Bible udi mua kukuambuluisha bua kupeta disanka

NANSHA mudi Bible kayi mukanda wa malu a luondapu, udi wakula bua bipeta bidi meji a muntu (mimpe anyi mabi) mua kupatula ku mubidi ne mu lungenyi. Bible udi wamba ne: ‘Mutshima wa disanka udi buanga budi busangaja bimpe, kadi muoyo wa muntu udi ne majiya udi umisha mifuba.’ Tudi tubalamu kabidi ne: ‘Biwateketa palua dituku dia dikenga, bukole buebe budi bukepa.’ (Nsumuinu 17:22; 24:10) Diteketa mu maboko didi mua kutujikija dikanda dionso, tudiumvua katuyi ne bukole ne bikale mu njiwu, katuyi ne dijinga dia kushintulula nsombelu anyi dia kukeba diambuluisha.

Diteketa mu maboko didi kabidi mua kukepeshisha makanda a mu nyuma a muntu. Bantu badi badimona kabayi ne mushinga batu misangu ya bungi bela meji ne: kabena mua kudia malanda mimpe ne Nzambi ne kupeta dibenesha diende. Simone utuvua batele mu tshiena-bualu tshishale kavua witaba ne: uvua “muntu uvua Nzambi mua kuanyisha to.” Kadi patudi tutangila mu Bible, Dîyi dia Nzambi, tudi tumona ne: Nzambi udi wanyisha aba badi baditatshisha bua kumusankisha.

Bushuwa, Nzambi utu uditatshisha bua bantu

Bible udi utuambila ne: ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’ Nzambi kêna upetula ‘mutshima wa majiya ne udi unyingalala,’ kadi udi ulaya bua ‘kusangaja nyuma wa udi mudipuekeshe ne bua kusangaja mutshima wa muntu udi unyingalala.’​—Musambu 34:18; 51:17; Yeshaya 57:15.

 Musangu mukuabu, Yezu Muana wa Nzambi wakajinga kuleja bayidi bende ne: Nzambi utu umona buimpe budi munda mua basadidi Bende. Wakaleja mu mufuanu kampanda ne: Nzambi udi umona padi mushamusha ukuluka panshi, bualu butu ne mushinga anu mukese ku mêsu kua bantu ba bungi. Wakaleja kabidi ne: Nzambi mmumanye mudi bantu bonso ne bungi mene bua nsuki ya ku mitu yabu. Ke Yezu kujikija mufuanu wende wamba ne: “Nunku kanutshinyi, mushinga wenu udi mutambe wa mishamisha ya bungi.” (Matayo 10:29-31) * Yezu wakaleja ne: nansha bantu mua kudiumvua mushindu kayi, aba badi ne ditabuja badi bushuwa ne mushinga ku mêsu kua Nzambi. Bulelela, mupostolo Petelo udi utuvuluija ne: ‘Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’​—Bienzedi 10:34, 35.

Ikala ne nkatshinkatshi

Dîyi dia Nzambi didi ditulomba bua kuikala ne nkatshinkatshi mu mushindu utudi tudiangata. Ku diambuluisha dia nyuma wa Nzambi, mupostolo Paulo wakafunda ne: ‘Bua ndi ngambila muntu yonso udi munkatshi muenu, ku ngasa wakumpabu ne: Katambi kudielangana meji mapite adiye ne bua kuela, kadi bua kuela meji ne meji adi malulame, bu mudi Nzambi muidikijile muntu yonso tshidikijilu tshia ditabuja.’​—Lomo 12:3.

Nunku, tuepuke didiela mulu ne diambu, kadi katuedi kalele bua kubenga kudiangata ne mushinga. Tshidibi, tukebe bua kuikala ne nkatshinkatshi mu mushindu utudi tudiangata, tumona makanda atudi nawu ne muaba udi mikalu yetu. Muntu mukaji mukuabu muena Kristo wakamba bua bualu ebu ne: “Tshiena muntu mubi; anyi tshiena mupite bakuabu to. Ndi ne ngikadilu mimpe ne mibi, ne ke mutu muntu yonso eu.”

Bushuwa, bua kufika ku dikala ne nkatshinkatshi wa mushindu eu ki mbipepele to. Bidi mua kulomba ne: tudienzeje bikole bua kumbusha meji mabi atudi tudielela ne avua matuadije kukadi bidimu bia bungi. Nansha nanku, Nzambi udi mua kutuambuluisha bua kushintulula bumuntu buetu ne mushindu utudi tumona malu mu nsombelu. Eyowa, ke tshidi Dîyi dia Nzambi ditulomba bua kuenza. Tudi tubala ne: ‘Numbushe bienu muntu au wa kale, bu muvua tshikadilu tshienu tshia diambedi, udi unyangukanyanguka bua nkuka idi imudinga. Nuvuijibue bapiabapia mu nyuma wa meji enu. Nudivuadike muntu mupiamupia wakafukibua mu tshifuanyikiji tshia Nzambi ne buakane ne tshijila bidi bifuma ku malu malelela.’​—Efeso 4:22-24.

Pa kudienzeja bua kushintulula ‘nyuma wa meji etu’ peshi kudi meji etu matamba kutangija, tudi mua kushintulula bumuntu buetu ne kulekela ebu bua malu onso mabi ne kuangata bua malu mimpe. Lena utuvua batele mu tshiena-bualu tshishale wakafika ku dijingulula ne: kumpala kua kumbushaye lungenyi lua se: kakuena muntu udi mua kumunanga anyi kumuambuluisha, kakuvua tshintu tshivua mua kushintulula muvuaye udiumvua to.  Mmibelu kayi mimpe ya mu Bible yakambuluisha Lena, Simone ne bakuabu bua kushintuluka?

