Bible mmuakule bua nsalu anu muaba umue, mu Lewitiki 19:28. Udi wamba ne: “Kanuena ne bua kuditapa nsalu pambidi.” Nzambi uvua muelele bena mu tshisamba tshia Isalele mukenji eu bua bikale bashilangane ne bena mu bisamba bivua bidie nabu mutumba bavua badifunda mêna pambidi anyi bafundamu bimfuanyi bia nzambi yabu. (Dutelonome 14:2) Nansha mudi mikenji ivuabu belele bena Isalele kayiyi itangila bena Kristo, bidi bikengela kuela meji bikole bua dîyi dinene didi mu mukenji udi wakula bua nsalu eu.

Muena Kristo udi mua kuditapisha nsalu pambidi anyi kudizoleshapu bintu anyi?

 Mvese idi ilonda eyi idi mua kukuambuluisha bua kuela meji bimpe mu bualu ebu:

•   “Bakaji badilengeje ne . . . bupuekele.” (1 Timote 2:9) Dîyi dinene edi didi ditangila bantu bonso, bakaji ne balume. Tudi ne bua kunemeka mmuenenu wa malu udi nende bakuabu ne katuena ne bua kukoka ntema yabu kutudi mu mushindu mupitshidile to.

•   Kudi bantu batu baditapa nsalu bua kuleja tshidibu anyi bua kuleja mudibu ne budikadidi; bakuabu bobu batu baditapayi bua kuleja ne: badi mua kuenza ne mubidi wabu tshionso tshidibu basue. Kadi Bible udi ukankamija bena Kristo ne: “Nufile mibidi yenu bu mulambu udi ne muoyo, wa tshijila ne udi muanyishibue kudi Nzambi, mudimu wa tshijila muenza ne tshieledi tshienu tshia meji.” (Lomo 12:1) Enza mudimu ne ‘tshieledi tshiebe tshia meji’ bua kumanya tshiudi ukeba kuditapila nsalu pambidi. Udi wenza nanku bualu ke mutu bantu benza anyi? Peshi udi ujinga kuleja muudi muena mu tshisumbu kampanda? Vuluka ne: mmuenenu webe wa malu au udi mua kulua kushintuluka kadi nsalu yoyi ikushala pambidi. Wewe mukonkonone tshidi tshikusaka bua kuditapa nsalu pambidi bidi mua kukuambuluisha bua kuangata dipangadika dimpe.​—Nsumuinu 4:7.

•   “Malu adi bantu badi benza mudimu ne muoyo mujima balongolola adi bushuwa afika ku dikumbana, kadi bantu bonso badi balubakana mbatangile bushuwa ku bupele.” (Nsumuinu 21:5) Misangu ya bungi, patu bantu bangata dipangadika dia kuditapa nsalu pambidi, batu badiangata mu tshiputuku anyi mu dilubakana. Kabatu bela meji a tshidi bualu ebu mua kulua kuenzela malanda abu ne bakuabu anyi mudimu wabu to. Nsalu itu itamba kulomba makuta a bungi bua kuditapishayi ne bitu bisama bikole bua kuyumbusha pambidi. Tshidi makebulula adibu benze tshileja ne tshidi bantu batu benza mudimu wa diumbusha nsalu pambidi bamba tshidi tshileja ne: bantu ba bungi batu baditapisha nsalu pambidi batu balua kudiela meji bamba ne: bu bobu bamanye, kabavua baditapishayi to.