Lutatu lua dikolesha bana lelu

TUKADI butuku ne muena restoran kampanda udi udilongolola bua kukanga restoran ne kupingana kumbelu. Anu dîba adi bamamu babidi ne muana umue badi babuela balombesha biakudia. Bu mudi muena restoran eu mutshioke bikole, udi usua kubambila ne: ukadi mukange restoran, kadi udi ubatekela biakudia bidibu balombe ku mesa. Padi bamamu babidi aba benda badia ne bayukila, muana udi wenda unyemakana mu restoran, wimansha biskwi panshi, ubidiatakaja mu makasa. Pamutu pa kumukandika, mamuende udi utua mimuemua. Padibu baya, muena restoran ukadi mutshioke eu udi ne bua kukomba panshi.

Anu muudi mua kuikala mubimanye, bualu ebu bulelela bua mu nsombelu budi buleja ne: mu mêku a bungi, baledi kabatu bakolesha bana babu bimpe to. Malu adi akebesha nsombelu eu adi a bungi. Bamue baledi batu balekela bana babu benza malu mudibu basue, bela meji ne: bana badi ne bua kukola mu budikadidi. Anyi bu mudi baledi bikale ne malu a bungi a kuenza, badi mua kupangila dîba dia kutabalela bana babu ne kubakolesha bimpe. Bamue baledi batu bamona ne: tulasa tua muana ke tshintu tshia mushinga kupita bionso, ke bualu kayi batu bapesha muana budikadidi bupitshidile padiye upeta bipeta bimpe mu kalasa anyi bamuitabila bua kubuela mu tshilongelu kampanda tshibandile tshiende lumu.

Kadi bamue bantu badi bamba ne: bidi bikengela kushintulula anyi kuakaja mikenji ya baledi ne ya bantu bonso mu kabujima. Badi baleja ne: bana bakadi babuelakana mu buenzavi bua mishindu yonso, ne mu kalasa tshikisu tshidi tshienda tshivula anu kuvula dituku dionso edi. Ke bualu kayi direktere wa tshilongelu kampanda tshia tulasa tupuekele mu tshimenga tshia Séoul mu ditunga dia Corée wakaleja ne: dilongesha bana bikadilu bimpe didi ne bua kuikala pa muaba wa kumpala. Wakamba kabidi ne: “bidi bikengela kulongesha [muana] bikadilu bimpe kumpala kua kumulongesha dimanya.”

Baledi ba bungi badi basue bana babu babuele mu tshilongelu tshibandile ne bapete nsombelu muimpe badi bajika matshi ku mêyi a dibadimuija nawu. Biwikala udi muledi, udi musue muanebe ikale muntu wa mushindu kayi? Ikale muntu mukole udi ne bikadilu bilenga ne musue kuambula majitu anyi? Muntu udi uditatshisha bua bakuabu, udi wibidilangana ne nsombelu yonso ne udi ne lungenyi luimpe anyi? Wewe musue bua ikale muntu muimpe, suaku ubale tshiena-bualu tshidi tshilonda.