Vuija Yehowa tshieyemenu tshiebe

‘Wewe, Mukalenge Yehowa, udi ditekemena dianyi; udi tshieyemenu tshianyi ku buana buanyi too ne katataka.’​—MUSAMBU 71:5.

1. Ndutatu kayi luvua kumpala kua Davidi nsonga mulami wa mikoko?

 GOLEYATA uvua ne bule bua metre bu asatu. Kabiena bikemesha muvua basalayi bonso ba bena Isalele batshina bua kuluangana nende! Munkatshi mua mbingu ya bungi milondangane, dinda dionso ne dilolo dionso, muena Peleshete eu Goleyata mule mule wa kafiondo uvua ufunyina tshiluilu tshia bena Isalele bulobo, ubambila bua kutumabu tshilobo tshivua mua kuya kuluangana nende. Ndekelu wa bionso, bakitaba bua kutuma muntu bua aye kuluangana nende, kavua musalayi to, kadi uvua nsonga wa patupu. Davidi nsonga mulami wa mikoko wakamueneka anu bu kantu ka patupu ku mêsu kua muluishi wende eu. Bushuwa, uvua mua kuikala ne bujitu bushadile ku bia-mvita bia Goleyata! Nansha nanku, nsonga eu wakaluangana ne muntu eu mule wa kafiondo ne wakalua tshilejilu tshiende lumu tshia dikima.​—1 Samuele 17:1-51.

2, 3. (a) Ntshinyi tshiakambuluisha Davidi bua kuluangana ne Goleyata ne dieyemena dionso? (b) Mbidia kayi bibidi bituamona biatuambuluisha bua kuvuija Yehowa tshieyemenu tshietu?

² Ntshinyi tshiakapesha Davidi dikima dia nunku? Tangila imue miaku ivua Davidi mufunde mu bidimu biende bia ndekelu: ‘Wewe, Mukalenge Yehowa, udi ditekemena dianyi; udi tshieyemenu tshianyi ku buana buanyi too ne katataka.’ (Musambu 71:5) Bulelela, patshivuaye nsonga, Davidi uvua mueyemene Yehowa ne muoyo wende mujima. Wakimana kumpala kua Goleyata, umuambila ne: ‘Wewe udi ulua kundi ne muele wa mvita ne difuma ne difuma dia kabenda, kadi meme ndualua kuudi mu dîna dia Yehowa, Nzambi wa bena mvita ba bena Isalele uwakufunyina bulobo kumpala kuende.’ (1 Samuele 17:45) Pavua Goleyata yeye mueyemene makanda ende mavule ne bia-mvita biende, Davidi yeye uvua mueyemene Yehowa. Bu muvua Davidi muikale ne Mukalenge wa diulu ne buloba ku luseke luende, bua tshinyi  uvua mua kutshina muntu wa patupu nansha bamuamba muikale ne bukole anyi bia-mvita bia mushindu kayi?

³ Paudi ubala muyuki wa Davidi, kuenaku ujinga ne: dieyemena diebe kudi Yehowa dikale dikole menemene anyi? Pamu’apa, ba bungi ba munkatshi muetu badi ne dijinga edi. Nanku tumonayi bidia bibidi bitudi ne bua kuela bua tuetu kuvuija Yehowa tshieyemenu tshietu. Tshia kumpala, tudi ne bua kutshimuna ne kukandamena bualu butu bupangisha bantu pa tshibidilu bua kuikala ne dieyemena edi. Tshibidi, tudi ne bua kumanya tshidi kueyemena Yehowa kumvuija menemene.

Tutshimunayi bualu butu bupangisha bantu pa tshibidilu bua kueyemena Yehowa

4, 5. Bua tshinyi bitu bikolele bantu ba bungi bua kueyemena Nzambi?

⁴ Ntshinyi tshidi tshipangisha bantu bua kueyemena Nzambi? Misangu ya bungi, bamue kabatu bamanye tshidi malu mabi enzekela nansha. Ba bungi batu babalongeshe ne: Nzambi ke udi ukebesha makenga. Padiku kuenzeka njiwu kampanda ya lufu, balombodi ba bitendelelu batu pamu’apa bamba ne: Nzambi “mmuangate” bantu badi bafue bua kusombaye nabu mu diulu. Kabidi, balombodi ba bitendelelu ba bungi batu balongesha ne: katshia kuonso aku Nzambi ukavua mudianjile kulongolola malu adi ne bua kuenzeka pa buloba bu mudi njiwu ya lufu ne malu mabi. Bidi ne bua kuikala bikole bua kueyemena Nzambi udi kayi ne luse wa nunku. Satana, udi ufofomija lungenyi lua bantu badi kabayi bitabuja, mmusue kutungunuja “mayisha a bademon” onso a nunku.​—1 Timote 4:1; 2 Kolinto 4:4.

