Malu a mu nsombelu

Ndi mupete masanka mavule mu mudimu wa Yehowa

MALONDA KUDI RUSSELL KURZEN

Bakandela mu dia 22 ngondo wa tshitema 1907, bidimu muanda-mutekete kumpala kua tshikondo tshia pa buatshi tshiakabanga ne mvita ya kumpala ya buloba bujima. Dîku dietu divua dibanji mu mushindu wa pa buawu menemene. Ndi ngela meji ne: newitabe bualu ebu pawikala mua kumvua malu makese a mu nsombelu wetu.

KUBANGILA anu ku buana bua Kaku (mamuende wa Tatu), ukavua mutuadije kukeba bulelela budi butangila Nzambi. Kumpala kua kukumbajaye bidimu dikumi ne pa mutu, wakaya mu bitanda bia bungi bia mu tshimenga tshiabu tshia Spiez, mu ditunga dia Suisse. Mu 1887, bidimu ndambu kunyima kua bamane kumusela, dîku dia Kurzen divua padi munkatshi mua bantu bakamuangala bua kuya kusombela mu États-Unis.

Kunyima, dîku edi diakasombela mu Ohio, muvua Kaku mulue kupetela tshiuma tshivuaye wenda ukeba tuamba bivua bu mu tshidimu tshia 1900 nanku. Wakatshipeta mu mukanda wa Charles Taze Russell wa Le Temps est proche uvua mufunda mu tshiena-Allemagne. Kaku wakajingulula diakamue ne: mukanda uvuaye mubale au uvua ne butoke bua bulelela bua mu Bible. Nansha muvuaye kayi ubala Anglais bimpe, wakenzeja abonema wa tshibejibeji tshia Tshibumba tshia Nsentedi. Nunku uvua ulonga malu malelela a mu Bible musangu umue ne muakulu wa Anglais. Kaku mulume kavua yeye munange malu a mu nyuma mushindu uvua Kaku mukaji muanange to.

Ku bana 11 ba Kaku Kurzen, ba balume babidi John ne Adolph, bavua banyisha tshiuma tshia mu nyuma etshi tshivuaye mupete. John ke tatuanyi, ne wakatambula mu 1904 mu mpungilu wa Balongi ba Bible (lelu Bantemu ba Yehowa) wakenzabu mu St Louis (Missouri). Bu muvua Balongi ba Bible bavule kabayi ne makuta a bungi, bakateka mpungilu eu mu tshikondo tshimue ne tshisalu  ta Fware wa Buloba bujima wakenzekela mu tshimenga tshia St. Louis bua bamone mua kuenza luendu ku tuwulu tuvuabu bafuta makuta makese. Pashishe mu 1907, tatu muakunyi Adolph wakatambula mu mpungilu wa mu tshimenga tshia Niagara Falls (New York). Tatu ne tatu muakunyi eu bakayisha malu a mu Bible avuabu balonge ne lukunukunu, ne bonso babidi bakalua benji ba mudimu wa Nzambi ba ku dîba ne ku dîba (batudi tubikila lelu ne: bampanda-njila).

Nenku mu tshikondo tshingakalua kuledibua mu 1907, dîku dietu dikavua dibanji mu nyuma. (Nsumuinu 10:22) Ntshitshivua muana wa mu diboko mu 1908 pakaya nanyi tatuanyi John ne mamuanyi Ida mu mpungilu wa “Batangile ku ditshimuna” wakenzekela mu Put-in-Bay (Ohio). Joseph Rutherford (uvua musadidi muena ngendu dîba adi) ke uvua mulombodi wa mpungilu au. Mbingu mikese kumpala, uvua mu tshimenga tshia Dalton, mu Ohio, muakayaye ku nzubu kuetu ne kuenzelaye Balongi ba Bible miyiki.

