Mu tshiena-bualu etshi

•  Kutantshilangana kudi kumvuija tshinyi?

•  Ukadi mukumbane bua kutantshilangana anyi?

 Bamue batu bamona ditantshilangana bu bualu budi busekesha budibu mua kuenza patupu. Kadi mu tshiena-bualu etshi, tudi tuakula bua kutantshilangana padi nsongalume ne nsongakaji bamonangana bua kumanya bikalabu bakumbanangane bua bobu kuselangana. Nunku kutantshilangana kudi ne tshipatshila. Ki nkumvua anu bimpe patupu bua kuikala ku luseke lua muntu wa mubidi mukuabu to.

 Bibande bipueka, nebangate dipangadika edi: kuselangana anyi kuimanyika dimonangana. Paudi ubanga kutantshila muntu, mbimpe wikale ne malu abidi au mu mutu.

 Tshia kukuata: Wewe mumone ne: ukadi mukumbane bua kutantshilangana, udi kabidi mumone ne: ukadi mukumbane bua kubuela mu dibaka.

 Bu mudi kutantshilangana mua kufikisha ku dibaka, mbimpe umanye bumuntu buebe ne bikadilu biebe. Tshilejilu, konkonona malu adi alonda aa:

•   Malanda ebe ne bena mu dîku: Mushindu uudi wenzela baledi bebe ne bana benu malu, nangananga paudi ne malu makutonde udi utamba kuleja muwenzela muena dibaka nebe malu.

   Mêyi a mu Bible: “Nulekele dilaminangana munda dibi dia mishindu yonso, tshiji, bumfiika munda, dielelangana mbila, bipendu ne malu a mishindu yonso adi enzelangana bibi.”​—Efeso 4:31.

   Dikonka ne: ‘Baledi banyi ne bana betu batu bamba ne: ntu mbanemeka anyi? Patudi katuyi tumvuangana, ntu ntukija anyi? Peshi dikokangana ditu difikisha ku matandu bualu ntu mfiika tshiji lukasa?’

•   Lungenyi lua didifila: Paudi ubuela mu dibaka, newikale ne bua kumvua muena dibaka nebe ne misangu ya bungi kuenza tshidiye musue.

   Mêyi a mu Bible: “Muntu yonso katungunuki ne kukeba anu diakalenga diende nkayende, kadi atungunuke ne kukeba dia muntu mukuabu.”​—1 Kolinto 10:24.

   Dikonka ne: ‘Ntu musue bua malu enzeke anu mundi musue anyi? Mbamanye bu muntu udi kayi ne malu makole anyi? Ntu ne tshikadilu tsha kuteka majinga a bakuabu kumpala kua anyi meme anyi?’

•   Kudipuekesha: Muena dibaka muimpe udi witaba bilema biende ne ulomba muena dibaka nende luse ne muoyo mujima.

   Mêyi a mu Bible: “Tuetu bonso tutu tuenza bilema misangu ya bungi.”​—Yakobo 3:2, dimanyisha dia kuinshi kua dibeji.

   Dikonka ne: ‘Ntu ngitaba bilema bianyi anyi ntu ndibingisha? Ntu mfiika munda lukasa patubu bampesha mibelu anyi?’

•   Makuta: Bilumbu bia bungi mu dibaka bitu bua makuta. Ke bualu kayi mbimpe kumanya mua kuatula bimpe.

   Mêyi a mu Bible: “Nnganyi wa kunudi udi musue kuibaka tshibumba kayi wanji kusomba, ubadika bungi bua makuta adiye ne bua kutula bua kumona ni udi ne bintu bikumbane bua kutshijikija?”​—Luka 14:28.

   Dikonka ne: ‘Ntu ntula makuta anyi bimpe anyi? Ntu mbuela mabanza misangu yonso anyi? Mmunyi munkadi muleje ne: ntu ntula makuta anyi ne meji?’

•   Malu a mu nyuma: Biwikala Ntemu wa Yehowa, udi ne bua kuikala ne tshibidilu tshia kudilongela Bible ne kubuela mu bisangilu bia tshisumbu.

   Mêyi a mu Bible: “Badi bamanye ne: badi dijinga ne malu a mu nyuma mba diakalenga.”​—Matayi 5:3.

   Dikonka ne: ‘Ntu ndienzela malu a mu nyuma nkayanyi anyi? Ntu nteka malu a mu nyuma kumpala anyi ntu ndekela malu makuabu a mpitshishila dîba?’

 Tshia kukuata: Kakuena muntu utu musue kuselangana ne muntu udi kayi mukumbane to. Nanku, dienzeja bua kukola ne kuakaja bikadilu biebe. Neupete diakalenga dia kupeta muntu udi wenza malu diatshimue nebe.