Bualu bujalame butudi ne bua kuitabujila Nzambi

MUKANDA mukuabu wa bena Corée udi wamba ne: bantu ba bungi badi balekela kuya mu ekeleziya bualu kabena bapeta mandamuna mimpe a nkonko yabu to. (31 Reasons Why Young People Leave the Church) Tshilejilu, batu badiebeja ne: ‘Bua tshinyi bantu badi bitabuje Nzambi batu bakenga?’ ne ‘Bua tshinyi tudi ne bua kuitaba malu onso adi ekeleziya ilongesha padi mavule a ku malongesha aa mikale mabuelakane ne abengangana?’

Bu mudi bantu ba bungi batekesha ku muoyo kudi mandamuna adibu babapesha kudi balombodi ba ekeleziya, batu bafika ku diamba se: Bible kêna ufila diandamuna nansha dimue to. Padi mulombodi wa ekeleziya ufila diumvuija dishindamene anu pa ngenyi yende nkayende, misangu mivule bitu bifikisha bantu ku dibenga kumvua malu bimpe, nansha ku dibenga Nzambi ne Bible.

Ke tshiakenzekela Abel, uvuabu bakoleshile mu ekeleziya wa bena Luther mu ditunga dia Afrique du Sud. Udi uvuluka wamba ne: “Ekeleziya udi ulongesha ne: Nzambi udi ‘wangata’ muntu yonso udi ufua. Kadi tshivua mua kumvua bua tshinyi Nzambi wa dinanga uvua mua ‘kuangata’ baledi bua kushiya bana babu patupu. Mu musoko kampanda wa mu Afrike mmundi mukolele, katuvua tushipa nzolo wa tshikuka anu pavua bana bende bakola. Patuvua tumona ne: ngombe uvua ne difu, katuvua tumushipa anu pavuayi ulela ne pavua kana ka ngombe kalekela kuamua mabele. Tshivua mua kumvua bua tshinyi Nzambi wa dinanga kavua mua kuditatshisha pende bua bantu mushindu wa muomumue.”

Aram wa mu ditunga dia Canada uvua pende welakana bua malu a muomumue. Udi wamba ne: “Tatu wakafua pamvua ne bidimu 13. Kumpala  kua kumujikabu, mulombodi mukuabu wa ekeleziya mumanyike bikole wakumvuija ne: Nzambi uvua musue bua tatu afue bua kuikalaye pabuipi ne Nzambi mu diulu. Wakamba ne: ‘Nzambi udi wangata bantu bimpe bualu mmusue bantu bakane.’ Tshivua mumvue bua tshinyi Nzambi uvua mua kuikala wenza anu malu adi amusankisha anu yeye nkayende mushindu’eu to.”

Ndekelu wa bionso, Abel ne Aram bakapetangana ne Bantemu ba Yehowa, buobu e kulonga nabu Bible, ne kupetabu mandamuna a nkonko yabu. Bakapeta dinanga dia Nzambi ne ditabuja dikole kudiye. Ndekelu wa bionso bakadilambula kudi Yehowa ne buobu kulua basadidi bende bena lulamatu.

Dimanya dilelela didi diambuluisha bua kuitabuja Nzambi

Ntshinyi tshidi malu aa atulongesha? Adi atuleja ne: pa bidi bitangila ditabuja Nzambi, bidi bikengela dimanya dijalame dia mu Bible. Mupostolo Paulo wakambila bena Kristo ba mu tshimenga tshia kale tshia Filipoi ne: “Ndi nsambila bua dinanga dienu divulangane misangu yonso, dinupeteshe dimanya dilelela ne lumvu luonso.” (Filipoi 1:9, Mukanda wa Mvidi Mukulu [Katolike, MMM]) Muaba eu Paulo udi uleja diumvuangana didi pankatshi pa dinanga dia Nzambi ne dia bena Kristo netu ne dimanya dilelela dia Nzambi ne dijingulula dia tshidi disua diende.