Bushuwa, meme tshiena muvuluke malu aa to, kadi ndi muvuluke mpungilu wakenzeka mu 1911 mu Mountain Lake Park, (Maryland). Meme ne muakunyanyi wa bakaji Esther tuakapetangana ne Charles Taze Russell, uvua utangila midimu ya diyisha ya buloba bujima ya Balongi ba Bible.

Mu dia 28 Kabalashipu 1914, dituku divua lufu lua Mukalenge Ferdinand ne mukajende mu tshimenga tshia Sarajevo lukebeshe mvita pa buloba bujima, kadi meme ne dîku dietu dijima tuakabuela mu mpungilu mu ditalala mu tshimenga tshia Columbus (Ohio). Katshia mu bidimu bia ntuadijilu abi, ndi mupete diakalenga dia kubuela mu mpungilu ya bungi ya bantu ba Yehowa. Imue ivua anu ne bantu lukama tshianana anyi bapite apu. Mikuabu yakenzekela mu bipalu binene menemene bia matunga a bungi a pa buloba ivua yoyi ne misumba ne misumba ya bantu.

Nzubu wetu uvua muaba muimpe

Kubangila bu mu 1908 too ne mu 1918, bavua benzela bisangilu bia tshisumbu kampanda tshikese tshia balongi ba Bible mu nzubu wetu wa mu Dalton uvua pankatshi pa tshimenga tshia Pittsburgh mu Pennsylvanie ne tshia Cleveland mu Ohio. Nzubu wetu wakalua muaba uvuabu batamba kuakidila ba-ngamba malu bena ngendu ba bungi. Bavua basuika tubalu tuabu ne matempu avuatu tukoka kunyima kua nzubu wetu wa dilamina bintu ne balondela bantu bavuapu malu malenga ne makuabu malu a mu nyuma a mushinga mukole. Bakatukankamija bikole be tshikondo atshi!

 Tatu uvua mulongeshi, kadi mutshima wende uvua mutuma ku mudimu mutambe munene wa dilongesha: mudimu wa bena Kristo. Uvua wenza muende muonso bua kulongesha bena mu dîku diende malu a Yehowa, ne butuku bonso tuvua tusambila bonso pamue. Mu muvu wa Printemps wa tshidimu tshia 1919, Tatu wakasumbisha kabalu ketu ne ditempu diaku, yeye kusumba mashinyi a Ford a mu 1914 ku dolare 175 bua kupetaye mushindu wa kuyisha bantu ba bungi. Mu 1919 ne mu 1922 tuvua tubuela mu mashinyi aa dîku dietu dijima tuya batangile mu mpungilu ya tshikuma ya Balongi ba Bible ivua yenzeka mu Cedar Point (Ohio).

Dîku dietu dijima: Meme, Mamu; Tatu; Esther ne muakunyanyi wa balume John, tuvua tuenza mudimu wa kuyisha bantu. Ndi mvuluka bimpe musangu wa kumpala wakangela muntu lukonko pamvua nyisha. Mvua ne bidimu bitue ku muanda-mutekete tshikondo atshi. Muntu au wakankonka ne: “Muana, Armagedone ntshinyi?” Tatu wakangambuluisha kakese, meme kumupesha diandamuna dia mu Bible.

Ndi mbuela mu mudimu wa ku dîba ne ku dîba

Mu 1931 dîku dietu dijima diakabuela mu mpungilu wakenzeka mu Columbus (Ohio), mutuvua ne disanka dia kuangata dîna dipiadipia dia Bantemu ba Yehowa. Bua bungi bua disanka divua nadi muakunyanyi John, wakangata dipangadika dia yeye ne meme tuetu kubuela mu mudimu wa bumpanda-njila. * Tuakatuadija mudimu eu, nansha Mamu ne Tatu ne Esther bakaubanga pabu. Ntshiuma kayipu tshituvua natshi: dîku dijima dikale mu buobumue mu mudimu mulenga wa kuyisha lumu luimpe lua Bukalenge bua Nzambi! Tshitu muanji kupungila bua kuela Yehowa tuasakidila bua dibenesha edi to. Nansha mutuvua ne disanka dia bungi, masanka mavule makuabu avua matuindile.