⁵ Satana mmusue bua bantu kabikadi beyemene Yehowa. Muluishi eu wa Nzambi ki mmusue bua tumanye bikebeshi bilelela bia makenga a bantu to. Ne bituikala tuetu bamanye malu adi Bible wamba bua tshidi makenga mikadileku, Satana neajinge bua tuetu kuapua muoyo. Ke bualu kayi mbimpe bua tuetu kuikala tukonkonona ku musangu ne ku musangu malu manene asatu adi aleja tshidi makenga mikadileku pa buloba. Tuetu bikale tuenza nanku, tudi mua kujadikila mitshima yetu ne: ki n’Yehowa udi utukebela ntatu idi itukuata to.​—Filipoi 1:9, 10.

6. Mmunyi mudi 1 Petelo 5:8 uleja bualu bumue budi bantu bapetela makenga?

⁶ Bualu bumue budi bantu bapetela makenga budi se: Satana mmusue kunyanga muoyo-mutoke wa bantu ba Yehowa ba lulamatu. Wakakeba bua kunyanga muoyo-mutoke wa Yobo. Satana wakapangila tshikondo atshi, kadi ki mmulekele to. Bu mudiye mukokeshi wa buloba ebu, udi ukeba ‘kudia’ basadidi ba Yehowa ba lulamatu. (1 Petelo 5:8) Mbuena kuamba ne: mmusue kudia yonso wa kutudi! Satana mmusue kutufikisha ku dilekela kuenzela Yehowa mudimu. Ke bualu kayi misangu ya bungi utu utukebela makenga. Nansha mudi makenga aa atutatshisha, tudi ne bua kuatantamena. Patudi tuatantamena, tudi tuambuluisha bua kujadika ne: Satana mmuena dishima ne pashishe tudi tusankisha Yehowa. (Yobo 2:4; Nsumuinu 27:11) Bu mudi Yehowa utukolesha bua tuetu kutantamena ditukengesha, dieyemena dietu kudiye didi dikola.​—Musambu 9:9, 10.

7. Galatia 6:7 udi utuambuluisha bua kujingulula bualu kayi budi bantu bapetela makenga?

⁷ Bualu buibidi budi bantu bapetela makenga budi mu dîyi edi: ‘Tshintu tshionso tshidi muntu ukuna, ntshiotshi tshiapuolaye.’ (Galatia 6:7) Misangu mikuabu bantu batu bakuna padibu basungula malu adi mabi ne bu tshipeta tshia malu adibu bakune badi bapuola ndambu wa makenga. Badi mua kupangadika bua kuendesha mashinyi bibi, bibafikisha ku njiwu. Ba bungi batu basungula bua kunua makanya, bibafikisha ku dipeta disama dia mioyo anyi dia kansere ka bisulusulu. Aba badi basungula bua kuikala ne nsombelu wa buendenda badi mua kunyanga malanda a mu dîku diabu, badi mua kubanga kudimona kabatshiyi ne mushinga, badi mua kupeta masama a mu bilamba ne mafu a panshi. Bantu badi mua kukeba kuela Nzambi pambidi tshilumbu tshia makenga aa, kadi buobu nkayabu ke badi badikebela ntatu bua mapangadika abu mabi.​—Nsumuinu 19:3.