Ebi mbia meji, bualu muanda wa kumpala udi ukengedibua bua kueyemena muntu ndimumanya; tuetu bamumanye bimpe menemene netutambe kabidi kumueyemena bikole. Bia muomumue, bidi bikengela kuikala ne dimanya dijalame bua kuitabuja Nzambi. Paulo wakamba ne: ‘Ditabuja didi dimanya dia malu atudi tutekemena ne didi dijadika dia malu atudi katuyi bamone.’ (Ebelu 11:1) Kuitabuja Nzambi kakuyi dimanya dijalame dia mu Bible kudi anu bu kazubu katu bana bibaka ne lusenga. Kantu nansha kakese kadi mua kukupula.

Kulonga Bible kudi mua kukuambuluisha bua kupeta mandamuna a nkonko bu elu luvua lutatshishe Abel ne Aram matuku a bungi: Bua tshinyi bantu badi bafua? Bible udi umvuija ne: ‘Bu muakalua bubi pa buloba bualu bua muntu umue, ne bu muakalua lufu bua bubi abu, nunku lufu luakafika kudi bantu bonso, bua bonso bakenza malu mabi.’ (Lomo 5:12) Bantu badi bakulakaja ne bafua bualu Adama wakenza mpekatu, kadi ki mbualu Nzambi udi ubangata bua kuikalabu nende mu diulu to. (Genese 2:16, 17; 3:6, 17-19) Bible udi kabidi uleja ditekemena dilelela didi Yehowa Nzambi upesha bantu. Ku butuangaji bua Muanende Yezu Kristo, udi upesha bantu bena mpekatu ditekemena dia kubishibua ku lufu.​—Yone 5:28, 29; Bienzedi 24:15.

Bua kutuambuluisha bua kumvua bulelela bua dibika dia bafue, miyuki ya mu Bible idi ne bilejilu bivule bia bantu bavua Yezu mubishe ku lufu. (Luka 7:11-17; 8:40-56; Yone 11:17-45) Paudi ubala miyuki eyi, tangila disanka divuabu nadi kudi balunda ne bena mu mêku a bantu bavuabu babishe. Tangila kabidi ne: biakabasaka bua kutumbisha Nzambi ne bua kuitabuja Yezu.

Dimanya dijalame dia Nzambi ne dia malu adiye mulongolole didi mua kusaka bantu ku dienza bualu bua muomumue lelu. Ba bungi bavua kumpala ne nkonko minene ivua ibabuelakana mu lungenyi, ivua ibatatshisha ne ibalenduisha mene, ivuabu kabayi mua kupetela mandamuna mimpe nansha. Kadi pakalongabu Bible, bakapeta mandamuna, ne bualu ebu buakashintulula nsombelu wabu bikole menemene.

Dinanga dia Nzambi ke bualu bunene budi butusaka bua kumusadila

Nansha mudi dimanya dijalame dikale ne mushinga wa bungi bua kufika ku ditabuja Nzambi, bidi bikengela tshintu tshikuabu tshidi mua kusaka muntu bua kumutumikila ne kumuenzela mudimu. Pakebejabu Yezu mukenji mutambe bunene wa kudi Nzambi, wakamba ne: “[Nanga] Mukalenge Nzambi webe ne mutshima webe wonso ne muoyo webe wonso ne lungenyi luebe luonso ne bukole buebe bonso.” (Mâko 12:30) Muntu yeye munange Nzambi mushindu udi Yezu muleje eu, neajinge ne muoyo wende mujima bua kumutumikila ne kumuenzela mudimu. Bidiku nanku buebe wewe anyi?

Rachel, udi muenze mudimu wa bu-misionere bidimu bia bungi mu Corée udi uleja bualu ebu budi bumusake bua kuikala ne ditabuja: “Ndi ngela meji bua kalolo kadi Nzambi uleja bifukibua biende, luse ludiye uleja bantu bende ne dijinga diende dia se: tupete diakalenge padiye utumanyisha tshidiye musue tuenze. Malu onso aa adi akolesha dinanga dindi nadi bua Nzambi. Dinanga  edi didi kabidi dinsaka bua meme kumuenzela mudimu.”

Martha, mukaji mukamba wa mu ditunga dia Allemagne, udi wenzela Yehowa mudimu kukadi bidimu 48. Udi wamba ne: “Bua tshinyi ndi nsadila Yehowa? Bualu ndi mumunange. Dilolo dionso ntu ngakula ne Yehowa mu disambila ne mmuambila dianyisha dikole dindi nadi bua mabenesha ende onso, nangananga bua mulambu wa tshia-bupikudi.”

