1-2. a) Bua tshinyi mbimpe batshidi babuelelaku mu dibaka beyemene Yehowa? (Misambu 37:3, 4) b) Mmalu kayi atuakonkonone mu tshiena-bualu etshi?

UDI usua kubuela mu dibaka anyi? Peshi utshidi ubuelelaku mu dibaka? Biobi nanku, kakuyi mpata muoyo udi uzuka bua wewe kuikala ku luseke lua muntu uudi munange wamba kufua. Mu bulelela, dibaka ditu ne yadi ntatu ne kutu mapangadika a mushinga a kuangata. Tshinudi nuenza panudi nupeta ntatu ne mapangadika anudi nuangata tshidi mua kuenza bua matuku adi alua nuikale ne disanka dia bungi anyi dikese mu dibaka dienu. Nuenu nueyemena Yehowa, nenuangate mapangadika mimpe, dibaka dienu nedikole ne nenuikale ne disanka dia bungi. Nuenu kanuyi batumikile mibelu ya Nzambi, nudi mua kupeta ntatu yajula bilumbu mu dibaka dienu ne kanuakuikala ne disanka to.​—Bala Misambu 37:3, 4.

² Nansha mudi tshiena-bualu etshi tshitangila batshidi babuelelaku mu dibaka, netshiakule kabidi bua ntatu idi bena mabaka bonso mua kupeta. Netshileje bimpe tshidi bimue bilejilu bia balume ne bakaji ba lulamatu badibu bakuile mu Bible mua kutulongesha. Bilejilu bia mu Bible ebi bidi bitulongesha malu a bungi atudi mua kutumikila mu nsombelu mishilashilangane, nansha mu dibaka. Netumone kabidi tshidi malu akadi mafikile bena mabaka ba lelu mua kutulongesha.

3-4. Nntatu kayi idi batshidi babuelelaku mu dibaka mua kupeta?

³ Bamue bantu badi mua kukankamija badi bafuma ku diselangana bua kuikale ne nsombelu wa buena utu nende bantu ba bungi. Tshilejilu, baledi ne balela badi mua kubela mutoyi  bua babange kulela kabayi bajingakana to. Peshi balunda ne balela badi bamueneka bu badi ne meji mimpe badi mua kubasaka bua kukeba nzubu wa munene ne kusumba bintu bia bungi bia kutekamu.

⁴ Bobu kabayi badimuke, badi mua kuangata mapangadika a kushala bapika ba mabanza. Dîba adi, bidi mua kulomba mulume ne mukaji bua kuenza mudimu mêba a bungi bua kufuta mabanza au. Mudimu wa bianza udi mua kubanga kuangata too ne dîba diabu dia kudilongela Bible, dia kuenza ntendelelu wa mu dîku ne dia kuyisha. Mulume ne mukaji badi pamuapa nansha mua kupumbisha bisangilu bua kushala ku mudimu bua kupeta makuta a bungi anyi bua kuenza bua kabajimiji mudimu wabu to. Biobi abi nebibapangishe mpunga mimpe menemene ya kuvudija mudimu udibu benzela Yehowa.

5. Tshilejilu tshia Klaus ne Marisa tshidi tshikulongesha tshinyi?

⁵ Malu adi menzeke adi aleja ne: kudifila mu dikeba dia bintu bia ku mubidi kakuena kupetesha disanka to. Mona tshivua bualu ebu bulongeshe muanetu Klaus ne muena kuende Marisa. * Patshivuabu babuelelaku mu dibaka, bobu bonso babidi bavua benza mudimu dituku dionso bua bikale ne nsombelu wa bena kantu ku bianza. Kadi mu bulelela, kabavua ne disanka to. Klaus udi wamba ne: “Bua bintu tuvua nabi, kadi katuvua ne tshipatshila tshia mu nyuma nansha tshimue to. Mu bulelela, tuakadikondakajila malu kubangabi kutusamisha mutu.” Pamuapa ukadi mumone pebe ne: kudifila mu dikeba bintu bia ku mubidi ki nkukupeteshe disanka to. Biobi nanku, kuteketshi mu maboko to. Kukonkonona bilejilu bimpe bia bakuabu kudi mua kukuambuluisha mu tshilumbu etshi. Tumonayi tshidi tshilejilu tshia mukalenge Yehoshafata mua kulongesha balume.