8. Bilondeshile Muambi 9:11, bua tshinyi bantu badi bakenga?

⁸ Bualu buisatu budi bantu bapetela makenga budi mu Muambi 9:11: ‘Ngakatangila kabidi muinshi mua dîba ne: bena lubilu lukole kabena bapita bakuabu mu kulumbila lubilu misangu yonso, nansha bena bukitu kabena bapitapita bakuabu bukole mu mvita; bena meji kabatu bapeta biakudia bionso; bena lungenyi kabatu bapeta bubanji buonso; badi ne ngenzelu muimpe kabatu bapeta diakalengele dionso; kadi buonso buabu badi ne bikondo bidi malu [adi kaayi malongolola]  abatulukila.’ Imue misangu, bantu batu basanganyibua muaba mubi mu tshikondo tshibi. Nansha tuetu bikale ne ngikadilu mimpe anyi bilema bia mushindu kayi, makenga ne lufu bidi mua kufikila yonso wa kutudi dîba didiye kayi mutekemene. Tshilejilu, mu tshikondo tshia Yezu tshibumba kampanda tshia tushola tshiakupuka ne kushipa bantu 18. Yezu wakaleja ne: Nzambi kavua ubanyoka bua mpekatu yabu ya kale nansha. (Luka 13:4) Tòo, katuena mua kudiula Yehowa bua makenga aa to.

9. Ntshinyi tshidi bantu ba bungi kabayi bumvua pa bidi bitangila makenga?

⁹ Kumanya bimue bikebeshi bia makenga kudi ne mushinga. Kadi kudi bualu bukuabu mu muanda eu budi mua kukolela bantu ba bungi bua kubumvua. Bualu abu mbuobu ebu: Bua tshinyi Yehowa Nzambi mmulekele makenga?

Bua tshinyi Yehowa mmulekele makenga?

10, 11. (a) Bilondeshile Lomo 8:19-22, ntshinyi tshiafikila “bifukibua bionso”? (b) Mmunyi mutudi mua kujadika muntu uvua muteke bifukibua kunyima kua malu a patupu?

¹⁰ Mvese kampanda wa mu mukanda uvua mupostolo Paulo mufundile bena Lomo udi utokesha muanda eu wa mushinga. Paulo wakafunda ne: ‘Ditekemena dikole dia bifukibua didi dindila dimueneshibua dia bana ba Nzambi. Bualu bua bifukibua biakatekibua kunyima kua malu a patupu, ki mbualu bua kudisunguila kuabi, kadi bua Nzambi wakabiteka nunku mu ditekemena edi ne: bifukibua mene nebipikudibue kabidi ku bupika bua dibola diabi, nebibuejibue mu budishikaminyi bua butumbi bua bana ba Nzambi. Bualu bua tudi bamanye ne: bifukibua bionso bidi bitua mikemu popamue ne bidi bidinyenga popamue too ne katataka.’​—Lomo 8:19-22.

¹¹ Bua tuetu kumvua mvese eyi, tshia kumpala tudi ne bua kuanji kuandamuna imue nkonko minene. Tshilejilu, nnganyi udi muteke bifukibua kunyima kua malu a patupu? Bamue batu bambe Satana; bakuabu pabu Adama. Kadi nansha umue wa kudibu kavua mua kuteka bifukibua ku malu a patupu. Bua tshinyi? Bualu eu udi uteka bifukibua kunyima kua malu a patupu udi ubiteka nunku “mu ditekemena.” Bushuwa, udi ufila ditekemena dia ne: ndekelu wa bionso bena lulamatu ‘nebapikudibue ku bupika kua dibola diabi.’ Ni ng’Adama, ni n’Satana, kakuvua muntu uvua mua kufila ditekemena edi to. Anu Yehowa ke uvua mua kudifila. Bulelela, yeye ke uvua muteke bifukibua kunyima kua malu a patupu.

12. Ndibuejakaja kayi didi dimueneke pa bidi bitangila diumvuija dia “bifukibua bionso,” ne mmunyi mutudi mua kuandamuna lukonko elu?

¹² Kadi “bifukibua bionso” bidibu batele mu mvese eu mbifukibua kayi? Bamue badi bamba ne: “bifukibua bionso” bidi bifunkuna bukua-panu buonso bufuka, pamue ne nyama ne mitshi. Kadi nyama ne mitshi bidiku ne ditekemena dia kupeta “budishikaminyi bua butumbi bua bana ba Nzambi” anyi? Tòo. (2 Petelo 2:12) Nunku “bifukibua bionso” bidi bifunkuna anu bantu. Ebi ke bifukibua  bidi bikenga bua mpekatu ne lufu bua butomboji bua mu Edene, ne bidi bikeba ditekemena ne muoyo mujima.​—Lomo 5:12.

