1, 2. Bua tshinyi Lomo nshapita wa 8 udi ukoka ntema ya bena Kristo bela manyi?

UDI mua kuikala mubale Lomo 8:15-17 mu tshikondo tshia Tshivulukilu tshia lufu lua Yezu. Mvese eyi idi ileja mudi bena Kristo bela manyi bamanya ne: badi ne ditekemena dia kupeta muoyo wa kashidi mu diulu. Lomo 8:1 udi wakula bua bela manyi bu “bantu badi mu buobumue ne Kristo.” Kadi Lomo nshapita wa 8 udi wakula anu bua bela manyi anyi? Peshi udi kabidi wambuluisha bantu badi ne ditekemena dia kupeta muoyo wa kashidi pa buloba?

² Bavua bafunde Lomo nshapita wa 8 nangananga bua bela manyi. Badi bapeta “nyuma” bu bantu badi ‘bindile ne muoyo mujima bua Nzambi abangate bu bana, bapikudibue ku mibidi yabu.’ (Lomo 8:23) Mu matuku atshilualua, nebalue bana ba Nzambi mu diulu. Yehowa mmubabuikidile mibi yabu ku diambuluisha dia mulambu udi upikula. Mmubabale bakane bua balue bana bende.​—Lomo 3:23-26; 4:25; 8:30.

3. Bua tshinyi bantu badi ne ditekemena dia kupeta muoyo wa kashidi pa buloba badi pabu balonga Lomo nshapita wa 8?

³ Kadi ku ntuadijilu kua mukanda wa Lomo, Paulo wakakula  bua muntu uvua kayi muela manyi, kadi uvua Yehowa wangata bu muntu muakane. Muntu eu uvua Abalahama. Muntu uvua ne lulamatu eu uvua ne muoyo bidimu bia bungi kumpala kua Yezu kufila muoyo wende bu mulambu udi upikula. (Bala Lomo 4:20-22.) Lelu, Yehowa udi kabidi mua kuangata bena Kristo ba lulamatu badi ne ditekemena dia kupeta muoyo wa kashidi pa buloba bu bakane. Mibelu idi mu Lomo nshapita wa 8 idi mua kubambuluisha pabu.

4. Patudi tubala Lomo 8:21, ndukonko kayi lutudi ne bua kudiela?

⁴ Mu Lomo 8:21, Yehowa udi utujadikila ne: bulongolodi buende bupiabupia nebulue, ne bantu nebapikudibue ku bubi ne ku lufu. Mvese eu udi wamba ne: nebapete “budikadidi bua butumbi bua bana ba Nzambi.” Udiku udimona mu bulongolodi bupiabupia abu anyi? Tukonkononayi tshitudi ne bua kuenza bua kusombamu.

5. Mbualu kayi buvua Paulo muakuile mu Lomo 8:4-13?

⁵ Bala Lomo 8:4-13. Mu Lomo nshapita wa 8, Paulo wakakula bua mishindu ibidi ya bantu: badi “balonda mubidi” ne badi “balonda nyuma.” Bamue badi bela meji ne: Paulo uvua wakula bua bantu bavua kabayi bena Kristo ne bavua bena Kristo. Kadi muaba eu, Paulo uvua ufundila bena Kristo bavua “babikidibue bua kuikala bansantu.” (Lomo 1:7) Nunku bantu bavua “balonda mubidi” ne bavua “balonda nyuma” bavua bonso bena Kristo. Bua tshinyi bavua bashilangane?

6, 7. a) Ngimue mishindu kayi idi Bible wenza mudimu ne muaku “mubidi”? b) Mmunyi mudibu benze mudimu ne muaku “mubidi” mu Lomo 8:4-13?

