Kitatyi kyonanga monadi pa bwanuke bimvulujanga mafuku a nsangaji potwadi kunja kunshi kwa France, kwadi kwikalanga bambutwile. Tata wampungile lunswi, ne kadi nadi nswele kupitakana lubilo mu lubanza. Mu mwaka wa 1966, Batumoni ba Yehova betunangila kwetu besamba bivule na tata. Pa kupwa kwa makweji asamba-abidi, watonga kwikala Kamoni. Mama nandi wamulonda’mo, o mwanda bantamije mu kisaka kya nsangaji ya kashā.

Kitatyi kyotwajokēle ku Espanye, ku ntanda ya bambutwile, po pashilwile masusu ami. Nashilula kwivwana misanshi mibi mu makasa ne mu tukukunyu. Pa kupwa kwendaenda ku bamuñanga mu myaka ibidi, twatana dokitele mutumbile kundapa milalekupa, wanena kashā usumininwa amba, “Yō, mubaiya ke mungya kala.” Mama watwa’mo muyoa. Dyo dibajinji kwivwana mu yoya njibo ya mashika mipente bino bishima amba, i “luba lwa zenzeka kelubwanyapo kupwa” ne amba “i milalekupa ya bana.” * Nansha byonkyadipo mbwanya kwivwanijija byonso senene, mwanda nadi nekidi nsongwakaji wa myaka dikumi, ino najingulwile amba i myanda mibi mpata.

Muñanga wanena amba bantweje mu njibo ya kyundapilo kya bana. Ponatwelele’mo, kyansangedilepo ino njibo ya bamupe. Badi na lupusa lubi: Bamasele bantenda lupole ne kumvwika bivwalwa bya babela bya bulebule. Ami amba: ‘Le nsa kubwanya buno būmi namani?’ Enka nanga’byo’tu nenki, ke ndila.

Napelele kulonda bisela bya Bakatolika mu lupitalo, mwanda bambutwile bamfundije kwingidila Yehova. Bamasele bakomenwe kwivwanija kine nkyonapelele. Nalombele Yehova kakingela, kadi na pano neteleka bu ne mulamibwe mu makasa andi pamo bwa tata wa buswe ufumbakanya wandi mwana.

Bambutwile bami bapelwe lupusa lwa kumpempula mu kitatyi kityetye ma Dya Mposo. Badi banselela mabuku esambila pa Bible a kutanga mwanda wa kukomeja lwitabijo lwami. Bana kebadipo na lupusa lwa kwikala na mabuku, ino bamasele baitabije ami ngikale nao pamo ne Bible, nadi  ntanga’o difuku ne difuku. Kadi nadi nsapwila ne bansongwakaji bakwetu lukulupilo lwami lwa kwikala na būmi bwa nyeke mu Paladisa pano pa ntanda, kemukekalapo nansha umo ubela. (Kusokwelwa 21:3, 4) Nansha byonadi ñivwana bulanda ne kwimona bunka kyaba kimo, nadi na nsangaji mwanda wa kukoma kwadi kwenda kukoma lwami lwitabijo ne kikulupiji kyami mudi Yehova.

Myeji isamba pa kupita’po, badokitele banjokeja ku njibo. Misongo yami keyapwilepo ino nasangedile kujokela kudi bambutwile. Maningo ami adi enda onekela’ko, kadi nasusukile bininge. Nashilwile myaka ya busongwakaji na buzoze mpata. Ino nabatyijibwe na myaka 14 musumininwe kwingidila Tata wetu wa mūlu mungya bukomo bwami. Ino kyaba kimo nadi mufityilwa mutyima. Nadi nombela’mba: “Mwanda waka enka ami? Nakwisashila ñundape.” “Le kumwenepo monsusukila’mu?”

Busongwakaji kyadi kitatyi kikomo mpata kondi. Namwene’mba nkikakomapo. Nkyadipo nkokeja kwidingikanya ne bakwetu—mwanda abo badi biyampe, kadi basangela būmi. Nadi nemona bu wambulwa kufwaninwa, ne bumvu. Nansha nabya, ba mu kisaka kyami ne balunda baunkweshe. Mvulukanga nyeke Alicia—wadi munkudile ku myaka 20​—waikele ke mulunda nami wa pa mutyima. Wankweshe ndeke kutala mpata’nka misongo ino nté mutyima ku bintu bikwabo kupita’ko kulangulukila’nka pa makambakano ami.