Bushuwa, dinanga dia Nzambi didi ditusaka bua kumuenzela mudimu ne mutshima mujima. Kadi mmunyi mudi muntu ufika ku dipeta dinanga dia nunku? Bualu butambe bunene budi mua kutusaka bua kunanga Nzambi ndianyisha dikole bua dinanga didiye mutuleje. Tangila bualu budi bukolesha ku muoyo ebu budi Bible utuvuluija: ‘Muntu udi kayi ne dinanga kêna muanji kumanya Nzambi; bualu bua Nzambi udi dinanga. Mu muanda eu dinanga dia Nzambi diakamueneshibua bua bualu buetu, bualu bua Nzambi wakatuma Muana wende umuepele pa buloba bua tuetu tuikale ne muoyo bua bualu buende. Mu muanda eu mudi dinanga, ki mbua tuetu tuakunanga Nzambi, kadi bua yeye wakatunanga, wakatuma Muana wende bu mulambu wa kubuikila nawu mibi yetu.’​—1 Yone 4:8-10.

Udiku umona bunene bua dinanga edi anyi? Anji kuelabi meji ne: udi wamba kudina mu musulu wa nkuaka mukole ne muntu mukuabu udi witaba nansha bua kufua bua kukupandisha. Udiku mua kumupua muoyo anyi, kuakuikalaku ne dianyisha dia bungi menemene kudiye to? Kuakuitabaku bua kuenza tshionso tshiudi mua kuenza bua bualu buende anyi? Dinanga divua Nzambi muleje pakafilaye Muanende Yezu Kristo bu mulambu wa kupikula nawu bantu ndinene kadiyi ne tshia kudielekeja natshi! (Yone 3:16; Lomo 8:38, 39) Padi dinanga dia Nzambi dilenga mutshima webe, nedikusake bua kumunanga ne kumuenzela mudimu ne muoyo webe mujima.

Mabenesha a mpindieu ne a matuku atshilualua

Nansha mudi dinanga dietu kudi Nzambi dikale bualu bua kumpalampala budi butusaka bua kuenza disua diende, bidi bikolesha ku muoyo patudi tumanya ne: Nzambi udi ufuta bantu badi bamusadila. Mupostolo Paulo udi wamba ne: ‘Bikalaku kakuyi ditabuja, muntu kêna mua kumusankisha;  bualu bua muntu udi ulua kudi Nzambi budiye nabu mbua kuitabuja ne: yeye udiku, ne udi mufutshi wa badi bamukeba.’​—Ebelu 11:6.

Nzambi udi ubenesha bantu badi bamunange ne badi bamutumikila. Ba bungi badi ne makanda a mubidi mimpe bualu badi balonda mêyi a mu Bible. (Nsumuinu 23:20, 21; 2 Kolinto 7:1) Aba badi batumikila mêyi a mu Bible adi atangila diamba bulelela ne dienza mudimu ne tshisumi batu pa tshibidilu babeyemena kudi bamfumu babu ba mudimu ne kabatu batamba kusumpakana mu malu a mfranga. (Kolosai 3:23) Padi basadidi ba Nzambi beyemena Yehowa, badi bapeta ditalala dia mu mutshima nansha buobu mu ntatu. (Nsumuinu 28:25; Filipoi 4:6, 7) Badi nangananga batekemena ne dishindika dionso dibenesha dia muoyo wa tshiendelele mu Mparadizu walua pa buloba.​—Musambu 37:11, 29.

Aba badi bapeta mabenesha aa kudi Yehowa badi bumvua bishi? Jacqueline, muena Kristo mukuabu wa mu Canada, udi uleja dianyisha diende bua Nzambi wamba ne: “[Yehowa] utu misangu yonso upesha bantu bintu bilenga bia nunku, ne mmufile ditekemena dishindame dia muoyo wa tshiendelele.” Abel, muena mêyi atudi bamone ku ntuadijilu kua tshiena-bualu etshi, udi umvuija mudiye umvua ne: “Ditekemena dia kuikala ne muoyo wa kashidi pa buloba bukudimuna mparadizu divua bualu bupiabupia kundi, ne ndi muindile bualu ebu ne muoyo kulukulu. Kadi nansha bu Mparadizu kayiku, mvua anu mua kuikala ne disanka dia kuleja dinanga dianyi bua Nzambi mu dimuenzela mudimu.”