6. Ntshinyi tshivua Yehoshafata muenze bua kutumikila mubelu udi mu Nsumuinu 3:5, 6 pavuabu balue kumuela mvita?

⁶ Nuena balume, nutu numvua imue misangu midimu inudi nayi inunemena bujitu anyi? Biobi nanku, tshilejilu tshia mukalenge Yehoshafata tshidi mua kunuambuluisha. Bu muvuaye mukalenge, uvua ne mudimu wa kukuba tshisamba tshijima! Ntshinyi tshivuaye muenze bua kukumbaja mudimu uvua kawuyi wa bilele au? Wakenza tshionso tshivuaye mua kuenza bua kulama bantu bavua ku bukokeshi buende. Wakakolesha bimenga bia Yuda ne uvua ne tshiluilu tshinene tshia basalayi bapite pa 1 160 000. (2 Kul. 17:12-19) Panyima pa matuku Yehoshafata wakapeta lutatu lunene. Tshiluilu tshinene tshia basalayi ba bena Amona, bena Moaba, ne bantu ba mu buloba bua ku mikuna bua Seî bakalua bua kumuela yeye ne dîku diende ne bena mu tshisamba tshiende mvita. (2 Kul. 20:1, 2) Ntshinyi tshivuaye muenze? Wakalomba Yehowa bua amuambuluishe ne amupeshe bukole. Tshivuaye muenze atshi tshidi tshipetangana ne mubelu wa meji udi mu Nsumuinu 3:5, 6. (Bala.) Disambila divua Yehoshafata  muenze ne budipuekeshi didi mu 2 Kulondolola 20:5-12 didi dileja muvuaye mueyemene Tatuende wa mu diulu bikole menemene. Mmunyi muvua Yehowa muandamune disambila diende?

7. Mmunyi muvua Yehowa muandamune disambila dia Yehoshafata?

⁷ Yehowa wakambila Yehoshafata mukana mua muena Lewi kampanda diende Yahaziele ne: “Dilongololayi, nushale bimane, ne numone lupandu lua Yehowa bua bualu buenu.” (2 Kul. 20:13-17) Au mushindu ki ngutubu baluangana mvita to! Nansha nanku, mêyi au kaavua mafumine kudi muntu wetu eu to; avua mafumine kudi Yehowa. Yehoshafata wakeyemena Yehowa ne muoyo wende wonso, kuenzaye anu muvuabu bamuambile. Pakapatukaye yeye ne bena mu tshisamba tshiende bua kukungamangana ne baluishi, kakateka balume ba mvita kumpala kua tshiluilu to, kadi wakateka bimbi ba misambu bavua kabayi ne bia mvita. Yehowa kakalekela Yehoshafata upueka ne mâyi to; wakamutshimuina tshiluilu tshia baluishi abu.​—2 Kul. 20:18-23.

8. Tshilejilu tshia Yehoshafata tshidi mua kulongesha balume tshinyi?

⁸ Balume wetu, bualu bua Yehoshafata budi mua kunulongesha. Nudi ne mudimu wa kutabalela bena mu mêku enu, nanku nudi nuenza midimu mikole bua kubalama ne kubakuatshisha. Panudi nupeta ntatu, nudi mua kuela meji ne: nuenu nkayenu nudi mua kudijikijilayi. Kadi epukayi lungenyi lua kudieyemena. Ikalayi nusambila Yehowa pa nkayenu numulomba bukole. Ikalayi kabidi nusambila ne bakaji benu ne muoyo mujima. Ikala ulonga Bible ne mikanda yetu ne utumikila mibelu iudi upetamu bua upete buludiki bua kudi Yehowa. Bantu bakuabu kabakuanyisha mapangadika audi muangate mu diumvuangana ne Bible to, ne badi nansha mua kubanga kukuamba ne: udi wenda ujimija lungenyi. Badi mua kukuambila ne: makuta ne bintu biudi usumba ne makuta au nebikube bena mu dîku diebe bimpe menemene. Kadi wavuluka tshilejilu tshia Yehoshafata. Uvua weyemena Yehowa ne malu avuaye wenza avua aleja nanku. Yehowa kakalekela muena lulamatu wende au to, ne kakukulekela pebe to. (Mis. 37:28; Eb. 13:5) Ntshinyi tshikuabu tshidi bena mu dibaka mua kuenza bua bikale ne disanka mu dibaka diabu?

