MUTWE WA MWANDA WA PA KIBALU | SHI MUNTU WAFU
Shi Muntu Wafu, Le Wikalanga Namani?
“Nadi nañanga amba kudi bifuko bisatu kwendanga bantu shi abafu: mūlu, mu kalunganyembo nansha mu kikungilo. Nadi ndyukile amba ami ke ne muntupo muyampe wa kwenda mūlu nansha mubi wa kwenda mu kalunganyembo. Nkyadipo ndyukile senene bilongekanga mu kikungilo. Kashā nadi nkyebitangile mu Bible. I bintu’tu binenanga bantu.”
—Lionel.
“Nadi nañanga amba bantu bonso bendanga mūlu shi abafu, inoko nkyadipo nebikulupile. Nadi monanga amba lufu yo mfulo ya kintu kyonso
—amba kekudipo lukulupilo lwa kumeso ku bafwile.” —Fernando.
Lelo kodi mwiipangule amba: Lelo i bika na bubine bifikilanga bantu pobafwanga? Lelo baswe betu bafwile basusukanga mu kifuko kampanda? Lelo tukemonanga nabo monka? Lelo tubwanya kukulupila namani?’ Tubandaulei byobya na bubine bifundija Bisonekwa. Dibajinji, tubandaulei byobya binena Bible pa lufu. Kupwa tusa kwisambila pa lukulupilo lwitupa Bible, Kinenwa kya Leza.
Lelo bafwe badi mu ngikadilo’ka?
MALONDOLOLO A MU BIBLE: “Bōmi bayukile’mba bakafwa; nanshi bafwe kebayukilepo nansha kimo kine, nansha abo kukamona mpalo mpikila; mwanda kivulukilo kyabo i kivulaminibwe. Byonsololo bitana dikasa dyobe kulongalonga’byo ne bukomokomo bobe, shi bika shi bika; ino kekudipo mingilo nansha kusambakanya bintu pamo miswelo ne miswelo, nansha kuyukidija, nansha ñeni mu kibundu koenda’kwa.” *
Mu kīpi, Kibundu i kokwa kujīkwanga bantu shi abafu; i kifuko nansha ngikadilo ya kyelekejo kwine kekudipo kuyuka kintu nansha kwingila mingilo. Lelo Yoba muntu wa kikōkeji wādi umwene namani kibundu? Wājimije byandi bintu byonso ne bana mu difuku dimo, kadi wakwatwa na luba lwa mpusu ngitu yonso. Wāabija kudi Leza amba: “Ii! shi uswele kumfya mu kibundu [“kalunga-nyembo,” Mukanda Ukola] ne kundama.” (Yoba 1:13-19; 2:7; 14:13, NWT) Na bubine, Yoba kādipo uyukile kibundu bu kalunganyembo ka mudilo, mwine mwa kasusuka bininge. Ino, wādi uyukila amba i mu kifuko kya kukōkolokwa.
Kudi kadi muswelo mukwabo wa kwifunda kuyuka ngikadilo idi’mo bafwe. Tubwanya kubandaula myanda ya mu Bisonekwa bya ku bukomo bwa mushipiditu itala pa bantu mwānda basangwilwe.
Kekudipo muntu nansha umo mu bano bantu mwānda wāsekunwine amba wādi mu kifuko kya nsangaji nansha kya masusu. Shi byadi amba bano bantu bāsangwilwe bāendele mu kino kifuko pobāfwile, mwene longa basekunwinine bantu mokwikadile? Kadi mwene longa yasonekelwe mu myanda ya ku bukomo bwa mushipiditu idi mu Bible mwanda wa bonso beiyuke? Mu Bisonekwa, kemulembelwepo mwanda nansha umo udi namino. Na bubine bano bantu mwānda kebādipo na kakunena nansha kamo pa uno mwanda. Mwanda waka? Mwanda bādi mu ngikadilo ya kubulwa kuyuka kintu, na abo bādi mu tulo twa bukū. Bine, Bible wingidijanga kyaba kimo tulo pa kwisambila pa lufu. Kimfwa, ba Davida ne Shitevani bantu ba kikōkeji ‘baponene mu tulo twa lufu.’
Le penepo, i lukulupilo’ka lotudi nalo pa bafwe? Lelo babwanya kulanguka mu tuno tulo?
^ mus. 7 Mu Bisonekwa Bijila Bushintuludi bwa Ntanda Mipya, kishima “kibundu” kitamba ku kishima kya Kihebelu “Sheole” ne kya Kingidiki “Hadese.” Malamuni amo a Bible engidijanga kishima “kalunganyembo,” inoko mulangwe wa kususulwa kwa bafu mu mudilo keukwatañenepo na Bisonekwa.
Tala'po Bidi ne Bino:
KITEBA KYA MULAMI
Lelo na Bubine Yesu Wāsangwile Bantu?
Lelo nsangukilo yālongele Yesu itala namani pa milao yandi ya mafuku a kumeso?
