Nuikale bakumbane ne batuishibue bikole

Bena lulamatu ba dikima badi batshimuna nansha muvua bena Nazi babakengeshe

“MUAN’ANYI, wikale ne meji, usankishe mutshima wanyi, bua mmanye mua kuitaba kudi muntu udi umpenda.” (Nsumuinu 27:11) Mêyi malenga aa adi aleja ne: bantu badi mua kusankisha mutshima wa Yehowa padibu ne lulamatu kudiye. (Sefanya 3:17) Kadi Satana muena mayobo mmudisuike bua kunyanga lulamatu lua bantu badi bakuatshila Yehowa mudimu.​—Yobo 1:10, 11.

Nangananga ku mbangilu kua lukama lua bidimu lua 20 pakamuipatabu mu diulu ne kumukupabu pabuipi ne buloba, Satana mmujikijile basadidi ba Yehowa tshiji. (Buakabuluibua 12:10, 12) Nansha nanku, bena Kristo balelela mbashale amu “bakumbane ne batuishibue bikole,” bashale balamate anu Nzambi. (Kolosai 4:12, NW) Tukonkononayi mu tshikoso tshilejilu tshimue tshimpe tshia dikema tshia lulamatu lua nunku, tshilejilu tshia Bantemu ba Yehowa ba mu ditunga dia Allemagne kumpala ne munkatshi mua Mvita Mibidi ya Buloba bujima.

Bua mudimu wa lukunukunu, lulamatu luabu ludi lutetshibua

Mu bidimu bia 1920 ne ku ntuadijilu kua 1930, ba Bibelforscher (muvuabu babikila Bantemu ba Yehowa mu Allemagne tshikondo atshi) bavua babanyina bantu mikanda ya bungi ya malu a Bible. Pankatshi pa 1919 ne 1933, bakabanyina dîku dionso dia mu Allemagne mikanda, tukanda tukese anyi bibejibeji bu muanda-mukulu ku dîku dionso.

Tshikondo atshi, ditunga dia Allemagne divua dimue dia ku matunga avua ne bayidi ba Kristo bela manyi ba bungi menemene. Ku bantu 83 941 bakadia diampa ne kunua mvinyo mu Didia dia Mukalenge pa buloba bujima mu 1933, bantu batue ku 30 pa lukama bavua basombele mu Allemagne. Kunyima kua matuku makese, bakakisa tshizubu Bantemu ba mu Allemagne aba bua lulamatu luabu. (Buakabuluibua 12:17; 14:12) Bakipata bamue ku midimu, bakuabu kubabuelelabu mu nzubu bua kubanyenga bintu, kuipata bana mu tulasa, kufikabi too ne ku mitutu, ku dibakuata ne dibela mu maloko. (Tshimfuanyi 1) Ke bua tshinyi mu bidimu bia kumpala kua Mvita Mibidi ya Buloba bujima, ku bantu bonso bavuabu bele mu maloko manene a bena Nazi, Bantemu ba Yehowa bavua 5 peshi 10 pa bantu lukama.

Tshivua bena Nazi bakengeshila Bantemu

Kadi bua tshinyi bena Nazi bakafiikila Bantemu ba Yehowa munda? Mulongeshi wa malu a kale Ian Kershaw udi wamba mu mukanda wende mukuabu ne: bena Nazi bakatua Bantemu mutu ne kubakengesha bualu bavua babenga “kutumikila malu onso avua mbulamatadi wa bena Nazi ulomba.”​—Hitler—​1889-1936: Hubris.

Munga mukanda mupatula kudi mulongeshi mukuabu wa malu a kale Robert Ericksen ne Susannah Heschel mulongeshi wa malu a bena Yuda, wakaleja ne: Bantemu “bakabenga kubuela mu bimvundu ne bua kuambula bingoma. . . . Bantemu kabavua babuela mu malu a tshididi to, mmumue ne: kabavua mua kuelela Hitler tukanda peshi kumukosela  mpala nansha.” Mukanda muine eu udi wamba kabidi ne: malu aa akajula tshiji tshia bena Nazi ne kuteka Bantemu mu njiwu bualu “bena Nazi kabavua mua kuanyisha malu a mushindu’eu nansha kakese.”​—Betrayal—​German Churches and the Holocaust.