9. Ntshinyi tshitudi mua kuamba bua muprofete Yeshaya ne muena kuende?

⁹ Muprofete Yeshaya ne muena kuende bavua badifile mu dienzela Yehowa mudimu. Yeshaya uvua muprofete, ne pamuapa mukajende uvua pende ne midimu ya buprofete ivuabu bamupeshe bualu badi bamubikila ne: “muprofete mukaji.” (Yesh. 8:1-4) Yeshaya ne muena kuende bonso babidi bavua bateka ntendelelu wa Yehowa pa muaba wa kumpala. Mbashile bena mabaka ba lelu tshilejilu tshimpe be!

10. Leja mudi dilonga mêyi a buprofete mua kuambuluisha bena mabaka bua kuenzela Yehowa mudimu ne muabu muonso.

¹⁰ Bena mabaka ba lelu badi mua kudifila mu dienzela Yehowa mudimu bobu benza tshionso tshidibu bakokesha bua kuenza mu mudimu wende. Bobu balonga mêyi a buprofete a mu Bible pamue ne bamona mutuwu anu akumbana, badi mua kushala beyemene Yehowa bikole. * (Tito 1:2) Badi mua kuela meji a tshidibu mua kuenza bua amue mêyi a buprofete a mu Bible akumbane. Tshilejilu, badi mua kuenza pabu bua mêyi a buprofete avua Yezu muambe akumbane a ne: lumu luimpe neluyishibue pa buloba bujima kumpala kua nshikidilu  kulua. (Mat. 24:14) Padi mulume ne mukajende benda batuishibua ne: mêyi a buprofete a mu Bible adi enda akumbana, didisuika diabu dia kuenzela Yehowa mudimu ne muabu muonso didi dibanda tshipidi.

11. Pisikila ne Akila bakakokesha bua kuenza tshinyi? Bua tshinyi?

¹¹ Kudi malu adi batshidi babuelelaku mu mabaka mua kulongela kudi Akila ne mukajende Pisikila. Bavua bena Yuda bavua basombele mu tshimenga tshia Lomo. Bavua bumvue lumu luimpe lua bualu bua Yezu bobu kulua bena Kristo. Kakuyi mpata, bavua basanka ne nsombelu uvuabu nende. Kadi nsombelu wabu wakashintuluka mu tshintuluntulu pavua mukalenge Kulaudio mutume dîyi bua bena Yuda bonso bumbuke mu Lomo. Anji elabi meji tshivua bualu abu mua kuenzela Akila ne Pisikila. Bavua ne bua kumbuka muaba uvuabu bibidile, kukeba muaba mukuabu wa kusombela, ne kubanga kabidi kuenza mudimu wabu wa dienza ntenta muaba mukuabu wa tshianana. Lutatu alu luvuaku lubapangishe bua kuenzela Yehowa mudimu muabu muonso anyi? Udi mua kuikala ukadi ne diandamuna. Bu muvuabu baye kusombela ku Kolinto, Akila ne Pisikila bakatuadija kuambuluisha tshisumbu tshia mu Kolinto amu ne kueleshanganabu diboko ne mupostolo Paulo bua kukolesha bena Kristo ba kuntu aku. Pashishe bakaya mu bimenga bikuabu bivuabu dijinga ne bayishi ba lumu luimpe ba bungi. (Bien. 18:18-21; Lomo 16:3-5) Bavua ne bia bungi bia kuenzela Yehowa eku bikale kabidi ne disanka.

