Didikanda nkuikala mukumbane bua

• kubenga kukumbaja diakamue dijinga dietu kampanda

• kukanda majinga mabi

• kukumbaja tshidi tshikengedibua nansha kabiyi ku disua dietu

• Kuteka malu a bakuabu kumpala kua etu

Bana batu ne didikanda dia bungi badi mua kukandamena mateta, nansha owu mua kubapetesha masanka a tshitupa tshîpi. Kadi bana badi ne didikanda dikese badi mua kuikala pamuapa

• ne luonji lua bungi

• babungama tshianana tshianana

• banua bintu bidi bikuata anyi bakuatshika maluvu

• basungula bua kudia bintu bidi kabiyi bikuatshisha mubidi

Bilondeshile makebulula adibu benze mbamone ne: bana bavua ne didikanda dia bungi kabatu pamuapa batamba kusama, anyi bapeta tunyinganyinga tua malu a mpetu peshi batata bua kutumikila mikenji padibu bakola to. Makebulula au akafikisha mulongeshi kampanda wa mu iniversite wa Pennsylvanie diende Angela Duckworth ku diamba ne: “Kakutu pamuapa tshintu tshikuabu tshidi ne ‘mushinga wa bungi’ kupita didikanda to.”

Tòo webe ikale anu tòo.

DÎYI DINENE DIA MU BIBLE: “Dîyi dienu dia ne: ‘Eyowa,’ dikale anu eyowa; dia ne: ‘Tòo,’ dikale anu tòo.”​—Matayi 5:37.

Bana batshidi bapuekele badi mua kubenga dipangadika kampanda didi baledi babu bangata pa kuasa muadi mukole, pamuapa nansha munkatshi mua bantu. Muledi yeye mulekele muana wenza tshidi tshimusankisha, muana neamone ne: kuasa muadi mukole ke mushindu muimpe wa kushintulula dipangadika dia baledi.

Ku lukuabu luseke, muledi yeye mubenge bualu mububengelamu, muana udi mua kulonga bualu bunene bua mu nsombelu bua ne: misangu yonso katuena mua kupeta tshitudi tujinga to. Doktere David Walsh wakafunda ne: “Udi mua kuela meji ne: muntu udi upeta tshintu tshionso tshidiye musue udi ne disanka, kadi kabitu anu nanku to. Bantu badi balonge mua kudikanda badi ne disanka dia bungi. Ki mbimpe kulekela  bana bakola ne lungenyi lua ne: misangu yonso nebapete tshintu tshionso tshidibu basue to.” *

Wewe mubengele muana bualu mubengelamu, nebimuambuluishe mu matuku atshilualua bua kubenga pende malu bu mudi padibu bamuteta bua kunua bintu bidi bikuata, bua kuenda masandi, anyi kuditua mu dienza malu makuabu mabi.

Ambuluisha bana bebe bua bamanye bipeta bimpe ne bibi bia bualu kampanda.

DÎYI DINENE DIA MU BIBLE: “Tshionso tshidi muntu ukuna, ke tshiapuolaye kabidi.”​—Galatiya 6:7.

Mbimpe muanebe amanye ne: malu adiye wenza neapatule bipeta bimpe anyi bibi, ne yeye kayi udikanda neapatule bipeta bibi. Tshilejilu, muanebe yeye ufiika munda dîba dionso didi bualu kabuyi bumusankisha, bantu nebatuadije kumuepuka. Ku lukuabu luseke, yeye mumanye mua kudikanda padibu bamuyobola anyi mumanye mua kuikala ne lutulu pamutu pa kusunuka, bantu nebamunange. Ambuluisha muanebe bua amanye ne: neapete diakalenga yeye udikanda.

Longesha muanebe bua amanye malu adi ne mushinga wa bungi.

DÎYI DINENE DIA MU BIBLE: ‘Numanye malu adi ne mushinga wa bungi.’​—Filipoyi 1:10.

Didikanda ki nganu kubenga patupu bua kuenza bualu kampanda bubi to, kadi nkuenza tshidi tshikengedibua nansha biobi kabiyi nangananga bitusankisha. Mbimpe muanebe amanye mua kusunguluja malu ne ateke adi ne mushinga wa bungi pa muaba wa kumpala. Tshilejilu, udi ne bua kuteka midimu yende ya mu kalasa pa muaba wa kumpala ne kunaya pashishe.

Ikala tshilejilu tshimpe.

DÎYI DINENE DIA MU BIBLE: “Ndi munushile tshilejilu, bua nuenu nuenze penu anu bu mundi munuenzele.”—Yone 13:15.

Muanebe neamone tshiudi wenza paudi utuilangana ne bualu kampanda budi bukutonda. Leja ku tshilejilu tshiebe ne: didikanda didi dipetesha bipeta bimpe. Tshilejilu, padi muanebe wenza bualu kampanda bubi, utuku wenza malu ne tshiji anyi utu ushala ne lutulu?