Mu muibidi 1934, ngakabanga kusadila ku biro bidi bilombola mudimu wa Bantemu ba Yehowa pa buloba bujima (bidibu babikila ne: Betele) mu Brooklyn (New York). John wakaluaku pende kunyima kua mbingu mikese. Tuakasomba nende mu shambre umue too ne pakaselaye Jessie mu 1953.

Kunyima kua meme ne John bamane kuya ku Betele, baledi betu bakitaba bua kuya kuenza bumpanda-njila miaba kabukabu ya mu ditunga dietu ne Esther ne bayende George Read bavua baya nabu. Baledi betu bakatungunuka ne kuenza bumpanda-njila too ne pakafuabu mu 1963. Esther ne bayende bakalela bana balenga, ndi ne disanka dia kuikala ne ba-manseba ne bikulu balume ne bakaji bandi munange bikole.

Mudimu ne bana betu ba ku Betele

John wakafila dimanya diende mu mudimu wa ku Betele wakenzaye pamue ne bena ku Betele bakuabu bua kuenza bintu bu mudi bisanji bia fono bia bunene bukese. Bantemu ba Yehowa ba bungi bakayisha nabi ku nzubu ne ku nzubu. John wakatua pende bianza mu dienza mashinyi a kukanga nawu bibejibeji (bivuabu batumina bantu bavua benzeje abonema) ne kulamikapu mêna a bantu abu.

Ngakabanga mudimu wanyi wa ku Betele muaba uvuabu bakuatakajila mikanda. Bansonga bakuabu bavua benza pabu mudimu mu tshiapu tshia dipatuila mikanda atshi batshidi basadila ku Betele ne lulamatu too ne lelu. Munkatshi muabu muvua Carey Barber ne Robert Hatzfeld. Bakuabu bandi mvuluka ne disanka kadi bakadi bafue mbobu aba: Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, ne John Perry. Bakenza mudimu wabu ne lulamatu luonso, kabayi badiabakena anyi bakeba muanzu kampanda to. Tshia kumanya ntshia se: ba bungi ba ku bena Kristo bela manyi a nyuma ba lulamatu aba bakapeta majitu manene pavua bulongolodi buetu buenda budiunda. Bamue bakasadila mene mu Kasumbu Kaludiki ka Bantemu ba Yehowa.

Kuenza mudimu ne bana betu ba didifila aba kuakampesha dilongesha dinene. Mu midimu ya panu, batu bafuta bena mudimu makuta bua mudimu wabu. Edi ke difutu diabu. Kusadila ku Betele kudi kufila mabenesha a mu nyuma, ne anu balume ne bakaji badi bakole mu nyuma ke badi banyisha mabenesha aa.​—1 Kolinto 2:6-16.

Muanetu Nathan Knorr wakalua ku Betele mutshikale nsonga mu 1923, uvua mutangidi wa tshiapu tshia dipatuila mikanda mu bidimu  bia 1930. Uvua unyunguluka mu tshiapu etshi dituku dionso ne wela bonso bavua benzamu mudimu muoyo. Tuetu bonso batshivua bapiabapia ku Betele tuvua tuanyisha bikole dileja dinanga dia mushindu’eu. Mu 1936 tuakapeta biamu bipiabipia bia kupatula nabi mikanda bifumine mu ditunga dia Allemagne, ne bamue ba ku bana betu batshivua bansonga bakatata bikole bua kulamakaja biamu biawu. Nunku Muanetu Knorr wakavuala tshi-nsalopeta ne kuenzaye nabu mudimu ngondo mujima ne matuku too ne pakatuadija mashinyi au kuenza mudimu.

