Ndi muledibue mu Mulhouse, ku nord est kua France, muaba wa ku mpenga kua tshimenga uvua mumanyike bua malu a tshikisu, benamu batu benza midimu ya bianza. Malu andi mvuluka a ku buana buanyi adi anu a ditandangana dikole dia bena mu mêku ba muaba au. Mu dîku dietu, bantu bakaji kabavua ne mushinga to, koku bualu bivua bikole bua kuebeja mmuenenu wabu. Bavua bandongeshe ne: muaba wa bantu bakaji nku tshikuku, kutabalela balume ne bana.

Ndi mukole mu lutatu lua bungi. Pamvua ne bidimu dikumi, tatuanyi wakafua bua dinua dipitshisha dia maluvu. Bidimu bitanu pashishe, tutuanyi umue wakadishipa. Tshidimu tshimue tshimue atshi meme kudimuenena ne anyi abidi muvua bena mu dîku kampanda bashipangane bua bilumbu. Biakantonda be! Bena mu dîku dietu bakandongesha mua kutuangana tuela ne kuasangana tshingoma ne bua kuluangana mvita padibi bikengela. Bu mumvua ne malu avua antonda, ngakatuadija kudizola bintu pambidi ne kunua maluvu.

Pamvua ne bidimu 16, mvua nnua maluvu milangi 10 anyi 15 dituku dionso, matuku makese meme kutuadija kunua bintu bia lulengu. Bua kusumba bintu bia lulengu ebi, mvua nsumbisha milonda ivua bantu bimansha ne ngiba. Pamvua ne bidimu 17, bakavua bankosele tshibawu tshia buloko. Mu kabujima, bavua bankosele bibawu bua buivi ne tshikisu misangu mitue ku 18.

Pantshivua nkumbajilaku bidimu 20, nsombelu wanyi wakanyanguka bikole. Mvua nua diamba misangu 20 ku dituku ne nnua bintu bikuabu bia lulengu bibi menemene bu mudi héroïne. Misangu ya bungi mvua muambe kufua bua dikuatshika dikole. Ngakatuadija kupana diamba, dîba dionso mvua ne kele ne tshingoma. Musangu kampanda ngakasua kuasa muntu, diakelenga disashi diakaya kututa ku tshiamu tshia mukaba (bukle)! Mamuanyi wakafua pamvua ne bidimu 24, luonji luanyi luakabanda bikole. Bantu bavua basambakena nanyi bavua ne buôwa, bavua banshila njila pavuabu bammona nsemena pabuipi. Bua mvita, misangu ya bungi ngakapitshisha ma disambombo ne dia lumingu bia bungi ku biro bia bampulushi anyi mu mpitadi bantela mputa.

Pangakakumbaja bidimu 28 meme kusela. Anu munudi mua kuela meji, tshivua nnemeka mukajanyi to. Mvua mmupenda ne mmukuma. Katuvua banji kuenza bualu nansha bumue kaba kamue bu bena dibaka to. Mvua ngela meji ne: kumupesha biju biiba kuvua kujikija bualu. Pashishe bualu kampanda butuvua katuyi belele meji buakatufikila.  Mukajanyi wakatuadija kulonga Bible ne Bantemu ba Yehowa. Panyima pa dilonga dia kumpala, wakalekela kunua makanya, kubengaye bua kuangata makuta miba ne kumpingajilaye biju bimvua mumupeshe. Ngakafika munda bikole, meme kubenga bua kalongi Bible kabidi to, mvua mmuela muishi wa makanya ku mêsu. Mvua kabidi mmufuisha bundu kumpala kua bena mutumba.

Dikuabu dituku butuku, mvua mukuatshike bikole, ngakatua nzubu wetu kapia. Mukajanyi wakansungila, kusungila kabidi muanetu wa bidimu 5 ku kapia. Pakantenduka maluvu, biakantonda bikole. Munda muanyi, ngakumvua ne: Nzambi kavua mua kumfuila luse to. Ndi mvuluka musangu kampanda uvua Abé ulongesha ne: bantu babi badi baya mu iferno. Too ne munganga wanyi wakangambila ne: “Biebe biakupita! Kakuena tshintu tshidi mua kukupikula to.”