Badi badiwula bena Nazi buloba bujima, kadi bena Nazi badi bavudija dikengeshangana

Mu dia 9 ngondo muibidi 1934, Joseph Rutherford (uvua ulombola mudimu wa Bantemu tshikondo atshi) wakatumina Hitler muntu bua kumupesha mukanda wa didiwula nawu malu a tshikisu avua bena Nazi benza. (Tshimfuanyi 2) Pa kumbusha mukanda wa Rutherford, mu dia 7 ngondo wa dikumi 1934, Bantemu ba Yehowa ba mu matunga 50 kusangisha ne dia Allemagne dine bakatumina Hitler mikanda mikuabu mitue ku 20 000, kumutumina kabidi ne telegrame.

Bena Nazi bumvua nanku kadi kuluabu kuvudija dikengesha Bantemu bikole bia dikema. Mu dituku dia 1 dia ngondo muinayi 1935, bakakandika midimu ya Bantemu mu ditunga dijima. Mu dia matuku 28 ngondo wa muanda-mukulu 1936, bampulushi bena Gestapo bakatuadija kutatshisha Bantemu bikole. Nansha nanku, mukanda mukuabu udi wamba ne: Bantemu “bakashala ne lulamatu ne kutungunukabu ne kuabanya tukanda.”​—Betrayal—​German Churches and the Holocaust.

Tshilejilu, mu dia matuku 12 ngondo wa dikumi ne muibidi 1936, Bantemu batue ku 3 500 bakabanya trakte binunu ne binunu ivua ne dipangadika divua ditangila mushindu uvuabu babakengesha, bena Gestapo kabayi babiumvua to. Tshibumba tshia Nsentedi tshiakamba bua kampanye aka ne: “Tshivua ditshimuna dinene ne bivua bienze bu batue muluishi musongolo, bena mudimu ba lulamatu abu bakapeta disanka kadiyi kuamba.”​—Lomo 9:17.

Dibakengesha kadiakabatekesha to!

Bena Nazi bakatungunuka ne kukeba Bantemu ba Yehowa. Mu 1939, bavua bele Bantemu binunu bisambombo mu buloko, bavua batume bakuabu binunu bivule mu maloko manene muvuabu bakengeshila ne benzeja bantu midimu mikole. (Tshimfuanyi 3) Biakapita munyi ku ndekelu kua Mvita Mibidi ya Buloba bujima? Bantemu batue ku 2 000 bavuabu bele mu buloko bakafua, ne munkatshi muabu muvua bantu bapite pa 250 bakashipabu ku bingoma. Balongeshi babidi aba: Ericksen ne Heschel bakafunda ne: nansha nanku, “Bantemu ba Yehowa bakashala anu ne lulamatu mu makenga abu.” Ke bualu kayi pakajika bukalenge bua Hitler, Bantemu bapite pa tshinunu tshijima bakapatuka mu maloko manene bu bantu bafuma ku ditshimuna mvita.​—Tshimfuanyi 4; Bienzedi 5:38, 39; Lomo 8:35-37.

Ntshinyi tshiakapesha bantu ba Yehowa bukole bua kutantamena makenga aa? Adolphe Arnold uvua mupatuke pende mu buloko bunene wakumvuija ne: “Nansha wewe ukadi muletele mushindu kayi, Yehowa mmukumone, mmumanye dikenga diudi umona, neakupeshe bukole buudi nabu dijinga bua kutshimuna malu onso au ne kushala ne lulamatu. Tshianza tshiende ki ntshitambe buipi to.”

Bulelela, mêyi a muprofete Sefanya adi akumbanyina bena Kristo ba lulamatu aba! Wakamba ne: “Yehowa Nzambi webe udi munkatshi muenu, muena bukitu bukole udi ukusungila. Yeye neasanke bua bualu buebe ne disanka dinene.” (Sefanya 3:17) Bantu bonso badi batendelela Nzambi mulelela lelu badienzejeku pabu bua kuidikija ditabuja dia Bantemu aba bakashala ne lulamatu pavuabu babakengesha kudi bena Nazi, ne buobu kusankisha mutshima wa Yehowa.​—Filipoi 1:12-14.

[Mêyi a dianyisha bua tshimfuanyi mu dibeji 8]

Państwowe Muzeum Oświȩcim-Brzezinka, ne dianyisha dia USHMM Photo Archives