Maria Lúcia wa mu Brésil udi ne disama dibi didibu babikila ne: syndrome de Usher, disama ditu dinyanga lumonu lua muntu anyi lumvu luende; ndisama ditu baledi basambulujila bana. Bavua bamulele kamama, kulongaye muakulu wa tumama patshivuaye muana. Pashishe, pakakumbajaye bidimu 30 yeye kutuadija kujimija lumonu. Nansha muvuaye utata, kavua muditole to. Too ne mpindieu ukadiye ne bidimu bipite pa 70, udi anu ne nsombelu muimpe wa disanka.

 Maria Lúcia wakatuilangana ne Bantemu ba Yehowa mu 1997, kumpala kua kutuadijaye kujimija lumonu. Udi wamba ne: “Ngakatuilangana ne nsonga mukuabu utuvua balonge nende diende Adriano, utshivua uluilaku pende Ntemu. Kungambilaye mulayi wa Nzambi wa kuvuija buloba Mparadizu, muaba wikala bantu bonso ne makanda a mubidi tumatuma. Biakansankisha bikole, meme kuitaba bua bikale balua kundongesha Bible. Matuku makese pashishe, meme kutuadija kubuela mu bisangilu mu Rio de Janeiro, muvuabu bakudimuna bimue bisangilu mu muakulu wa tumama. Yehowa wakangambuluisha bua kuya kumpala, meme kulua kubatijibua mu ngondo wa 7 mu 1978.”

 Panyima pa tshikondo kampanda, Maria Lúcia wakaya mu tshisumbu muvua Ntemu nansha umue kayi mumanye muakulu wa tumama to. Ku ntuadijilu kabivua bipepele to, bualu kavua umvua bivuabu bamba mu bisangilu to. Kadi bana betu ba bakaji babidi bakamuambuluisha. Bavua basomba nende mu bisangilu ne bafunda bivuabu bambamu. Maria Lúcia udi wamba ne: “Patuvua tufika kumbelu, mvua mbala bivuabu bafunde abi misangu ne misangu bua meme kushisha kumvua. Pashishe bana betu ba bakaji abu bakalonga muakulu wa tumama, kushalabu bakudimuna bimvua ngamba.”

 Bu muvua lumonu lua Maria Lúcia luenda lunyanguka bikole, kavua kabidi umona bivua bantu bakuabu bavua bakula muakulu wa tumama bakudimuna to. Ke kutuadijaye kuyukila ne bantu mu muakulu wa tumama wa ulenga bianza bia muntu. Ke wa bishi au? Udi wamba ne: “Ndi nteka bianza bianyi pamutu pa bia muntu udi unkudimuina. Pandi ngenza nanku ndi mmanyina tshidibu bamba ku mushindu udiye unyungisha minu.”

 Maria Lúcia udi ne dianyisha dia bungi bua mudimu udi bana betu badi bamuambuluisha benza. Udi wamba ne: “Badi dipa dia mushinga mukole dia kudi Yehowa. Badi bangambuluisha bua kumvua bisangilu, mpuilu, ne mpungilu.”

 Maria Lúcia udi uyisha ngondo yonso. Udi uyisha tumama tukuabu mu muakulu wa tumama wa ulenga bianza bia muntu. Tumama atu tudi tukema bikole ne tusanka bua kumona mudiye udienzeja bua kutuyisha lumu luimpe. Mu tshikondo tshia tshipupu tshia Covid-19, Maria Lúcia mmufundile tumama mikanda mipite bungi, bamuambuluisha kudi muakunyende wa balume José Antônio udi pende mpofu muikale kamama. a

 Maria Lúcia udi wenza nanku mushindu kayi? Udi wamba ne: “Ntu nkuata mudimu ne kantu ka tshindundu kadi kenze bu dileta dia L. Kadi kangambuluisha bua kufunda milongo milulame ne kukosa bikoso. José Antônio udi ne lungenyi lutue bikole. Utu ungambila biena-bualu bia kufunda ne mvese, ndua panyi kubifunda mu mikanda. Ntu ndienzeja bua kufunda mu mushindu udi tumama mua kumvua. Tumama tuonso ki ntuibidilangane ne muakulu udibu bafunda to.”

 Nansha mukadi Maria Lúcia katshiyi umona kabidi, udi anu muenji wa mudimu. Karoline umue wa ku badi bamukudimuina bidi bantu bamba udi wamba ne: “Maria Lúcia utu wenza midimu yonso ya ku nzubu, umulama bimpe ne mankenda. Utu munange kulamba biakudia ne kubidia ne balunda bende.”

 Jefferson mukulu wa tshisumbu tshia ba Maria Lúcia udi wamba ne: “Maria Lúcia mmunange Yehowa bikole. Mmunange kabidi bantu. Utu wenza malu anu bua diakalenga dia bakuabu. Mmuntu utu musue kuambuluisha bakuabu.”​—Filipoyi 2:4.