Bua mushindu uvua Muanetu Knorr wenza mudimu bikole, ba bungi ba munkatshi muetu kabavua mua kuwenza mushindu umue nende nansha. Kadi uvua kabidi mumanye mua kujikija lutetuku. Nansha kunyima kua yeye mumane kubanga kutangila midimu ya diyisha ya Bantemu ba Yehowa pa buloba bujima mu Tshiongo 1942, uvua misangu mikuabu unaya base-ball ne bana betu ba mu dîku dia Betele ne balongi ba mu kalasa ka Gilada ka ba-misionere mu tshilongelu tshivuabu tshidi pabuipi ne South Lansing, mu New York.

Mu ngondo muinayi wa 1950, dîku dia Betele diakabuela mu nzubu mupiamupia wa kusombela wa bisasa tshitema udi mu Columbia Heights, mu nimero wa 124 (New York). Nzubu mupiamupia wa tshidiilu uvua ukumbana bua tuetu buonso kusomba pamue bua kudia. Mu bidimu bitue ku bisatu biakibakabu nzubu wa kusombela eu, katuvua tuenza ntendelelu wa mu dinda to. Ndisankapu kayi dituvua nadi patuakabangulula ntendelelu eu! Muanetu Knorr wakangambila bua nsombela ku mêsa a mulombodi bua meme kuikala mmvuluija mulombodi mêna a bapiabapia bavua babuela mu dîku dietu. Ngakasomba mu nkuasa umue eu bidimu 50 mu ntendelelu wa mu dinda ne patuvua tunua tshiayi. Pashishe mu dia 4 Tshimungu 2000, bakakanga nzubu wa tshidiilu au, ne kuntumabu mu umue wa ku nzubu ya tshidiilu ivuabu balongolole ku nzubu uvuabu babikila kumpala ne: Towers Hotel.

Munkatshi mua tshikondo kampanda mu bidimu bia 1950, ngakenza mudimu mu tshiapu tshia dipatuila mikanda ne mashinyi a Linotype, ndongolola maleta atuvua tusangisha bua kuenza malata a dipatula nawu maleta pa mabeji. Tshivua mutambe kunanga mudimu au to, kadi bu muvua William Peterson, uvua utangila mashinyi au umvuangana nanyi bimpe, mvua ngenza mudimu au ne disanka. Pashishe mu 1960, bavua dijinga ne bena budisuile bua kulaba mukubu ku nzubu mupiamupia wa kusombela uvuabu bibake mu njila wa Columbia Heights nimero wa 107. Mvua ne disanka dia kuenza mudimu eu ne kabidi ne disanka dia kulongolola nzubu mupiamupia eu bua dîku dietu dia Betele divua dienda didiunda.

Matuku makese kunyima kua bamane kujikija dilaba mukubu ku nzubu wetu wa mu njila wa Columbia Heights nimero wa 107, ngakapapuka ne disanka pakampeshabu mudimu wa kuikala ngakidila benyi ku Betele. Bidimu 40 bindi muenze mudimu wa diakidila benyi eu bivua bilenga be. Pavua benyi balua kuendakana ku Betele anyi pavua bapiabapia balua mu dîku dia Betele, bivua bienza disanka bua kuela meji bua bipeta bia mudimu wetu wa tshinsangansanga utudi tuenza bua kutuma malu a Bukalenge kumpala.

Balongi ba Bible ba dilambu

Dîku dietu dia Betele didi ditanta mu nyuma bualu bonso badimu mbanange Bible. Dituku dia kumpala pangakalua ku Betele, ngakakonka Emma Hamilton (uvua wenza mudimu wa dibalulula mikanda ivuabu bakudimuna bua kulongolola bilema) bungi bua misangu ikavuaye mubale Bible. Wakangandamuna ne: “Misangu makumi asatu ne itanu, ne mpindieu tshitu mbala kabidi bungi bua misangu to.” Anton Koerber, mukuabu muena Kristo wa makanda a bungi wakasadila ku Betele bu tshikondo tshimue ne Ema, uvua ne tshibidilu tshia kuamba ne: “Ikala ne Bible ku tshibelu.”

