FUANYIKIJA BUALU EBU: Udi mu tshilaminu tshia bintu bia kale tshiuwule ne bintu bia bungi, wenda utangila bintu bidimu. Bia bungi bia kudibi bidi ne masoso, mbinyanga kudi mvula anyi munya, ne mbidiike. Bikuabu bidi ne bimue bitupa binene bipangike. Kadi udi umona tshintu tshikuabu tshikale tshiotshi anu tshijima; udi umona bimpe muvuabu batshienze too ne mu katoba. Udi webeja muntu udi wenda unulejabi ne: “Etshi ntshipiatshipia kupita bikuabu anyi?” Udi wandamuna ne: “Tòo, ntshia kale kupita bia bungi bia kudibi, ne kabatu banji kutshienzulula to.” Udi umuebeja ne: “Tshivua tshiotshi tshilamina muaba kampanda muimpe anyi?” Yeye udi ukuandamuna ne: “Tòo, mbatshitute kudi mpepele mibi menemene ne mvula. Pashishe bantu ba bungi mbatete bua kutshinyanga.” Udi mua kukema udiebeja ne: ‘Ntshienza ne tshinyi?’

Mu mushindu kampanda Bible udi anu bu tshintu tshia kale tshia dikema etshi. Mmukanda wa kale menemene mupite mikanda ya bungi. Bushuwa kudi mikanda mikuabu ya kale. Kadi anu bu bintu bia kale bidi bidiike, mikanda ya bungi ya kale mminyanguke bikole mu bungi bua matuku. Tshilejilu, mamanya a mpindieu adi ne bijadiki adi abengangana ne malu adi mikanda eyi yamba bua malu a sianse. Mibelu idimu bua malu a ngondapilu idi misangu ya bungi imueneka ne njiwu pamutu pa kuambuluishayi. Mikanda ya bungi ya kale ikadi mishale anu bitupa tshianana; bitupa bikuabu bikadi bijimine anyi binyanguke bibi menemene.

Kadi Bible yeye mmushilangane ne mikanda eyi bikole. Bakatuadija kumufunda kukadi bidimu bipite pa 3500, kadi utshidi anu muvuabu bamufunde amu. Nansha muvuabu bamuluishe misangu ne misangu munkatshi mua bidimu (bamuoshe, bamukandike, ne kabayi bamuangate ne mushinga), malu adimu mmatantamene buluishi buonso abu. Pamutu pa kumueneka mujikile matuku bilondeshile mamanya mapiamapia, malu a bungi adi Bible wamba adi aleja muvuaye mudianjile kuakula bua malu atshivua alua mu mushindu wa  dikema.​—Tangila kazubu ka ne: “Ukadi mupitshile matuku anyi udi wakula bua malu atshivua alua?”

Kadi udi mua kudiebeja ne: ‘Malongesha adi mu Bible adi mua kutuambuluisha matuku etu aa bushuwa anyi?’ Bua kuandamuna, diebeja ne: ‘Mmalu mabi kayi adi bantu batuilangana nawu lelu? Ngepi adi enza buôwa bikole?’ Pamuapa udi wela meji bua mvita, dinyanguka dia kapepe, dishipangana, anyi dikosangana dia mishiku. Mpindieu tangila amue malu adi Bible ulongesha. Paudi wenda uakonkonona, diebeja ne: ‘Bu bantu bikale balonda malu aa, buloba kabuvuaku mua kuikala muaba muimpe anyi?’

KUNANGA DITALALA

“Bakebi ba ditalala mba diakalenga, bualu nebababikile ne: bana ba Nzambi.” (Matayi 5:9) “Bikalaku mushindu, enzayi tshionso tshinudi nuenu mua kuenza bua kuikala mu ditalala ne bantu bonso.”​—Lomo 12:18.

LUSE, DIBUIKIDILANGANA

“Badi ne luse mba diakalenga, bualu nebabaleje luse.” (Matayi 5:7) “Nutungunuke ne kulejangana lutulu ne kufuilangana luse ne muoyo mujima nansha muntu yeye tshilumbu ne mukuabu. Anu bu muvua Yehowa * munufuile luse ne muoyo mujima, nuenu penu nudi ne bua kuenza nanku.”​—Kolosayi 3:13.

DIPETANGANA DIA BISAMBA BISHILASHILANGANE

Nzambi “wakenza bisamba bionso bia bantu bifumine mu muntu umue bua kusomba pa buloba bujima.” (Bienzedi 17:26) “Nzambi kena ne kansungansunga to, kadi udi witaba muntu wa mu tshisamba tshionso udi umutshina ne udi wenza malu makane.”​—Bienzedi 10:34, 35.

KANEMU BUA BULOBA

“Yehowa Nzambi wakangata muntu au, kumutekaye mu budimi bua Edene bua kubudima ne bua kubulama.” (Genese 2:15) Nzambi ‘neanyangakaje badi banyangakaja buloba.’​—Buakabuluibua 11:18.

