Bukalenge bua Nzambi mbulamatadi mulelela udi Yehowa Nzambi mujadike mu diulu. Bible udi ubikila kabidi “Bukalenge bua Nzambi” ne: “Bukalenge bua mu diulu.” (Mâko 1:14, 15; Matayi 4:17) Bukalenge abu mbufuanangane ne makalenge a bana ba bantu mu malu a bungi, kadi buobu mbupite makalenge au kule ne kule mu mishindu yonso.

•   Bakokeshi. Nzambi mmuteke Yezu Kristo Mukalenge wa bukalenge buende. Mmumupeshe bukoshi bua bungi butu mfumu nansha umue pa buloba kayi muanji kupeta to. (Matayi 28:18) Yezu udi wenzelangana malu mimpe ne bukokeshi buende ebu, bualu ukadi muleje ne: Mmulombodi wa kueyemena udi uditeka pa muaba wa bakuabu. (Matayi 4:23; Mâko 1:40, 41; 6:31-34; Luka 7:11-17) Ku bulombodi bua Nzambi, Yezu mmusungule bantu ba mu bisamba bionso badi ne bua ‘kukokesha nende mu diulu bu bakalenge pa buloba.’​—Buakabuluibua 5:9, 10.

•   Matuku. Bukalenge bua Nzambi mbushilangane ne makalenge a bana ba bantu adi kaayi anenga to, bualu buobu ‘kabuakubutudibua nansha kakese.’​—Danyele 2:44.

•   Bena dia bukalenge. Muntu yonso udi wenza tshidi Nzambi ulomba, udi mua kulua muena dia Bukalenge bua Nzambi nansha yeye wa mu tshisamba kayi anyi muledibue muaba kayi.​—Bienzedi 10:34, 35.

•   Mikenji. Mikenji ya Bukalenge bua Nzambi idi yenza malu a bungi kupita kukandika patupu dienza dia malu mabi. Idi ibandisha bikadilu bia bena dia bukalenge. Tshilejilu, Bible udi wamba ne: “‘Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.’ Eu ke mukenji mutambe bunene ne wa kumpala. Muibidi udi mufuanangane nawu nguowu eu: ‘Udi ne bua kunanga mukuebe bu muudi mudinange.’” (Matayi 22:37-39) Dinanga Nzambi ne bantu didi disaka bena dia bukalenge bua kuenza muabu muonso menemene bua diakalenga dia bakuabu.

•   Dilongesha. Nansha mudi Bukalenge bua Nzambi buelela bena diabu mikenji mitumbuke ya kulonda, budi kabidi bubalongesha mua kuyitumikila.​—Yeshaya 48:17, 18.

•   Mudimu. Bukalenge bua Nzambi kabuena buvuija bakokeshi babu babanji, bulengulula bena dia bukalenge to. Kadi nebuenze disua dia Nzambi ne nebukumbaje mulayi wa ne: bonso badi banange Nzambi nebikale ne muoyo kashidi mu Mparadizu pa buloba.​—Yeshaya 35:1, 5, 6; Matayi 6:10; Buakabuluibua 21:1-4.