“Kanuditatshishi bua dituku didi dilonda nansha, bualu dituku didi dilonda nedikale ne yadi ntatu. Dituku ne dituku didi ne yadi ntatu idi midikumbanyine.”​—Matayi 6:34, Nkudimuinu wa bulongolodi bupiabupia.

 ‘Kanutambi kuelangana meji a makelela, bualu bua makelela neadielelangane meji. Lutatu lua ku dituku ne ku dituku ludi lukumbane.’​—Matayi 6:34, Mukanda wa Nzambi.

 Yezu ke uvua muambe mêyi au. Uvua ujadikila bantu bavua bamuteleja ne: kabivua bikengela bikale batamba kusamisha mutu, anyi kuditatshisha bikole bua ntatu ya matuku atshilualua to. Bivua bimpe bikale bimanyina anu pa ntatu ya ku dituku.

 Yezu kavua usua kuamba ne: katuena ne bua kuelela makelela meji anyi kulongolola malu atuenza matuku atshilualua to. (Nsumuinu 21:5) Kadi, uvua utuambuluisha bua katuikadi tutamba kusamisha mutu, anyi kuditatshisha bua malu ikale mua kuenzeka makelela to. Kanyinganyinga ka nanku kadi mua kutujimijila disanka dietu ne kutupangisha bua kuenza midimu itudi ne bua kuenza. Katuena mua kujikija ntatu ya matuku atshilualua tuetu tusamisha mutu bua bualu buayi lelu to. Misangu ya bungi, malu atutu tusamishila mutu kaatu enzeka anyi nansha owu menzeke kaatu anu bibi mutuvua bele meji to.

 Mêyi a Yezu au nga mu muyuki wende wa pa mukuna udi muende lumu, udi mu Matayi nshapita 5-7. Yezu wakumvuija mu muyuki wende au ne: kutamba kuditatshisha kakuena mua kulengeja nsombelu wetu anyi kulepesha matuku a muoyo wetu to. (Matayi 6:27) Wakamba kabidi ne: patudi tuteka Nzambi kumpala mu nsombelu wetu, kabiena bikengela tuikale tutamba kuditatshisha bua makelela to. Nzambi utu utabalela bikunyibua ne nyama, ne neatabalele kabidi badi bamuenzela mudimu.​—Matayi 6:25, 26, 28-33.