⁶ Mu Bible mbatele muaku “mubidi” bua kuakula bua bintu bishilashilangane. Imue misangu, muaku eu udi uleja mubidi wetu muena dîna. (Lomo 2:28; 1 Kolinto 15:39, 50) Udi kabidi uleja malanda a bena mu dîku. Tshilejilu, Bible udi wamba ne: Yezu “wakapatukila mu mubidi mu ndelanganyi ya Davidi,” ne Paulo wakabikila bena Yuda ne: “balela banyi ku mubidi.”​—Lomo 1:3; 9:3.

⁷ Nunku bilondeshile Lomo 8:4-13, ntshinyi tshivua Paulo usua kuamba pavuaye wakula  bua bantu badi “balonda mubidi?” Bua kupeta diandamuna, tudi mua kukonkonona Lomo 7:5. Paulo wakafundamu ne: “Patuvua tuenza malu a mubidi, majinga mabi avua Mikenji mijule avua enza mudimu mu bitupa bietu bia mubidi.” Muaba eu Paulo wakumvuija ne: bantu badi “balonda mubidi” mbantu badi bimanyina pa majinga abu mabi ne baalonda, benza tshionso tshidibu basue.

8. Bua tshinyi bivua bikengela bua Paulo adimuije bena Kristo bela manyi pa bidi bitangila ‘kulonda mubidi’?

⁸ Bua tshinyi Paulo uvua mudimuije bena Kristo bela manyi bua kubenga ‘kulonda mubidi’? Bua tshinyi bena Kristo bonso lelu badi dijinga ne didimuija edi? Bualu mutendeledi wa Nzambi yonso udi ne lulamatu udi mua kutuadija kuangata majinga ende ne mushinga wa bungi mu nsombelu wende. Tshilejilu, Paulo wakafunda ne: bamue bena Kristo ba mu Lomo bavua bapika “ba mafu abu.” Bilondeshile mêyi aa, uvua mua kuikala uleja ne: malu a dimanyangana dia mulume ne mukaji, biakudia anyi masanka makuabu avua ne mushinga wa bungi mu nsombelu wabu. (Lomo 16:17, 18; Filipoyi 3:18, 19; Yuda 4, 8, 12) Bua tshikondo kampanda, mu tshisumbu tshia Kolinto muvua muena Kristo uvua wenda masandi “ne mukaji wa tatuende.” (1 Kolinto 5:1) Bidi bimueneka patoke ne: bivua bikengela Paulo adimuije bena Kristo ba mu bidimu lukama bia kumpala abu pa bidi bitangila ‘kulonda mubidi.’​—Lomo 8:5, 6.

9. Ntshinyi tshidi Lomo 8:6 kayi wamba?

⁹ Didimuija edi didi kabidi ditutangila petu lelu. Nansha muntu ukadi muenzele Yehowa mudimu munkatshi mua bidimu bia bungi udi mua kutuadija ‘kulonda mubidi.’ Kadi, Paulo uvuaku musue kuamba ne: katuena ne bua kuela meji bua malu bu mudi biakudia, mudimu, dijikija dia lutetuku anyi malu a dibaka anyi? Tòo. Aa mmalu adi muntu mua kuenza mu nsombelu wende. Nansha Yezu uvua munange biakudia ne wakabipesha bantu bakuabu. Uvua kabidi mumanye ne: uvua dijinga ne kuikisha. Paulo wakaleja pende ne: disangila dia mulume ne mukaji mbualu budi ne mushinga mu dibaka.

10. Tshiambilu tshia ne: “kuteka meji ku” tshidi tshiumvuija tshinyi?

 ¹⁰ Ntshinyi tshivua Paulo usua kuamba pakakulaye bua “kuteka meji ku”? Muaku wa mu tshiena Greke udi Paulo muenze nawu mudimu udi uleja kutuma meji onso ku bualu kampanda ne kulongolola bua kubuenza. Mumanyi kampanda wa malu a mu Bible wakumvuija ne: muaku eu udi utangila bantu “badi baditatshisha bikole anyi badi batamba kuakula bua bualu kampanda” ne bimanyina bikole pa majinga abu. Badi balekela majinga aa alombola nsombelu wabu.