DIKINA LUKUKA NE TSHIENDENDA TSHIA MASANDI

“Nudilame ku nkuka ya mishindu yonso, bualu nansha padi muntu ne bintu bia bungi, muoyo wende kawena ufumina ku bintu bidiye nabi to.” (Luka 12:15) “Masandi ne malu a bukoya a mishindu yonso anyi lukuka kabitedibu nansha munkatshi muenu, anu bu mudibi bikumbanyine bansantu.”​—Efeso 5:3.

BULULAME, MUDIMU MUKOLE

Tudi “basue kuenda mu bululame mu malu onso.” (Ebelu 13:18) “Muntu udi wiba kibi kabidi to; kadi enze mudimu bikole.”​—Efeso 4:28.

MUSHINGA WA KUAMBULUISHA BADI BAKENGA

‘Akulayi ne mêyi a busambi kudi badi babungame, ambuluishayi badi batekete, ikalayi ne lutulu kudi bantu bonso.’ (1 Tesalonike 5:14) ‘Tangilayi bana ba nshiya ne bakaji bakamba mu makenga abu.’​—Yakobo 1:27.

Bible kena utela anu mêyi aa to. Udi utulongesha bua kuangata mêyi aa ne mushinga ne kuatumikila mu nsombelu wetu wa ku dituku ne ku dituku. Bushuwa, bu bantu ba bungi batumikila malongesha atudi batele aa, kabivuaku mua kuambuluisha bua kukepesha ntatu idi nayi bantu anyi? Nunku mêyi manene a mu Bible adi ne mushinga wa bungi ne mmakumbanyine tshikondo tshietu etshi bimpe menemene! Kadi mmushindu kayi udi malongesha a mu Bible mua kukuambuluisha mpindieu?

Muntu uvua ne meji kupita bantu bonso wakamba musangu mukuabu ne: “Meji adi adibingisha ku bienzedi biawu.” (Matayi 11:19, dimanyisha dia kuinshi kua dibeji) Udi witaba mêyi aa anyi? Tshijadiki tshilelela tshia meji mbipeta bidi bimueneka paudi uatumikila. Nunku udi mua kudiambila ne: ‘Bikala Bible wambuluisha bushuwa, tshiena mua kumona bipeta mu nsombelu wanyi anyi? Mmunyi mudiye mua kungambuluisha mu ntatu indi nayi mpindieu?’ Tuangate tshilejilu etshi.

Delphine * uvua ne bia bungi bia kuenza mu nsombelu wende ne uvua ne disanka. Kadi wakapeta ntatu minene milondangane musangu umue. Muanende wa bakaji ukavua ne bidimu bitue ku 18 wakafua. Dibaka diende diakafua. Wakapeta lutatu lua makuta. Udi uvuluka wamba ne: “Tshivua ndiumvua kabidi mu meme to: tshivua kabidi ne muana, anyi mulume, anyi nzubu. Mvua ndimona tshianana: tshiyi ne kundi, tshiyi bukole, ne tshiyi ne ditekemena to.”

Delphine kavua muanji kujingulula bimpe menemene bulelela budi mu mêyi aa to: “Bule bua muoyo wetu mbua bidimu 70, anyi 80 pikala muntu ne bukole bua bungi. Kadi mbiuwule tente ne ntatu ne tunyinganyinga; bidi bipita lubilu, ne tudi tubuuka tuya.”​—Misambu 90:10.

Delphine wakapetela diambuluisha mu Bible tshikondo tshivuaye ne ntatu. Bible uvua mumuambuluishe  mu mushindu wa dikema. Anu mutuikala mua kubimona mu biena-bualu bisatu bidi bilonda, bantu bakuabu ba bungi mbamone pabu ne: Bible mmubambuluishe mu mushindu wa dikema pavuabu batumikile mibelu yende mu ntatu ivuabu nayi. Mbafike ku dimona ne: Bible udi anu bu tshintu tshia kale tshituvua bakuile ku ntuadijilu. Mmushilangane bikole ne mikanda ya bungi menemene idi ikulakaja ne ipitshila matuku. Bidi nanku bualu Bible mmuenza ne tshintu kampanda tshia pa buatshi mu bulelela anyi? Bidi mua kuikala ne: udi ne ngenyi ya Nzambi, kayiyi ya bantu anyi?​—1 Tesalonike 2:13.

Pamuapa wewe pebe ukadi mumone mudi matuku a muoyo makese, muwule ntete ne ntatu. Padi ntatu ikeba kukutshibuila panshi, nkuepi kuutu ukeba busambi, dikuatshisha, ne mibelu mimpe?

Tukonkononayi mishindu isatu minene idi Bible mua kutuambuluisha mu nsombelu wetu. Udi mua kukulongesha mua

1. kuepuka ntatu padiku mushindu.

2. kujikija ntatu padiyi imueneka.

3. kutantamena nsombelu iudi kuyi mua kushintulula.

Biena-bualu bidi bilonda nebiakule bua mishindu isatu eyi.