13. Ntshinyi tshivua buntomboji bua mu Edene buenzele bantu?

¹³ Ntshinyi menemene tshivua butomboji abu buenzele bantu? Paulo udi umvuija bipeta biabu mu miaku mikese ne: malu a patupu. * Bilondeshile mukanda mukuabu, miaku eyi idi yumvuija “dibenga kuikala ne mushinga dia tshintu tshidi katshiyi tshienza mudimu bu muvuabu batshifundile bua kuenza.” Bantu bavua bafuka bua kuikalabu ne muoyo kashidi, benza mudimu pamue mu buobumue mu dîku dipuangane bua kulama mparadizu uvua pa buloba. Pamutu pa nanku, badi ne muoyo wa matuku makese, mûle ne makenga ne malu adi abungamija misangu ya bungi. Anu muakamba Yobo, ‘muntu udi muledibue kudi mukaji udi ne matuku makese a muoyo wende ne udi mûle tente ne ntatu.’ (Yobo 14:1) Malu a patupu bulelela!

14, 15. (a) Ntshinyi tshidi tshijadika ne: Yehowa udi ne buakane patudi tutangila tshibawu tshidiye mufundile bukua-bantu? (b) Bua tshinyi Paulo wakamba ne: bifukibua bivua bitekibue kunyima kua malu a patupu ‘ki mbua kudisunguila kuabi’?

¹⁴ Mpindieu tuafiki ku lukonko lunene: Bua tshinyi “Mulumbuluishi wa buloba buonso” wakateka bantu mu nsombelu eu wa makenga ne malu adi abungamija? (Genese 18:25) Bualu buakenzaye ebu buvua buakane anyi? Vuluka tshivua baledi betu ba kumpala benze. Pakatombokelabu Nzambi, bakaditeka ku luseke lua Satana, eu wakelesha bukokeshi bua Yehowa mpata mikole. Malu akenzabu akaleja muvuabu bakuatue ku lungenyi lua se: bantu bavua mua kuikala ne nsombelu mutambe buimpe bu buobu kabayi ku bukokeshi bua Yehowa, bu buobu badienzela malu nkayabu ku bulombodi bua tshifukibua tshia mu nyuma tshitomboke. Pakakoselaye bantomboji aba tshibawu, Yehowa wakabapesha tshivuabu bakeba. Wakalekela bantu bua badilombola ku bukokeshi bua Satana. Mu nsombelu eyi, ndipangadika kayi divua mua kuikala diakane menemene kupita diteka bukua-bantu kunyima kua malu a patupu kadi mu ditekemena?

¹⁵ Bushuwa, edi kadivua ‘didisunguila’ dia bifukibua to. Tudi baledibue bapika ba mpekatu ne ba dibola katuyi ne dîyi dia kuamba mu bualu ebu to. Kadi bua luse luende, Yehowa wakanyishila Adama ne Eva bua bashale ne muoyo bidimu biabu bivua bishale ne balele bana. Nansha mutudi tuetu ndelanganyi yabu bikale batekibue kunyima kua malu a patupu a mpekatu ne lufu, tudi ne mushindu wa kuenza tshivua Adama ne Eva bapangile mua kuenza. Tudi mua kuteleja Yehowa ne kulonga ne: bukokeshi buende mbuakane ne mbupuangane, padi eku bukokeshi bua bantu budi buele Yehowa nyima butukebela anu makenga, malu adi abungamija ne a patupu. (Yelemiya 10:23; Buakabuluibua 4:11) Kabidi, bukokeshi bua Satana budi butamba kunyanga malu bikole. Malu akadi menzeke mu bantu adi ajadika bulelela ebu.​—Muambi 8:9.

16. (a) Bua tshinyi tudi mua kuikala bajadike ne: ki n’Yehowa udi utukebela makenga adi atukuata pa buloba lelu? (b) Nditekemena kayi didi Yehowa mupeshe bantu bena lulamatu ne dinanga dionso?