11. Ngamue malu kayi adi mua kulua ne mushinga wa bungi kutudi?

¹¹ Bena Kristo ba mu Lomo bavua dijinga ne kudikonkonona bua kumanya kuvuabu bateka meji abu. Bavuaku baateka “ku malu a mubidi” anyi? Lelu tuetu petu tudi ne bua kuela meji bua kumanya malu adi ne mushinga wa bungi kutudi. Mmalu kayi atutu tutamba kuakula? Mmalu kayi atutu basue kuenza bikole? Bamue badi mua kumona ne: badi batamba kuela meji bua kunua mishindu mishilashilangane ya mvinyo, bua kulengeja nzubu wabu, kusumba bilamba bipiabipia, kulamisha makuta anyi kudilongolola bua kuya mu dikisha. Kuenza malu aa ki nkubi to. Mmalu adi muntu mua kuenza mu nsombelu wende. Tshilejilu, nansha Yezu uvua mupeshe bantu mvinyo mu difesto dia dibaka, ne Paulo uvua mubele Timote bua kunua “mvinyo mukese” bua makanda ende a mubidi. (1 Timote 5:23; Yone 2:3-11) Kadi kabavua bangata mvinyo ne mushinga wa bungi mu nsombelu wabu to. Netuambe tshinyi buetu tuetu? Ntshinyi tshitutu banange bikole mu nsombelu wetu?

12, 13. Bua tshinyi tudi ne bua kuikala badimuke bua malu atudi tuelela meji?

¹² Paulo wakadimuija ne: “Kuteka meji ku malu a mubidi kudi kumvuija lufu.” (Lomo 8:6) Ntshinyi tshivuaye musue kuamba? Tuetu ‘tulonda mubidi,’ tudi mua kunyanga malanda etu ne Yehowa mpindieu ne kupangila muoyo mu matuku atshilualua. Kadi ki mbimpe bua bualu bua nunku butufikile to. Muntu udi mua kushintuluka pashishe. Udiku muvuluke muena masandi wa mu Kolinto uvuabu bipate au anyi? Wakashintuluka ne kulekela kulonda majinga ende mabi, kutuadijaye kabidi kuenzela Yehowa mudimu mu mushindu muimpe.​—2 Kolinto 2:6-8.

¹³ Muntu au uvua munekeshe mu ‘dilonda mubidi’ nansha muvuaye ne bukole bua kushintuluka. Ke bualu kayi lelu, muena Kristo yeye mutuadije kulonda majinga ende mabi pamutu pa kulonda mikenji ya Yehowa, udi pende mua kushintuluka. Kuvuluka didimuija dia Paulo kudi mua kutusaka bua kushintuluka mu bualu kayi buonso.

14, 15. a) Paulo uvua mutulombe bua kuteka meji etu ku tshinyi? b) Ntshinyi tshidi “kuteka meji ku malu a nyuma” kakuyi kumvuija?

¹⁴ Paulo mumane kuakula bua njiwu ya “kuteka meji ku malu a mubidi,” wakumvuija ne: “kuteka meji ku malu a nyuma kudi kumvuija muoyo ne ditalala.” Edi ndifutu dimpe ditudi mua kupeta!

¹⁵ Kadi “kuteka meji ku malu a nyuma” kakuena kumvuija ne: muntu kena umona malu mudiwu to. Kakuena kabidi kumvuija ne: muntu udi wela meji ne wakula anu bua Yehowa anyi bua Bible to. Tshilejilu, batendeledi ba Nzambi  ba mu bidimu lukama bia kumpala bavua anu bu bantu bonso. Bavua badia ne banua, basela ne basedibua, bakolesha bana ne benza midimu.​—Mâko 6:3; 1 Tesalonike 2:9.