12. Bua tshinyi mbimpe mulume ne mukajende badifundile bipatshila bia mu nyuma?

¹² Bena mabaka ba lelu badi mua kuidikija Pisikila ne Akila bobu bateka malu a Bukalenge bua Nzambi pa muaba wa kumpala. Tshikondo tshimpe tshidi mulume ne mukaji mua kuyukidilangana bua bipatshila biabu mpatshidibu batantshilangana. Padibu badifundila bipatshila bia kukumbaja mu mudimu wa Nzambi ne baluangana bua kubikumbaja, badi bapeta mpunga ya bungi ya kumona mudi nyuma wa Yehowa ubambuluisha. (Muam. 4:9, 12) Tuangate tshilejilu tshia muanetu Russell ne Elizabeth. Russell udi wamba ne: “Patutshivua tutantshilangana,  tuvua tuyukila nangananga bua bipatshila bia mu nyuma.” Elizabeth udi wamba pende ne: “Tuvua tuyukila nanku bua ne: dîba dituala kuangata amue mapangadika, kabitupangishi bua kukumbaja bipatshila bietu abi to.” Nsombelu wa Russell ne Elizabeth wakabapesha mushindu wa kumuangala kuya mu ditunga dia Micronésie muvuabu dijinga ne bamanyishi bua bungi.

13. Bilondeshile Misambu 28:7, tuetu beyemene Yehowa, tshienzeka ntshinyi?

¹³ Anu bu Russell ne Elizabeth, balume ba bungi ne bakaji babu mbangate dipangadika dia kudifila bikole mu mudimu wa diyisha ne dilongesha. Mbalekele malu makuabu bua bapete mushindu wa kuenza nanku. Padi mulume ne mukajende badifundila bipatshila bua kuenza tshionso tshidibu mua kuenza bua Yehowa ne beleshangana diboko bua kubikumbaja, badi bapeta malu mimpe a bungi. Nebamone mudi Yehowa ubatabalela, nebamueyemene kabidi bikole, ne nebikale ne disanka dia pa diodi.​—Bala Misambu 28:7.

14. Mmunyi muvua Petelo ne muena kuende baleje ne: bavua beyemene mulayi wa Yehowa udi mu Matayi 6:25, 31-34?

¹⁴ Tshilejilu tshia mupostolo Petelo ne muena kuende tshidi kabidi mua kulongesha bena mabaka. Petelo mumane kutuilangana ne Yezu bua musangu wa kumpala, ngondo mitue ku isambombo pashishe tshidimu tshimue tshimue atshi, wakadimona kumpala kua dipangadika dinene dia kuangata. Uvua udiila ku mudimu wa diloba. Nanku pavua Yezu muambile Petelo bua ikale umulonda dituku dionso, Petelo uvua ne bua kuanji kuvuluka ne: uvua ne mukaji. (Luka 5:1-11) Petelo wakapangadija bua kuya kuenda kuyisha ne Yezu. Wakangata dipangadika dimpe be! Kudi tshidi tshituleja ne: mukajende wakatua dipangadika diende adi mpanda. Bible udi uleja ne: wakenza ngendu ne bayende Petelo bimue bikondo pakavua Yezu mumane kubishibua ku lufu. (1 Kol. 9:5) Kakuyi mpata, bu muvuaye mukaji wa tshitembu, biakambuluisha Petelo bua kuakula kayi udia tshibanga pavua nyuma muimpe mumusake bua kufunda mibelu idi itangila balume ne bakaji bena Kristo. (1 Pet. 3:1-7) Bidi bimueneka bimpe ne: Petelo ne mukajende bavua beyemene mulayi wa Yehowa wa ne: bobu bateke Bukalenge buende pa muaba wa kumpala, yeye neabakumbajile majinga abu.​—Bala Matayi 6:25, 31-34.

