Anji fuanyikijabi muvua nsombelu mua kuikala pa buloba bu kuoku kakuyi dîba? Dîba didi dipetesha mitshi bukole bua kupatula mabeji, bilongo, misa, ne bua kukuama bimuma ne mamiinu. Didi diambuluisha kabidi mitshi bua kukoka mâyi mu buloba ku diambuluisha dia miji. Mâyi au adi abanda mu mabeji, pashishe enza dibungi mu lupepele.

Mvula ndipa dia mushinga mukole dia kudi Nzambi didi diambuluisha buloba bua kutupatuila biakudia. Nzambi udi utulokeshila mvula ya mu diulu, utupesha mivu ya biakudia, utukutshisha ne biakudia ne uwuja mioyo yetu ne disanka.

Baledi ba bungi batu basamisha mutu bua kupetesha bena mu mêku abu biakudia bikumbane ne bilamba. Mona tshidi Bible wamba: “Tangilayi nyunyi ya mu diulu bimpe; kayitu ikuna mamiinu anyi inowa peshi ikunguija bintu mu mayeba, kadi Tatu wenu wa mu diulu udi uyidisha. Nuenu kanuena bayipite ku mushinga anyi?”​—Matayi 6:25, 26.

“Longelayi malu kudi bilongo bia kapapankole bia mu mpata, mushindu udibi bikola . . . ; kadi ndi nnuambila ne: nansha [Mukalenge] Solomo mu butumbi buende buonso kavua muvuale bu tshimue tshia kudibi to. Nunku, bikala Nzambi uvuadika bisonsa bia mu mpata . . . , kenaku mua kunuvuadika nuenu” anyi?​—Matayi 6:28-30.

Bu mudi Nzambi ne bukole bua kutupesha biakudia ne bilamba, kakuyi mpata neatuambuluishe kabidi bua kupeta bintu bikuabu bia mushinga mu nsombelu. Patudi tuenza disua diende, udi mua kubenesha bionso bitudi tuenza bua kupeta biakudia anyi udi mua kutuambuluisha bua kupeta mudimu bua tuetu kusumba bitudi nabi dijinga.​—Matayi 6:32, 33.

Bushuwa, kudi malu mimpe adi atusaka bua kunanga Nzambi patudi tutangila dîba, mvula, nyunyi, ne bilongo. Tshiena-bualu tshidi tshilonda netshileje muvua Mufuki wetu muyukile ne bantu.