¹⁶ Bushuwa, Yehowa uvua muteke bukua-bantu kunyima kua malu a patupu ne katekela. Kadi abi bidiku biumvuija ne: Yehowa ke udi mukebeshe malu a patupu ne ntatu idi ikuata yonso wa kutudi lelu anyi? Elabi meji bua mulumbuluishi udi ufundila muntu kampanda udi muenze bualu bubi tshibawu tshiakane. Muena tshibawu eu udi mua kukenga bikole mu matuku onso adiye umana tshibawu tshiende, kadi udiku mua kudiwula mulumbuluishi ne: yeye ke udi mumukebele ntantu idiye nayi anyi? Nansha kakese! Kabidi, Yehowa katu muanji kukebesha malu mabi to. Yakobo 1:13 udi wamba ne: ‘Nzambi kêna mumanye mua kuteyibua ne malu mabi, ne yeye muine kêna uteya muntu.’ Tuvulukayi kabidi ne: Yehowa wakabafundila tshibawu etshi “mu ditekemena.” Mmulongolole ne dinanga dionso bua ndelanganyi ya lulamatu ya Adama ne Eva imone mushindu wajika malu a patupu ne isanke mu “budishikaminyi bua butumbi bua bana ba Nzambi.” Bua kashidi ne tshiendelele, bantu ba lulamatu kabakutshina kabidi ne: bifukibua bionso bidi mua kubuela kabidi mu nsombelu wa makenga ne malu a patupu. Mushindu muakane udi Yehowa ujikija tshilumbu etshi neujadike buakane bua bukokeshi buende mu bikondo bionso.​—Yeshaya 25:8.

17. Ntshinyi tshitudi ne bua kumvua patudi tukonkonona malu adi aleja tshidi bantu bapetela makenga pa buloba lelu?

 ¹⁷ Patudi tukonkonona malu adi aleja tshidi bantu bapetela makenga, tudiku tumona tshidi mua kutusaka bua kuela Yehowa tshilumbu tshia malu mabi pambidi anyi budi mua kutusaka bua kubenga kumueyemena anyi? Pamutu pa nanku, dilonga edi didi ditusaka bua kuitaba mêyi a Mose aa: ‘Yeye udi Dibue; mudimu wende wonso udi muakane, bualu bua njila yende yonso idi milulame: Nzambi wa kalolo udi kayi ne bubi, udi ne malu makane a bushuwa.’ (Dutelonome 32:4) Patudi tuelangana meji bua malu aa, tuikalayi tuambulula bua kumona mutudi mua kuandamuna nkonko ya nunku. Nanku padi ntatu itukuata, netukandamene bidi Satana wenza bua kumona mua kukuna mpata mu ngenyi yetu. Kadi netuambe tshinyi bua tshidia tshibidi tshitudi baleje ku ntuadijilu kua tshiena-bualu etshi? Kueyemena Yehowa kudi kumvuija tshinyi?

Tshidi kueyemena Yehowa kumvuija

18, 19. Mmêyi kayi adi Bible utukankamija nawu bua kueyemena Yehowa, kadi ngenyi kayi mikonyangale idi nayi bamue bantu bua muanda eu?

¹⁸ Dîyi dia Nzambi didi ditubela ne: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’ (Nsumuinu 3:5, 6) Aa mmêyi malenga adi akolesha ku muoyo. Kakuyi mpata, kakuena muntu nansha umue pa buloba ne mu diulu utudi mua kutamba kueyemena kupita Tatu wetu wa mu Diulu wa dinanga nansha. Kadi mbipepele bua kubala mêyi aa a mu Nsumuinu kupita bua kuatumikila.

¹⁹ Bantu ba bungi badi ne ngenyi mikonyangale pa bidi bitangila tshidi kueyemena Yehowa kumvuija. Bamue badi bangata dieyemena edi bu bualu bua mu lungenyi patupu, bu disanka kampanda didi ne bua kudijukila nkayadi mu mutshima. Bakuabu badi bela meji ne: kueyemena Nzambi kudi kumvuija kutekemena bua atukube ku ntatu yonso, ajikije makenga etu onso, ashintulule lutatu luonso lutudi nalu ku dituku ne ku dituku lulue tshitudi tuetu batekemene, ne bienzeke nanku anu mpindieu mpindieu! Kadi ngenyi ya mushindu’eu kayena milelela to. Kueyemena Nzambi kudi kumvuija malu a bungi kupita dikala patupu ne disanka kampanda, ne ki ndieyemena didi ne malu adi kaayi malelela nansha. Bua bantu bakulumpe, dieyemena didi diumvuija kuangata mapangadika ne meji onso ku budisuile.

20, 21. Ntshinyi tshidi kueyemena Yehowa kumvuija? Fila tshilejilu.

