeka. Lelo kusengelwepo—na mulangwe wa amba Yehova uyukile bintu byonso, nansha misanshi ya mu malango keibwanyapo kuyukwa ne pa mfulo na bantu bakwabo?

Sophia: Bine, nasengibwa.

Michelle: Bubinebine buyampe bwa bubidi i bwa amba, Leza kakalekapo masusu otususuka endelele nyeke. Bible ufundija’mba panopano ponka usa kufudija buludiki bubi bwa Satana. Kadi usa kulongolola bintu byonso bibi bilupukile’ko, ne bintu bikususula abe ne inobe mwine. Le mbwanya kwiya yenga wiya’mo nkulombole mwanda waka tubwanya kukulupila’mba Leza usa kupwa masusu panopano ponka? *

Sophia: I biyampe.