Bible udi wamba ne: bena Midiyana bamane kuya ne Jozefe mu Ejipitu, tatuende Yakoba ne dîku diende bakumbuka mu Kanâna, kuyabu mu Ejipitu. Bakasombela mu Ejipitu muaba uvuabu babikila ne: Goshene, muaba uvua musulu wa Nile wabuluka bua kudiela mu Mbuu wa Mediterane. (Gen. 47:1, 6) Bena Isalele “bakatungunuka ne kuvulangana ne kulua ne bukole bua bungi.” Ke bena Ejipitu kupetabu buôwa ba dikema, kubavuijabu bapika ku bukole.​—Ekes. 1:7-14.

Bamue batontolodi ba malu a mu Bible badi baseka bua tshidi Bible wamba etshi, bamba ne: mmuanu. Kadi kudi malu adi ajadika menemene ne: bena Shema * bavua bapika mu Ejipitu wa kale.

Tshilejilu, bakebuludi ba bintu bia kale mbapete bishadile bia bintu bia miaba ivua bantu basombele kale ku nord kua Ejipitu. John Bimson, mumanyi munene wa malu a mu Bible, udi wamba ne: kudi tshijadiki tshidi tshileja ne: bena Shema bavua basombele miaba 20 anyi kupita apu ku nord kua Ejipitu aku. James Hoffmeier, mumanyi wa malu a mu Ejipitu, udi wamba pende ne: “Mu tshikondo tshia kumbukila ku 1800 too ne ku 1540 kumpala kua Yezu, Ejipitu uvua muaba uvua bantu ba ku Azi wa ku ouest bavua bakula tshiena Shema basue kuya.” Udi wamba kabidi ne: “Tshikondo etshi tshidi tshipetangana ne tshia bankambua ba bena Isalele; nunku tshipetangana ne tshikondo ne nsombelu bidibu bumvuije mu Genese pavua Abalahama, Izaka (pamuapa), ne Yakoba baya mu Ejipitu bua kukeba bia kudia, mâyi, ne mpata ya kudishila nyama.”

Kudi tshijadiki tshikuabu tshia ku sud kua Ejipitu. Muvungu kampanda wa nyandu (anyi papyrus) wa mu bidimu bu bia 2000 too ne ku 1600 kumpala Yezu udi ne mêna a bapika bavua benza midimu kua muntu kampanda ku sud kua Ejipitu. Mêna mapite pa 40 a mu mêna au nga bena Shema. Bapika anyi bena mudimu aba bavua balambi ba biakudia, baluki ba manda a bilamba, ne benji ba midimu mikole. Hoffmeier udi wamba ne: “Bu muvua bena Shema bapite pa 40 benza mudimu kua muntu umue mu Thébaïde [ku sud kua Ejipitu], bidi bimueneka ne: bungi bua bavua mu Ejipitu mujima, nangananga muaba uvua Nile mupanduluke, buvua bua bungi.”

Mukebuludi mukuabu diende David Rohl udi ufunda wamba ne: amue a ku mêna a bapika au “adi umvuika anu bu atudi tubala mu Bible.” Tshilejilu, bipese bia muvungu au bidi ne mêna adi mafuanangane ne mêna bu mudi Yisakâ, Ashê, ne Shifela. (Ekes. 1:3, 4, 15) Rohl udi ujikija wamba ne: “Etshi ntshijadiki tshilelela tshidi tshileja dîba divua bena Isalele bapika mu Ejipitu.”

Bimson udi wamba ne: “Kudi bijadiki bia malu a kale bidi bishindika malu a bupika bua mu Ejipitu ne dimuangalamu bidi Bible ulonda.”