Wewe pebe udi mua kupeta ditabuja dilelela

Bible udi wamba ne: ‘Yehowa wa misumba udi ne kulumbulula kuakane, udi uteta mutshima ne meji bia muntu.’ (Yelemiya 11:20) Bulelela, Yehowa udi ukonkonona malu adi masokome munda menemene mua mutshima wetu. Muntu ne muntu udi ne bua kukonkonona bualu budi bumusaka yeye bua kuitabuja Nzambi. Malongesha ne ngenyi ya dishima pa bidi bitangila Nzambi bivua mua kuikala bimufikishe ku dienza malu mabi ku kale. Kadi dimanya dijalame dia mu Bible didi mua kufikisha muntu ku didia malanda mimpe ne Mufuki, Yehowa Nzambi.​—1 Timote 2:3, 4.

Bantemu ba Yehowa badi bambuluisha bantu bua kupeta dimanya dijalame dia Nzambi ku diambuluisha dia malonga adibu balombola ku nzubu ne bantu kabayi bafutshisha mfranga. (Matayo 28:20) Bantu ba bungi badi bitabe diambuluisha edi mbafike ku dinanga Nzambi ne mbapete ditabuja dikole kudiye. Ku diambuluisha dia dilonga dia Bible, mbapete ‘meji adi akuatshisha ne bukole bua kupangadija malu,’ bidi bibambuluisha bua ‘kuenda mu njila yabu kabayi ne ditshina’ mu matuku aa a njiwu. (Nsumuinu 3:21-23) Tshidi ne mushinga menemene ntshia se: badi mpindieu ne ditekemena “dia bushuwa ne dishindame” bua matuku atshilualua. (Ebelu 6:19, Muanda Mulenga Lelu) Wewe pebe udi mua kupeta ditabuja dilelela ne mabenesha aa.

[Kazubu mu dibeji 6]

Nkonko mikole ivua ilomba mandamuna

“Pantshivua ndonga kalasa ka manga ne muikale ndibidija mu lupitadi kampanda, ngakamona bantu bimpe batua mikemu bua masama anyi bipupu. Bikala Nzambi udiku, bua tshinyi malu aa adi enzeka? Tshitendelelu tshidi anu mushindu wa kupeta ditalala dia mu mutshima anyi?”​—Muena Mishonyi wa kale mu Corée.

“Mvua ndiebeja misangu mivule bikala tatuanyi uvua mukuatshiki wa maluvu ni uvua muye mu inferno anyi mu diulu. Mvua ntshina bafue ne inferno wa kadilu bikole. Tshivua ngumvua bua tshinyi Nzambi wa dinanga uvua mua kutuma muntu bua kukengaye kashidi mu inferno.”​—Muena Katolike wa kale mu Brésil.

“Ntshinyi tshienzekela buloba ne bantu mu matuku atshilualua? Mmunyi muikala bantu mua kufika ku dipeta muoyo wa kashidi? Mmunyi muapeta bantu ditalala dia bushuwa?”​—Muena Katolike wa kale mu Allemagne.

“Tshivua mmona dilongesha dia se: padi muntu ufua anyima wende udi uya kubuela mu tshintu tshikuabu dikale dia meji to. Nyama kayitu itendelela to, nunku bikalabu bakuele mu nyama bua wewe kufuta tshibawu tshia mpekatu yebe, mmunyi muudi mua kulongolola malu ne kumbuka mu nsombelu au?”​—Muena Hindu wa kale mu Afrique du Sud.

“Mvua mukolele mu dîku dia bena Confucius ne mvua ngenza panyi mikiya bua bankambua betu basombe talalaa. Pamvua mfila mulambu pa mesa ne ntua mpala panshi, mvua ndiebeja bikala bankambua bamane kufua bavua balua bua kudia biakudia ne bua kumona mutuvua tubatuila mpala panshi.”​—Muena Confucius wa kale mu Corée.

Bantu bonso aba bakapeta mandamuna a nkonko yabu pakalongabu Bible ne Bantemu ba Yehowa.