15. Bualu bua Tiago ne Esther budi bukulongesha tshinyi?

¹⁵ Binuikale babuele mu dibaka bidimu bidi panshi ebi, ntshinyi tshinudi mua kuenza bua nuikale anu ne dijinga dia kuvudija mudimu wenu? Umue mushindu nkulonga malu akadi mafikile bena mabaka bakuabu. Tshilejilu, udi mua kubala biena-bualu bia ne: “Bakadifila ku budisuile.” Biena-bualu abi biakambuluisha muanetu Tiago ne muena kuende Esther ba mu ditunga dia Brésil bua kupeta dijinga dikole dia kuya kuyisha muaba uvuabu dijinga ne bamanyishi ba bungi. Tiago udi wamba ne: “Patuvua babale malu a mudi Yehowa wambuluisha batendeledi bende ba bikondo bietu ebi, tuetu petu tuakajinga bua kulonda bulombodi bua Yehowa ne kumvua mudiye utuambuluisha.” Bakalua kuya mu Paraguay, mudibu bayisha mu teritware wa muakulu wa tshimputulukeshi katshia ku 2014. Esther udi wamba ne: “Mvese utuvua tuetu bonso banange bikole ngua Efeso 3:20. Tudi bamone mudi mêyi au matukumbanyine misangu ne misangu mu mudimu utudi tuenzela Yehowa.” Mu mukanda uvua Paulo mufundile bena Efeso au, wakambamu ne: Yehowa neikale mua kutupesha bintu kupita ne bitudi tumulomba.  Mulayi au ukadi mukumbane misangu ne misangu!

16. Padi batshidi babuelelaku mu dibaka bela meji a kukumbaja bipatshila biabu, badi mua kulomba mibelu kudi banganyi?

¹⁶ Malu akadi mafikile bena mabaka badi balonge mua kueyemena Yehowa adi mua kuambuluisha batshidi babuelelaku mu dibaka. Bamue bena mabaka badi mua kuikala bakadi benze mudimu wa ku dîba ne ku dîba bidimu ne bidimu. Bua tshinyi kubenga kubalomba mibelu binuikale dijinga ne kukumbaja bipatshila bienu? Eu si mushindu mukuabu wa kuleja munudi nueyemena Yehowa. (Nsu. 22:17, 19) Bakulu badi pabu mua kuambuluisha batshidi babuelelaku mu mabaka bua kudifundila bipatshila bia mu nyuma ne kubikumbaja.

17. Ntshinyi tshivua tshifikile Klaus ne Marisa? Bualu buabu budi butulongesha tshinyi?

¹⁷ Kadi imue misangu, dipangadika dietu dia kualabaja mudimu wetu didi mua kubenga kukumbana mutuvua batekemene. Tuangate tshilejilu tshia muanetu Klaus ne Marisa batudi batele ku ntuadijilu. Bidimu bisatu bamane kuselangane, bakumbuka muaba uvuabu basombele kuyabu kuenza mudimu wa luibaku ku Betele wa mu Finlande bu badisuile. Kadi bakabambila ne: kabavua mua kubanyishila bua kuenza ngondo mipite pa isambombo muaba au to. Biakanji kubatonda. Kadi katupa kakese pashishe, bakabambila bua kubuela mu kalasa ka dilonga muakulu wa arabe, ne mpindieu badi ne disanka dia kuyisha mu teritware wa muakulu wa arabe kadi mu ditunga dikuabu. Padi Marisa uvuluka malu onso aa udi wamba ne: “Mvua ne buôwa bua kuenza bualu buntu tshiyi muanji kuenza kuonso eku ne bivua bindomba bua kueyemena Yehowa ne muoyo wanyi wonso. Kadi ndi mumone mudi Yehowa anu utuambuluisha mu mishindu itudi katuyi belele meji to. Padiye utuambuluisha nanku, ndi mmueyemena kabidi bikole kupita ne kumpala.” Anu mudi tshilejilu etshi tshileja, ikale mutuishibue ne: wewe mueyemene Yehowa ne muoyo mujima, yeye neikale anu ukufuta.

18. Ntshinyi tshidi bena mabaka mua kuenza bua kushala beyemene Yehowa?

¹⁸ Dibaka ndipa dia kudi Yehowa. (Mat. 19:5, 6) Mmusue bua bena dibaka basanke ne dipa adi. (Nsu. 5:18) Nuenu bana betu batshidi babuelelaku mu dibaka, konkononayi tshinudi nuenza ne matuku enu a muoyo. Nudiku nuenza tshionso tshinudi mua kuenza bua kuleja Yehowa munudi ne dianyisha bua mapa onso adiye munupeshe anyi? Sambilayi Yehowa. Kebayi mêyi manene mu Dîyi diende adi apetangana ne nsombelu wenu. Pashishe nulonde mibelu idi Yehowa unupesha ayi. Ikalayi batuishibue ne: nuenu badifile mu dienzela Yehowa mudimu, nenuikale ne nsombelu wa disanka udi ufuta!