“Katulekedi kuenza malu mimpe nansha, bualu netupuole mu tshikondo tshiakane tuetu katuyi batshioke.”​—Galatiya 6:9, Nkudimuinu wa bulongolodi bupiabupia.

 “Katupungidi ne dienza dia malu mempe, bualu pakumbana diba, netuvue kunowa patuikala katuyi batekete.”​—Galatiya 6:9, Mukanda wa Mvidi Mukulu (Katolike).

 Mupostolo Paulo udi ukankamija bena Kristo bua batungunuke ne kuenza tshidi tshiakane anyi malu mimpe ku mêsu kua Nzambi. Bobu batungunuke ne kuenza nanku, bikale batuishibue ne: Nzambi neabafute.

 ‘Katulekedi nansha.’ Badi mua kukudimuna tshiambilu etshi ne: “katupungidi.” Muaku wa mu tshiena Greke eu, udi mua kumvuija kubenga kuteketa mu mikolo anyi kujimija tshisumi tshietu. Padi mupostolo Paulo mudiele pende mu bualu ebu, bidi bileja ne: kuvua misangu ivuaye uluangana pende ne diteketa mu mikolo.​—Lomo 7:21-24.

 “Malu mimpe,” adi akongoloja malu onso adi muena Kristo ne bua kuenza mu mudimu wa Nzambi. Mu malu au, mudi midimu itu muntu wenza bua diakalenga dia bena kuitabuja nende ne bantu bakuabu.​—Galatiya 6:10.

 “Netupuole mu tshikondo tshiakane tuetu katuyi batshioke.” Paulo udi uvuluija babadi ne: bidi mua kubangata dîba dia bungi bua kupeta masanka padibu benza malu mimpe, anu bu mutu tshidime windila mutantshi bua bia pa madimi kukola. Padi Paulo muakule bua kupuola, mmuleje dipetangana dia mvese eu ne bulelela bua nshindamenu budi mu mvese wa 7 ebu: “Tshionso tshidi muntu ukuna, ke tshiapuolaye kabidi.” Mu mêyi makuabu, padi muena Kristo wenza malu mimpe ku mêsu kua Nzambi, neapuole difutu dinene dia muoyo wa tshiendelele.​—Lomo 2:6, 7; Galatiya 6:8.

 Mupostolo Paulo wakafundila bena Kristo ba mu Galatiya mukanda eu bu mu 50-52 P.Y. Wakenza nanku bua kukuba bena Kristo kudi bantu bavua bamba mudibu bena Kristo, kadi bakonyangaja malongesha a Kristo. (Galatiya 1:6, 7) Balongeshi ba dishima abu bavua bamba ne: bena Kristo badi ne bua kutumikila Mikenji ivua Nzambi mupeshe tshisamba tshia Isalele wa kale ku butuangaji bua Mose. (Galatiya 2:15, 16) Paulo wakumvuija ne: Mikenji ikavua mikumbaje tshivuabu bayifundile ne batendeledi ba Nzambi kabavua ne bua kuyitumikila kabidi to.​—Lomo 10:4; Galatiya 3:23-25.

 Pavua Paulo ukankamija bena Kristo nende bua batungunuke ne “kuenza malu mimpe,” kavua wamba bua batumikile Mikenji ya Mose to. Kadi uvua ubakankamija bua ‘bakumbaje mukenji wa Kristo,’ udi ukongoloja malu onso avua Yezu mulongeshe bua kuenzela bakuabu malu mimpe.​—Galatiya 6:2; Matayi 7:12; Yone 13:34.

 Tangila filme muîpi eu bua kumona kadiosha ka mukanda wa Galatiya.