16. Ntshinyi tshivua Paulo wangata ne mushinga wa bungi mu nsombelu wende?

¹⁶ Kadi Paulo ne bena Kristo bakuabu ba mu bidimu lukama bia kumpala kabavua balekela midimu eyi ilua ne mushinga wa bungi kudibu mu nsombelu wabu to. Tshilejilu, tudi bamanye ne: Paulo uvua ukumbaja majinga ende pavuaye wenza ntenta. Kadi kavua wangata mudimu wende ne mushinga wa bungi mu nsombelu wende to. Kuenzela Nzambi mudimu ke kuvua ne mushinga wa bungi kudiye. Paulo uvua utamba kuimanyina pa mudimu wa kuyisha ne kulongesha bantu. (Bala Bienzedi 18:2-4; 20:20, 21, 34, 35.) Bena Kristo ba mu Lomo balume ne bakaji bavua ne bua kuidikija Paulo, nansha tuetu petu.​—Lomo 15:15, 16.

17. Mmasanka kayi atudi tupeta tuetu ‘bateke meji ku malu a nyuma’?

¹⁷ Nsombelu wetu neikale mushindu kayi tuetu tudifila bua kuenzela Nzambi mudimu? Lomo 8:6 udi wamba ne: “Kuteka meji ku malu a nyuma kudi kumvuija muoyo ne ditalala.” Kuenza nunku kudi kukonga kulekela nyuma wa Yehowa ulombola meji etu ne kulonga mua kuela meji mudiye wela meji. Yehowa mmutulaye nsombelu muimpe ne wa disanka mpindieu ne muoyo wa kashidi mu matuku atshilualua.

18. Mmunyi mutudi mua kupeta ditalala patudi ‘tuteka meji ku malu a nyuma’?

¹⁸ Ntshinyi tshivua Paulo usua kuleja pakambaye ne: “kuteka meji ku malu a nyuma” kudi mua kutupetesha ditalala? Muntu yonso utu musue kupeta ditalala, nangananga ditalala dia mu lungenyi. Kadi anu bantu bakese menemene ke batu nadi. Ku diambuluisha dia Yehowa, tudi mua kupeta ditalala dilelela dia mu lungenyi. Tudi kabidi mua kuikala mu ditalala ne bena mu dîku dietu ne bena mu tshisumbu. Bu mutudi bapange bupuangane, imue misangu netupete bilumbu ne bena Kristo netu balume ne bakaji. Padi malu a nunku enzeka, tudi tutumikila mubelu wa Yezu wa ne: ‘Ulengejangane ne muanenu.’ (Matayi 5:24) Vuluka ne: muanenu wa balume anyi wa bakaji udi pende wenzela Yehowa, “Nzambi udi ufila ditalala” mudimu.​—Lomo 15:33; 16:20.

19. Nditalala kayi dia pa buadi ditudi mua kupeta?

¹⁹ Tuetu tuteka ‘meji etu ku malu a nyuma,’ netuikale kabidi mu ditalala ne Nzambi. Muprofete Yeshaya wakafunda ne: ‘Wewe [Yehowa] udi ulama muntu udi ne mutshima wende mujalame bua yeye ikale ne ditalala dia tshishiki, bualu bua yeye udi ukueyemena.’​—Yeshaya 26:3; bala Lomo 5:1.

20. Bua tshinyi udi ne dianyisha bua mibelu idi mu Lomo nshapita wa 8?

²⁰ Nansha tuetu ne ditekemena dia kupeta muoyo wa kashidi mu diulu anyi pa buloba, mêyi a meji adi mu Lomo nshapita wa 8 adi mua kutuambuluisha tuetu bonso. Tudi ne dianyisha bua mudi Bible utukankamija bua kuimanyina pa dienzela Yehowa mudimu pamutu pa kuimanyina pa majinga etu. Tudi bamanye ne: tuetu bateke ‘meji etu ku malu a nyuma,’ tudi mua kupeta difutu ditambe buimpe. Paulo wakafunda ne: “Dipa didi Nzambi ufila mmuoyo wa tshiendelele mu Kristo Yezu Mukalenge wetu.”​—Lomo 6:23.