Panyima pa diosheka dia nzubu wetu, tuakaya ku nzubu kua baledi ba mukajanyi. Pakalua Bantemu kutangila mukajanyi, ngakabebeja ne: “Nzambi udiku mua kumfuila luse bua mpekatu yanyi yonso anyi?” Bakandeja 1 Kolinto 6:9-11 mu Bible. Mvese au uvua utela mulongolongo wa malu adi Nzambi ukina, kadi udi usakidila ne: “ke muvua bamue ba munkatshi muenu.” Mêyi au akanjadikila ne: mvua mua kushintuluka. Pashishe Bantemu abu bakanjadikila ne: Nzambi mmunange pakandejabu 1 Yone 4:8. Ngakadiumvua mukole ku muoyo, meme kulomba Bantemu bua bikale balua kundongesha Bible misangu ibidi ku lumingu, ne ngakatuadija kubuela mu bisangilu. Mvua nsambila Yehowa misangu yonso.

Anu mu ngondo au, meme kulekela kunua makanya ne diamba ne maluvu. Diakamue ngakumvua mvita mikole mu mubidi wanyi! Mutu uvua unsama bikole, ndota bilota bibi menemene, misunya insama ne ngumvua bimue bimanyinu bia masama. Kadi, anu tshikondo atshi, ngakumvua ne: Yehowa uvua munkuate ku tshianza ne uvua unkolesha. Ngakadiumvua anu muvua mupostolo Paulo mudiumvue. Bua mushindu uvua Nzambi mumuambuluishe Paulo wakafunda ne: “Bua malu onso, ndi ne bukole ku diambuluisha dia yeye udi umpesha bukole.” (Filipoyi 4:13) Dîba adi ngakalekela kabidi kunua makanya.​—2 Kolinto 7:1.

Pakumbusha diambuluisha bua kuakaja nsombelu wanyi, Bible mmuakaje kabidi bikole dîku dietu. Meme kushintulula mushindu umvua ngenzela mukajanyi malu. Ngakatuadija kumunemeka bikole, ne bua kumulomba tshintu mvua ngamba ne: “wewe mua kusua” ne muela “tuasakidila.” Ngakatuadija kulua tatu muimpe menemene bua muanetu wa bakaji. Meme mumane kulonga Bible munkatshi mua tshidimu tshijima, anu bu mukajanyi ngakadilambula kudi Yehowa ne meme kutambula.

Ndi mutuishibue ne: mêyi manene a mu Bible mmansungile. Too ne bena mu dîku dianyi badi kabayi Bantemu badi bamba ne: mvua mua kuikala mufue bua bintu bia lulengu anyi mene bavua mua kuikala banshipe mu mvita.

Malongesha a mu Bible mmashintulule nsombelu wa mu dîku dianyi bikole, mmandeje bujitu bundi nabu bu mulume ne muledi. (Efeso 5:25; 6:4) Tukadi tuenza malu kaba kamue bu dîku dimue. Mpindieu, pamutu pa kulekela mukajanyi mu tshikuku, ndi ne disanka dia kumuelesha diboko mu mudimu wende wa diyisha mêba a bungi. Udi pende ne disanka dia kungambuluisha bu mundi mukulu mu tshisumbu.

Dinanga dia Yehowa Nzambi ne luse luende mbilenge muoyo wanyi bikole menemene. Ndi ne dijinga dikole dia kuakula bua ngikadilu yende kudi bantu badi kabayi ne ditekemena, bualu bantu ba bungi bavua bammona nanku. Ndi mumanye ne: Bible udi ne bukole bua kuambuluisha muntu yonso bua kupeta nsombelu muimpe ne wa disanka. Bible ki mmundongeshe anu mua kunanga ne kunemeka balume ne bakaji nkayaku to, kadi mmundongeshe kabidi mua kudinemeka.