Kunyima kua lufu lua Muanetu Russell mu 1916, Muanetu Joseph Rutherford wakabanga kuenza midimu ivua Muanetu Russell wenza ya kulombola. Muanetu Rutherford uvua ngamba-malu wa dipoko ne wa bukole, uvua mulumbuluidianganyi wakabingisha Bantemu ba Yehowa ku Kabadi Kakulu ka mu États-Unis. Kunyima kua lufu lua Muanetu Rutherford mu 1942, Muanetu Knorr wakapingana pa muaba wende ne kudienzeja bikole bua kulongolola bungamba-malu buende bua patoke. Bu muvua shambre wanyi pabuipi ne wende, misangu ya bungi mvua ngumvua muvuaye wambulula miyuki yende misangu ne misangu. Mu bule bua matuku, bua didienzeja ne tshisumi nunku, wakalua ngamba-malu wa patoke mulenga.

 Mu ngondo muibidi wa 1942, Muanetu Knorr wakambuluisha bua kubangisha kalasa bua kuambuluisha bana betu ba balume bonso bavua ku Betele bua kulengeja ndongeshilu ne ngakuilu wetu. Kalasa aku kavua kimanyine pa dikebulula malu mu Bible ne diakula kumpala kua bantu. Ku ntuadijilu, bavua bapesha yonso wa kutudi miyuki mîpi bua kuakula bua bantu ba mu Bible. Muyuki wanyi wa kumpala ungakenza uvua utangila Mose. Mu 1943 bakabangisha kalasa ka buena aka mu bisumbu bia Bantemu ba Yehowa, ne nkatungunuke too ne lelu’eu. Ku Betele batu batamba kukankamija bana betu bua kupeta dimanya dia mu Bible ne kumanya mua kulongesha bimpe.

Mu ngondo muibidi wa 1943 kalasa ka kumpala ka ba-misionere (Gilada) kakabanga. Patudi tuakula apa balongi ba mu ka 111 badi bafuma ku dijikija! Munkatshi mua bidimu bipite pa 58 bidi bantu balongamu, kalasa aka nkambuluishe bantu bapite pa 7 000 bakadi bapitshilemu bua kulua ba-misionere badi basadila mu buloba bujima. Bushuwa, pakabanga kalasa aka mu 1943, kuvua Bantemu bapite pa 100 000 mu buloba bujima. Mpindieu mbapite pa 6 000 000 badi bayisha lumu luimpe lua Bukalenge bua Nzambi.

Ndi nganyisha bumpianyi buanyi bua mu nyuma

Kumpala kua kubangishabu Gilada, bakatuma basatu ba kutudi (bena ku Betele) bua kukumbula bisumbu bionso bia mu États-Unis. Tuvua tuenza dituku dimue, matuku makese, anyi mene lumingu lujima tukolesha bisumbu ebi mu nyuma. Bavua batubikila ne: basadidi ba bana betu, bakashintulula tshibikidilu etshi kuluatshi basadidi ba bijengu anyi batangidi ba bijengu. Matuku makese kunyima kua Tshilongelu tshia Gilada tshimane kutuadija, bakangambila bua kupinganamu bua kulongesha amue malongesha. Ngakalongeshamu bidimu bilondangane mu kalasa kibidi too ne kitanu, ne ngakalongesha kabidi mu kalasa ka 14 pa muaba wa umue wa ku balongeshi ba pa tshibidilu. Dikonkonona ne balongi mianda minene itu mienzeke mu bulongolodi bua Yehowa bua mu tshikondo tshietu etshi diakansaka bua kuanyisha  bumpianyi buanyi bua mu nyuma bikole. Ya bungi ya ku mianda eyi mvua mbalondelayi bilondeshile bimvua mudimuene.

