Bantu badi bamanye mua kudiambuila bujitu batu ba kueyemena. Batu benza midimu itubu babapesha bimpe ne bayikumbaja yonso pa dîba.

Bana batekete nansha bobu kabayi banji kumanya malu a bungi badi mua kutuadija kudiambuila majitu. Mukanda kampanda udi wamba ne: “Patshidi muana ne ngondo 15 udi mua kutuadija kuenza tshidi baledi bamuambila ne padiye ukumbaja ngondo 18 udi mua kujinga kuenza pende midimu idi baledi benza. Miaba ya bungi baledi batu batuadija kupesha bana midimu ya kumbelu padibu bakumbaja bidimu pankatshi pa bitanu ne muanda mutekete, ne bana badi bafika ku diyikumbaja bimpe.”​—Parenting Without Borders.

Tshipungu kampanda tshidibu babikila mu mfualansa ne: génération boomerang tshidi tshileja bansonga badi bumbuka kudi baledi babu bualu mbasue kudienzela malu, kadi padi nsombelu ubakolela badi bapingana kabidi bua kusomba ne baledi babu. Imue misangu bitu bienzeka nunku bualu bansonga aba kabavua babalongeshe mua kuepuka butulavi bua makuta, bua kuikala kulongolola mu nzubu, anyi kukumbaja malu a ku dituku ne ku dituku to.

Nunku mbitambe buimpe bua kulongesha bana bua bamanye mua kudiambuila majitu abu. Mukanda mukuabu udi wamba ne: “Ki mbimpe kuikala kuenzela bana malu onso too ne padibu bakumbaja bidimu dikumi ne muanda mukulu ne pashishe kubalekela bua badiambuile bujitu buabu to.”​—How to Raise an Adult.

Kubapesha midimu ya kumbelu.

DÎYI DINENE DIA MU BIBLE: “Mudimu mukole wonso udi ne difutu.”​—Nsumuinu 14:23.

Bana batu basue kuenza midimu pamue ne baledi babu. Bu mudibu ne dijinga edi, udi mua kuikala ubapesha midimu ya kuenza kumbelu.

Bamue baledi kabatu basue kupesha bana mudimu wa kuenza to. Batu badiambila ne: bu mukadi bana ne midimu ya bungi ya mu kalasa ya kuenza dituku dionso, nunku ki mbimpe kubakumbajila bujitu bukuabu to.

Pabi bana batu benza midimu ya kumbelu batu bakuata mu kalasa bualu midimu eyi idi ibambuluisha bua kuitaba midimu mikuabu idibu babapesha ne kuyikumbaja. Mukanda udi wakula bua baledi utukadi batele udi wamba kabidi ne: “Patudi tulengulula dijinga didi nadi bana dia kukuatshisha baledi patshidibu bapuekele, badi mua kuela meji ne: kuambuluisha bakuabu kakuena ne mushinga to . . . Batekemena kabidi bua bikale babenzela malu onso.”​—Parenting Without Borders.

 Anu mudi mukanda eu uleja, kuenza midimu ya kumbelu kudi kulongesha bana bua kuikala kukuatshisha bakuabu pamutu pa kuindila bua babakuatshishe anu bobu, kuikala kufila pamutu pa kuindila anu bua babapeshe. Midimu ya kumbelu idi yambuluisha bana bua kumanya ne: badi ne mushinga mu dîku ne badi ne bua kuikala bakumbaja bujitu buabu.

Ambuluisha bana bua bikale bitaba bilema bidibu benza.

DÎYI DINENE DIA MU BIBLE: “Teleja mubelu ne itaba dinyoka, bua ulue muena meji mu matuku ebe atshilualua.”​—Nsumuinu 19:20.

Padi bana benza bilema, tshilejilu muanebe wa balume anyi wa bakaji yeye munyange tshintu tshia muntu, kusokoki bualu abu to. Bana badi mua kuitaba bilema biabu, nunku badi mua kulomba luse anyi pamuapa mene kufuta tshintu tshidibu banyange atshi.

Kuitaba bilema nekuambuluishe bana bua

• kuikala bena bululame

• kubenga kuela bakuabu tshilumbu pambidi

• kubenga kudibingisha

• kulomba luse padibi biakanyine