²⁰ Tangila kabidi tshidi Nsumuinu 3:5 wamba. Udi uleja mudiku dishilangana pankatshi pa kueyemena Yehowa ne kueyemena dijingulula dietu dia mianda, uleja ne: katuena mua kuenza bionso bibidi to. Abi bidiku biumvuija ne: ki mbatuanyishile bua kuenza mudimu ne bukole buetu bua kujingulula malu anyi? Tòo, bualu Yehowa, eu wakatupesha bukole ebu bua kujingulula malu, mmuindile bua tumuenzele nabu mudimu. (Lomo 12:1) Kadi ntshinyi tshitudi tueyemena patudi tuangata mapangadika? Bikala lungenyi luetu kaluyi lupetangana ne lua Yehowa, tudiku tuitaba meji ende bualu adi matambe etu kule ne kule anyi? (Yeshaya 55:8, 9) Kueyemena Yehowa kudi kumvuija kulekela meji ende alombola etu tuetu.

²¹ Tshilejilu: elabi meji bua muana mutekete udi musombe mu nkuasa panyima mu vuatire, baledi bende basombe kumpala. Tatuende ke udi wendesha. Padi ntatu imueneka mu luendu elu bu mudi lua dielakana pa bidi bitangila njila muimpe wa kulonda anyi lutatu lua kuulu kudi kubi peshi lua njila udi mubi, ntshinyi tshidi muana udi utumikila baledi ne ubeyemena wenza? Udiku uludika tatuende anu panyima padiye musombele apu, umuambila mushindu wa kuendesha mashinyi anyi? Udiku welesha mapangadika a baledi bende mpata anyi udiku ubenga padibu bamuvuluija bua kushala musombe mu nkuasa? Tòo, nansha mudi  baledi bende bikale bapange bupuangane, udi ubeyemena, mumanye ne: nebamanye tshia kuenza mu ntatu eyi. Yehowa udi Tatu mupuangane. Katuenaku mua kumueyemena ne muoyo mujima, nangananga patudi mu ntatu anyi?​—Yeshaya 30:21.

22, 23. (a) Bua tshinyi tudi ne bua kueyemena Yehowa patudi tupeta ntatu, ne mmunyi mutudi mua kumueyemena nunku? (b) Ntshinyi tshituamona mu tshiena-bualu tshidi tshilonda?

²² Kadi Nsumuinu 3:6 udi uleja ne: tudi ne bua ‘kumanya Yehowa bimpe mu bienzedi bietu bionso,’ ki ng’anu patudi ne ntatu to. Nunku mapangadika atudi tuangata dituku dionso adi ne bua kuleja ne: tudi tueyemena Yehowa. Padi ntatu itukuata, katuena ne bua kuenza bu bantu bashikile, kutshina anyi kubenga mibelu ya kudi Yehowa ya mushindu mutambe buimpe wa kujikija malu au nansha. Tudi ne bua kuangata ntatu bu mushindu wa kutua ku tshia bukokeshi bua Yehowa, wa kuambuluisha bua kuleja ne: Satana mmuena dishima, ne wa kupeta butumike ne ngikadilu mikuabu idi isankisha Yehowa.​—Ebelu 5:7, 8.

²³ Tudi mua kueyemena Yehowa nansha kuoku kuikale ntatu kayi kumpala kuetu. Tudi tumueyemena nunku mu masambila etu ne mu mushindu utudi tunyemena mu Dîyi dia Yehowa ne mu bulongolodi buende bua kupeta mibelu. Kadi mmunyi mutudi mua kuleja ne: tudi tueyemena Yehowa padi ntatu idiku lelu pa buloba itukuata? Tshiena-bualu tshietu tshidi tshilonda netshiandamune lukonko elu.

[Mêyi adi kuinshi]

Mmunyi muwandamuna?

• Mmunyi muakaleja Davidi ne: uvua muvuije Yehowa tshieyemenu tshiende?

• Mmalu kayi asatu adi akebesha makenga a bantu lelu, ne bua tshinyi mbimpe bua kuikala kuambulula ku musangu ne ku musangu?

• Ntshibawu kayi tshivua Yehowa mufundile bukua-bantu, ne bua tshinyi tshibawu tshivua tshiakane?

• Ntshinyi tshidi kueyemena Yehowa kumvuija?

[Nkonko ya dilonga]

[Bimfuanyi mu dibeji 8]

Davidi wakavuija Yehowa tshieyemenu tshiende

[Tshimfuanyi mu dibeji 10]

Yezu wakaleja ne: pavua tshibumba tshia tushola tshikuluke mu Yelushalema, ki n’Yehowa uvua mutshikuluishe to