Diumvuilangana “mbukole budi nabu muntu bua kuditeka pa muaba wa muntu mukuabu bua kumvua mudiye umvua bilondeshile malu adi mamufikile.” Rick Hanson (munganga mupiluke mu masama a mitu) udi wamba ne: “Diumvuilangana didi mu mashi.”

ELABI MEJI: Bua tshinyi tudi ne ngikadilu wa diumvuilangana utu bifukibua bikuabu kabiyi nende? Bible udi wandamuna ne: Nzambi mmufuke bantu mu tshimfuanyi tshiende. (Genese 1:26) Tudi bafukibue mu tshimfuanyi tshia Nzambi mu ngumvuilu wa ne: tudi mua kuenza malu adi aleja bumuntu buende, bituambuluisha bua kulejaku ngikadilu yende mimpe. Nunku padi diumvuilangana disaka bantu bua kuambuluisha bakuabu, badi bidikija diumvuilangana dia Yehowa Nzambi Mufuki wabu utu uditeka pa muaba wa bakuabu.​—Nsumuinu 14:31.

Nzambi utu utumvuila ne katu musue kutumona tukenga to. Bible udi wamba bua tshisamba tshia Isalele wa kale tshivua mu bupika bukole mu Ejipitu ne tshilue kuenza bidimu 40 bia lutatu mu tshipela ne: “Mu makenga abu onso, uvua ukenga pende.” (Yeshaya 63:9) Mona ne: Nzambi kavua anu mumanye makenge abu tshianana to. Uvua umvua muvuabu bumvua amu. Wakamba ne: “Ndi mumanye bimpe makenga adibu nawu.” (Ekesode 3:7) Nzambi udi wamba ne: “Muntu yonso udi ukulenga udi ulenga kamonyi ka dîsu dianyi.” (Zekâya 2:8) Padi bantu bakuabu batuenzela bibi, muoyo wende udi usama pamue ne wetu.

Bible udi utujadikila ne: nansha mutudi mua kudipisha anyi kumvua bu ne: Nzambi kena mua kutumvuila, “Nzambi mmunene kupita mioyo yetu ne mmumanye malu onso.” (1 Yone 3:19, 20) Nzambi mmutumanye bimpe kupita mutudi tuetu badimanye. Mmumanye malu onso adi atufikila, meji etu, ne mutudi tudiumvua. Udi utumvuila.

 Bible udi utujadikila ne:

• “Neubikile, ne Yehowa neandamune; neudile bua kulomba diambuluisha, ne yeye neambe ne: ‘Mmeme eu!’”​—YESHAYA 58:9.

• “‘Bualu ndi mumanye bimpe meji andi nnuelela,’ ke mudi Yehowa wamba, ‘meji a ditalala, ki nga dikenga to, bua kunupesha matuku atshilualua mimpe ne ditekemena. Nenumbikile, nenulue ne nenundombe mu disambila, ne meme nennuteleje.’”​—YELEMIYA 29:11, 12.

• “Kelekeja binsonji bianyi mu kalondo kebe ka tshiseba. Ki mbifunda mu mukanda webe anyi?”​—MISAMBU 56:8.

Kumanya ne: Nzambi utu utumvuila kudi mua kutuambuluisha bua kutantamena ntatu anyi? Mona tshivua tshifikile Maria:

Udi wamba ne: “Bua kanyinganyinga kakole kamvua naku pamvua mufuishe muananyi wa bidimu 18 uvua mukenge ne disama dia kansere bidimu bibidi, ngakamona ne: nsombelu uvua mubi, mukole be! Mvua mufiikile Yehowa munda bua muvuaye kayi muenze bualu ne mumuondope!

“Panyima pa bidimu 6, mulunda wanyi mukuabu wa mu tshisumbu uvua munnange ne uditeka pa muaba wanyi wakanteleja pamvua mmuleja muvua Yehowa kayi munnange. Wakanteleja mêba a bungi kayi unkosa ku dîyi, pashishe kuntelelaye mvese wa 1 Yone 3:19, 20 uvua mundenge ku muoyo. Udi wamba ne: ‘Nzambi mmunene kupita mioyo yetu ne mmumanye malu onso.’ Wakangumvuija ne: Yehowa mmumanye makenga etu onso.

“Nansha nanku bivua binkolele bua kulekela tshiji! Ngakalua kubala Misambu 94:19 udi wamba ne: ‘Pavua tunyinganyinga tumpite bukole, wewe wakansamba, wewe kumpesha ditalala.’ Mvua mumvue anu bu ne: mvese ayi ivua mimfundila meme! Ndekelu wa bionso, ngakamona ne: mvua mpeta disulakana dikole pamvua ndeja Yehowa makenga anyi, mumanye ne: udi unteleja ne mmumanye nsombelu wanyi.”

Patudi tumanya ne: Nzambi mmumanye makenga etu ne udi utumvuila bidi bitukolesha bikole! Kadi bua tshinyi kudi makenga bungi nunku? Mbualu Nzambi udi utunyoka bua malu mabi atudi benze anyi? Nzambi neajikije makenga onso anyi? Biena-bualu bidi bilonda nebiandamune nkonko eyi.