MUTWE WA MWANDA WA PA KIBALU | LELO SATANA UDI’KO BINE?
Lelo Satana Udi’ko?
Kifwatulo kya mu Madrid, mu Eshipanye, kilombola Satana bu mwikeulu ñongojani mupone
“Natamine mu El Salvador. Ino shi napele kukōkela, mama wadi unena’mba, ‘Dyabola yao wiya kukukwata!’ Nami namulondolola’mba, ‘Muleke āye!’ Nkyadipo nkulupile amba Satana udi’ko, ino onadi nkulupile amba udi’ko i Leza.”—ROGELIO.
Lelo witabije bino binenwa bya nkasampe Rogelio? Pa ino milangwe, le i wepi umweka bu wa bine kodi?
Satana kadi’kopo binebine; i kyelekejo’tu kya bubi.
Satana udi’ko, ino kabañangapo ku bilonga bantu.
Satana i kipangwa kya bukomo kya ku mushipiditu kidi na lupusa lukatampe pa bantu.
Ino milangwe yonso kudi ne beikwatakenye, pakwabo i midiyo ya bantu. Ino le kwikala’po na mumweno kampanda kudi na mwanda? En-en, shi Satana kadi’kopo, boba bamumona bu udi’ko i bongolwe na bubine. Shi Satana udi’ko, ino kabañangapo ku bilonga bantu, boba bamutyina, bamutyinanga bya bitupu. Ino, shi Satana i ñongojani wa lupusa, nabya waikala ke kyaka kupita mulangila bantu bavule.
Nanshi tutalei muswelo ulondolola Bisonekwa Bijila bino bipangujo: Le Satana i kika nansha i ani—le i kyelekejo kya bubi’ni nansha i muntu wa ku mushipiditu? Shi i muntu, le Satana uletanga kyaka kodi? Shi uletanga kyaka, le ukekinga namani?