Ponabwenye myaka 18, nasusukile, misongo yantutuluka, ne kutanwa ku kupwila kwa bwine Kidishitu kwine ke kumpungija. Nansha nabya naingidije “kitatyi kyonadi nakyo” na kwifunda Bible ku njibo na katentekeji. Yoba ne Mitōto i mikanda yaunkweshe ngivwanije’mba Yehova Leza dyalelo bidi, witukwashanga ku mushipiditu pa kyaba kya kwitukwasha ku ngitu. Kulombela kitatyi ne kitatyi kwampele “bukomo butabukile bwikalanga na bantu” ne “ndoe ya Leza itabukile milangwe yonso.”​—2 Kodinda 4:7; Fidipai 4:6, 7.

Ami papo na myaka 22, nakidi enka mu kakinga ka bisheta. Nadi ntyina’mba bantu bakaleka kuntala ami ino ke batale’ko kakinga ka bisheta kadimo mwana-mukaji ubela. Ino kakinga ka bisheta kaunjokejeje bwanapabo bwami, ne kuno “kufutululwa” kwaalamuka ke dyese. Isabel mulunda nami wandingile netūdile’ko kitungo kya kupityija nandi mansá 60 mu mwingilo wa busapudi mu kweji umo.

Uno mulangwe kewansangejepo dibajinji. Ino nalombele bukwashi bwa Yehova, kadi ba mu kisaka ne balunda nabo, baunkweshe ñingile uno mwingilo. Uno kweji wa mingilo mivule wapwile’nka na mu kukopa kwa diso, namona’mba nanekenya moyo ne bumvu. Nasangele bikomo, nafika ne kukwata butyibi bwa kwikala pania wa lonso mu mwaka wa 1996​—mpityija mansá mavule mu mwingilo, kweji ne kweji. Buno bwadi butyibi bulumbuluke’po kasha, bwanengeje mfwene pepi na Leza ne kunkomeja ku ngitu. Kutakamana mu mingilo kwankweshe nsapwile bantu bavule lwitabijo lwami ne kukwasha bamo bekale balunda na Leza.

Mu 2001 mu bushipo, twalongele akishida na motoka, ne maulu ami onso abidi atyumuka. Ami papo nekonda na misanshi pa kitanda mu lupitalo nadi nombela mundamunda’mba: “Nakwisashila abe Yehova kokangela!” Ami mvuya’tu, mwana-mukaji wadi ulele ku kitanda kya pabwipi waungipangula’mba: “Le wi Kamoni wa Yehova?” Nkyadipo na bukomo bwa kunena ino nakunwine’tu’nka mutwe. Aye’mba: “Nemuyukile! Ntañanga mapepala enu kyaba kyonso.” Bino binenwa byaunsengele bininge. Nansha byonadi mu masusu, nabwenye kusapula bukamoni padi Yehova. Bine kino i kyepelo!

Ponadi ngivwana biyampe bityetye nadi nsapula bininge. Mama wadi uñendeja mu kakinga mu lupitalo, maulu ami abidi mele sima. Difuku ne difuku twadi tupempula bantu bamo babela, kwibepangula mobabukile ne kwibapa mabuku esambila pa Bible. Kino kyadi kinkōkeja, ino Yehova wampele bukomo bonadi nsakilwa.

 Myaka mityetye pa kupita’po, luba ne misanshi byabaile’ko ne lufu lwa tata lwambwejeja’ko tusua. Ino, nekankile’ko kūminina. Namani? Ponso pobyadi bibwanika, nadi nshikata pamo ne balunda ne babutule, byo byadi bintalula’ko bidi bulanda. Ino pondi bunka, nadi ntanga, kwifunda Bible, nansha kusapwila bakwetu ku telefone.

Kadi nadi ntompa ne kwipwija mukose, kimfwa kwipolweja mu mpala nansha kukaya ne maluba. Kino kyampele mutyima wa kufwija’ko. Kuzaula nako kwaunkweshe mpata. Difuku dimo potwadi mu busapudi, mulunda nami wadi uñendeja mu kakinga waimene kalembe bya kulemba. Ponka’po kakinga kakunkumuka nami, kupwa nakaponena ku motoka mwimike. Byetusansa batwe bonso, ino pa kumona’mba nkilemekelepo, twatunika ne tusepo.

Kudi bivule bya mu būmi byonkibwanyapo kulonga. Nebitelanga bu bya kulonga kumeso. Divule dine mputanga meso, nashitula “dididisha” dyami ke ntale mu ntanda mipya ilaile Leza. (2 Petelo 3:13) Nemonanga na ami mundapwe misongo ke ntabula ne kusangela būmi ne pa mfulo. Ndamine mu mutyima binenwa bya Mulopwe Davida bya amba: “Tengela Yehova; komeja mu bidyoma, ne mutyima obe ukankamane.” (Mitōto 27:14) Nansha byadi byenda bizozela’ko ngitu yami, Yehova wankomeje. Ñendelelanga na kukomejibwa mu bukōkekōke bwami.