Mêyi a mu Bible adi atuambuluisha bua kupeta disanka

‘Teka bujitu buebe pambidi pa Yehowa, ne yeye neakukoleshe.’ (Musambu 55:22) Tshia kumpala, disambila didi mua kutuambuluisha bua kupeta disanka dilelela. Simone udi wamba ne: “Dîba dionso dindi ndiumvua mutekete mu maboko, ntu nsambila Yehowa ne mmulomba diambuluisha. Tshitu muanji kufika mu nsombelu untu ndiumvua tshiyi mukoleshibue ne mulombodibue kudiye to.” Padi mufundi wa Misambu utulomba bua kuteka bujitu buetu pambidi pa Yehowa, udi bulelela utuvuluija ne: Yehowa udi ututabalela ne udi utumona bu bantu badi bakanyine diambuluisha ne dikuatshisha diende. Butuku bua Pasaka wa 33 bikondo bietu ebi, bayidi ba Yezu bakanyingalala pakabambilaye ne: diya diende dikavua pabuipi. Yezu wakabalomba bua kusambila Tatu, ne pashishe kusakidilaye ne: “Nulombe, nenuangate, bua disanka dienu dikumbane.”​—Yone 16:23, 24.

“Disanka dia kupa ndipite dia kupeta.” (Bienzedi 20:35, MMM) Bu muakalongesha Yezu, kupa mbualu bua mushinga bua kuikala ne disanka dilelela mu nsombelu. Ditumikila bulelela ebu bua mu Bible didi dituambuluisha bua kutangila majinga a bakuabu pamutu pa kutangila butekete butudi nabu. Patudi tuambuluisha bakuabu ne tumona mudibu baleja dianyisha, tudi tudiumvua bimpe bitambe. Lena mmutuishibue ne: kuambila bakuabu lumu luimpe lua mu Bible pa tshibidilu kudi kumuambuluisha mu mishindu ibidi. Udi wamba ne: “Tshia kumpala, ndi mpeta disanka diakamba Yezu. Tshibidi, bantu bakuabu batu banyisha bikole lumu luimpe ne bitu bingambuluisha bua kuikala ne disanka.” Patudi tudifila ne kalolo, netumone mudi mêyi aa adi mu Nsumuinu 11:25 malelela: ‘Wamiamina bakuabu mâyi neamiaminyibue pende mâyi kabidi.’

“Matuku onso a mukengi adi mabi, kadi muena mutshima wa disanka utu wikala ne bidia bia disanka matuku onso.” (Nsumuinu 15:15) Buonso buetu tudi mua kusungula mushindu utudi tudiangata ne tumona nsombelu wetu. Tudi mua kuikala bu muntu udi umona malu onso bibi ne udi udiumvua utata, anyi tudi mua kupangadija bua kuela meji bimpe, kumvua disanka mu mutshima ne kuikala ne disanka bienze bu tudi mu difesto. Simone udi wamba ne: “Ntu ngenza muanyi muonso bua kuikala ne lungenyi luimpe. Ntu ndifila mu didilongela Bible ne mu mudimu wa buambi, ne ntu nnanukila mu disambila. Ntu ndikolesha kabidi bua kuikala munkatshi mua bantu badi ne mmuenenu wa malu muimpe, ne nteta bua kuambuluisha bakuabu.” Meji bu nunku adi apetesha disanka dilelela, amu bu mudi Bible wamba ne: ‘Nuikale ne disanka mu Yehowa, nusanke bikole, nuenu bantu bakane; elayi mbila bua disanka dienu, buonso buenu badi bakane mu mitshima yenu.’​—Musambu 32:11.

‘Mulunda utu unanga mu bikondo bionso, mmuanetu utu uleja bulela mu tshikondo tshia dikenga.’ (Nsumuinu 17:17) Kukuatshila muntu utudi banange malu anyi muntu wa kueyemena udi mua kutubela kudi mua kutuambuluisha bua  kukandamena meji mabi atudi tuela munda ne kuashintulula kumpala kua kutupitawu bukole. Kuyukila ne bakuabu kudi mua kutuambuluisha bua kumona malu ne nkatshinkatshi mu mushindu muimpe. Simone udi witaba ne: “Kuambila bakuabu mundi ndiumvua kudi kuambuluisha bikole. Udi ne tshia kuambila muntu mukuabu muudi udiumvua. Misangu mivule dijinga ditu kuoku ditu anu dia kuambila muntu mukuabu muudi udiumvua.” Kuenza nunku nekukuambuluishe bua kumona bulelela bua mêyi aa: ‘Lutatu mu mutshima wa muntu ludi lumunemeshila bujitu, kadi dîyi dia luse didi dimusanguluja.’​—Nsumuinu 12:25.

Tshiudi mua kuenza

Tudi bakonkonone anu mêyi makese mimpe a mu Bible adi mua kutuambuluisha bua kutshimuna meji mabi atudi tuela munda ne kupeta disanka dilelela. Biwikala umue wa ku bantu badi badiumvua kabayi ne mushinga, tudi tukukankamija bua kukonkonona bimpe Bible Dîyi dia Nzambi. Longa mua kuikala ne nkatshinkatshi pa kumona malu mudiwu bua mushindu uudi udiangata ne umona malanda ebe ne Nzambi. Tudi batekemene ne muoyo mujima ne: mibelu ya mu Dîyi dia Nzambi neikuambuluishe bua kupeta disanka dilelela mu malu onso audi wenza.

[Mêyi adi kuinshi]

[Tshimfuanyi mu dibeji 7]

Wewe utumikila mêyi a mu Bible newikale ne disanka