Diakalenga dikuabu dintu mupete munkatshi mua bidimu bia bungi ndia kubuela mu mpungilu ya bantu ba Yehowa bafumine mu matunga a bungi. Mu 1963 ngakenza ngendu miaba ya bungi pamue ne bana betu bakuabu bapite pa 500 batuvua tuenda tuenda nabu mu mpungilu ya “Lumu luimpe lua tshiendelele.” Mpungilu mikuabu ikena kupua muoyo ingakabuela ngeyi yakenzeka mu 1989 mu tshimenga tshia Warsaw (Pologne); mu 1990 mu tshimenga tshia Berlin (Allemagne); ne mu 1993 mu tshimenga tshia Moscou (Russie). Mu mpungilu yonso, mvua mpetangana ne bamue bana betu bananga ba balume ne ba bakaji bavua batantamene dibakengesha ne tshikisu mu bukokeshi bua bena Nazi anyi bua ba-koministe, anyi mene mu makokeshi onso abidi. Malu aa akakolesha ditabuja dianyi bikole be!

Bulelela, ndi mupete bubanji buvule bua mu nyuma mu mudimu wa Yehowa! Mabenesha a mu nyuma kaatu ne ndekelu nansha. Ne bubanji ebu mbushilangane ne bua ku mubidi bualu patudi tumanyisha bakuabu malu a mushinga aa, biuma bietu bia mu nyuma bidi bivula. Minga misangu ntu ngumvua bamue bamba mudibu bajinga ne: kabavua mua kuikala babakoleshe kudi baledi Bantemu ba Yehowa to. Badi bamba ne: bavua mua kuikala banyishe Bible bikole bu buobu banji kulabula nsombelu wa pambelu pa bulongolodi.

Bitu bintonda misangu yonso pantu ngumvua bansonga bamba malu a buena aa, bualu badi bambidilamu ne: mbitambe buimpe bua kubenga kuikala bakolesha ne dimanya dia mikenji ya Nzambi. Kadi anji elabi meji bua bibidilu bibi ne meji mabi bidi bantu ne bua kulekela padibu balua kulonga bulelela bua mu Bible. Ndi ne dianyisha dia bungi misangu yonso bua muvua baledi banyi bakoleshe bana babu basatu mu njila wa buakane. John wakashala musadidi wa Yehowa wa lulamatu too ne ku lufu luende mu ngondo muisambombo 1980, ne Esther utshidi amu Ntemu wa lulamatu too ne lelu’eu.

Ndi mvuluka ne disanka balunda bavule ba malu malenga bandi mupete, bana betu bena Kristo ba lulamatu balume ne bakaji. Nkadi muenze mpindieu bidimu bipite pa 67 ku Betele. Nansha mundi tshiyi musele, ndi ne bana ba mu nyuma ba bungi ba balume ne ba bakaji, ndi kabidi ne bikulu ba mu nyuma. Ne ndi ne disanka pandi ngela meji bua bana betu bonso bananga bapiabapia ba mu dîku dietu dia mu nyuma dia buloba bujima bantu tshiyi muanji kumonangana nabu; yonso wa kudibu udi ne mushinga wa bungi. Mmunyipu mudi mêyi aa malelela: ‘Disankisha didi difuma kudi Yehowa didi divuija bubanji’!​—Nsumuinu 10:22.

[Mêyi adi kuinshi]

[Tshimfuanyi mu dibeji 20]

Ku dia bakaji batangile ku dia balume: Tatu ne muanetu John pa tshibelu tshiende, Esther, meme ne Mamu

[Bimfuanyi mu dibeji 23]

Ndi ndongesha mu Kalasa ka Gilada mu 1945

Kuulu ku dia balume: Balongeshi ba mu Tshilongelu tshia Gilada: Eduardo Keller, Fred Franz, meme, ne Albert Schroeder

[Tshimfuanyi mu dibeji 24]

Ndi ngela meji bua masanka mavule andi mupete mu mudimu wa Yehowa