Bikadilu bimpe bidi bipatula bipeta bilenga

MU TSHIDIILA tshikuabu tshikese pabuipi ne ditunga dia Japon, mamu kampanda ne bana bende basatu bakatuadija kulonga Bible ne Bantemu ba Yehowa. Pakamona bena mutumba nanku, bakajila mamu au, bualu bena mu tshidiila atshi bavua balamate ku malu a bankambua babu bikole. Mamu udi wamba ne: “Nansha muvuabu banjile, tshivua tshitamba kungenza bibi mpakatuadijabu kulengulula too ne bayanyi ne bana banyi.” Kadi wakambila bana bende ne: “Tuetu tutungunukayi ne kuela bena mutumba netu muoyo bua kusankisha Yehowa.”​—Matayo 5:47, 48.

Mamu eu uvua ulongesha bana ku nzubu bua kuikala ne bukalanga nansha pavuabu babalengulula. Bu muvua bana ne tshibidilu tshia kuya mu mashinyi ku mâyi avua apatuka ne luya mu buloba, bavua benda bela bantu muoyo mu njila. Pavuabu bapingana, bavua ne tshibidilu tshia kuamba ne disanka dionso ne: “Konnichiwa!” anyi “Muoyo au!” Buonso buabu bakatungunuka ne kuela bena mutumba bonso muoyo nansha muvuabu babandamuna ne tshibengu. Tshidibi, bantu bakamona bikadilu bimpe bia bana.

Ndekelu wa bionso bena mutumba umue ku umue bakatuadija kuandamuna ne: “Konnichiwa.” Panyima pa bidimu bibidi, pa kuamba bantu bonso mu tshidiila bakavua bandamuna muoyo uvua bena mu dîku aba babela. Bakapeta kabidi tshilele tshia kuelangana muoyo nkayabu ne bakadia bulunda ne dîku adi ne bakalengeja malanda ne bantu nabu. Mfumu wa tshimenga wakajinga kutumbisha bana aba bua muvuabu bambuluishe bantu bua kushintuluka. Kadi mamuabu kumulejaye ne: bavua benza anu tshidi bena Kristo ne bua kuenza. Dimue dituku, mu dinaya kampanda divua bantu mua kutembangana mushindu wa kuakula, umue wa ku bana wakalonda muvua mamuende mubalongeshe bua kuela bakuabu muoyo ne bukalanga nansha bobu babandamuna ne tshibengu. Muyuki wende wakapatuka wa kumpala ne bakaufunda mu tshikandakanda tshia mu tshimenga atshi. Lelu’eu, bena mu dîku edi badi ne disanka dia bungi bua kumona ne: kulonda mikenji ya bena Kristo kudi kupatula bipeta bimpe. Kuamba lumu luimpe kudi kupepela padi bantu bonso balunda.