Madián ne Marcela badi Bantemu ba Yehowa bavua ne nsombelu wa manyi mu Medellín, mu ditunga dia Colombie. Madián uvua wenza mudimu uvuabu bamufuta bimpe; mudimu au uvua ubambuluisha bua kusomba muaba muimpe mutambe. Kadi bualu kampanda buakabasaka bua kutangilula malu avuabu bateka pa muaba wa kumpala. Badi bamba ne: “Mu 2006 tuakabuela mu mpuilu wa pa buende wa dituku dimue uvua ne tshiena-bualu tshia ‘Tuikale ne dîsu dimpe.’ Miyuki ya bungi yakatukankamija bua kukepesha malu mu nsombelu wetu bua tuenzele Nzambi mudimu bikole. Patuakapingana kumbelu tuetu kujingulula ne: tuvua tuenza malu wetu mushindu. Tuvua tusumba bintu misangu yonso katuyi tuela meji to ne tuvua ne mabanza a bungi.”

 Miyuki ya mu mpuilu au yakafikisha Madián ne Marcela ku dibanga kupepeja nsombelu wabu. Badi bamba ne: “Tuakatuadija kutula makuta makese. Tuetu kumuangala kuya kusombela ku nzubu mukese menemene, tuetu kupana mashinyi etu, tuetu kusumba moto.” Bakalekela kuya miaba ivua mua kubasaka bua kuikala kusumba anu bintu. Bakabanga kupitshisha dîba diabu dia bungi mu diambila bakuabu malu a mu Bible. Bakalua balunda ba bantu bavua benzela Yehowa Nzambi mudimu ne tshisumi bu mudi bampanda-njila ba pa buabu. a

 Madián ne Marcela bakadisuika kabidi ne lukasa bua kualabaja mudimu wabu wa diyisha, kuyabu mu tshisumbu tshikese tshivua dijinga ne bamanyishi. Nunku Madián wakalekela mudimu uvuaye wenza. Bu muvua mfumuende wa mudimu kayi mumvue dipangadika diende adi, Madián wakamueleshisha meji nunku: “Utu ne makuta a bungi, kadi utu ne disanka anyi?” Wakamuandamuna ne: tòo, bualu uvua ne malu a bungi avuaye kayi mua kujikija to. Ke yeye kumuambila ne: “Tshidi ne mushinga ki mbungi bua makuta audi nawu to, kadi nkupeta tshidi mua kukupetesha disanka dilelela. Mudimu wa kulongesha bantu malu a Nzambi ke udi umpetesha meme ne muena kuanyi disanka. Tudi basue kufila dîba dietu bikole mu mudimu eu bua kuikala ne disanka dia bungi.”

 Kuteka mudimu wa Nzambi pa muaba wa kumpala nkupeteshe Madián ne Marcela disanka dia bungi. Kukadi bidimu 13 bidibu mu bisumbu bidi ku Nord ouest kua ditunga dia Colombie bidi dijinga ne bamanyishi ba bungi. Mpindieu badi ne disanka dia kuikala bampanda-njila ba pa buabu.