Utu uluangana ne meji a munda muebe anyi?

LENA mmuluangane mutantshi mule ne lungenyi lua dibenga kudiangata ne mushinga. Nsongakaji eu wakamba ne: “Bu muvuabu bangangate ku bukole munkatshi mua bidimu bia bungi pantshivua muana, tshivua ndimona ne mushinga to. Mvua ndimona tshiyi ne mushinga nansha mukese.” Simone udi wamba pende bua malu avua mamuenzekele mu bunsongakaji buende ne: “Munda munda mvua ndiumvua anu tshianana, tshiyi ne mushinga to.” Dibungama bua malu a mushindu eu didi dimueneka dikale kudi bantu ba bungi lelu. Bena mu tshisumbu tshikuabu tshitu ne mudimu wa dipesha bansonga mibelu ku telefone badi bamba ne: pabuipi ne tshia bibidi tshia bantu batu bababikila ku nshinga badi baleja ne: “kabatu badimona ne mushinga to.”

Bilondeshile bamue bamanyi bapiluke, bantu badi badiumvua kabayi ne mushinga padi bantu bakuabu babafikisha ku didimona mushindu au. Lungenyi elu ludi mua kuluila muntu padibu bamupepeja dîba dionso,  bamudiula bikole anyi bamukengesha. Nansha lungenyi elu lufume ku tshinyi, malu adilu lulela atu atekesha muntu anyi mene amuenzela bibi. Malu a luondapu mmaleje matuku adi panshi aa ne: bantu badi kabayi badiangata ne mushinga kabatu badieyemena anyi beyemena bakuabu, bibafikisha ku dinyanga malanda abu mimpe ne malunda abu kabayi bamanye. Bakafunda bilondeshile malu a luondapu aa ne: “Mu mushindu kampanda ‘batu bakebesha’ malu atu abenza bobu bine buôwa bua bungi.”

Misangu mivule, bantu batu badimona kabayi ne mushinga bualu batu ne tshidi Bible ubikila ne: ‘matata a munda’ mua muntu. (Musambu 94:19) Badi bela meji ne: kabatu banji kuikalaku bimpe nansha kakese. Padi malu kaayi enda bimpe, badi badipisha diakamue. Nansha bantu bakuabu bobu babatumbisha bua malu mimpe adibu benze, batu badiumvua munda muabu bu badi bangata muaba udi kauyi mubakumbanyine, bualu buikala bantu ne bua kumanya nansha ku tototo. Bantu ba bungi batu ne meji a ne: kabena bakumbanyine kuikala ne disanka batu baditua mu dienza malu mabi adibu bamona kabayi ne bukole bua kulekela. Lena utudi batele au wakabanga kudia budiavi bualu kavua udiangata ne mushinga, ne udi wamba ne: “Ngakadimona tshiyi ne bualu nansha bumue bumvua mua kushintulula.”

Bantu badi baluangana ne ‘matata a munda’ muabu mbafundila bua kushala nanku too ne ku lufu anyi? Kudiku bualu butudi mua kuenza bua kuluisha meji a mushindu eu anyi? Mu Bible mudi mêyi ne mibelu mimpe bidi biambuluishe bantu bavule bua kutshimuna mvita eyi. Ngamue mêyi kayi au ne mmunyi mudiwu mabambuluishe? Tshiena-bualu tshidi tshilonda netshiumvuije malu aa.