Dîyi dia Yehowa didi ne muoyo

Malu manene a mu mukanda muisatu ne muinayi wa Misambu

MUFUNDI wa Misambu udi ulomba Nzambi wamba ne: “Luse luebe lujalame ludi mua kuambibua mu lukita, anyi? Lulamatu luebe lua bushuwa ludi mua kuambibua mu Kabutu, anyi?” (Musambu 88:11) Bushuwa kabiena mua kuenzeka to. Tuetu katuyi ne muoyo, katuena mua kutumbisha Yehowa. Kuikala ne muoyo ke bualu bunene butudi ne bua kutumbishila Yehowa, ne tudi tumutumbisha bualu tudi ne muoyo.

Mukanda muisatu ne muinayi wa Misambu, idi yangata Musambu wa 73 too ne wa 106, idi ne malu mapite bungi atudi ne bua kutumbishila Mufuki wetu ne kubenesha dîna diende. Kuelela meji pa misambu eyi kudi ne bua kutuambuluisha bua kuanyisha bikole ‘dîyi dia Nzambi’ ne kutusaka bua kuvudija ne kulengeja mêyi etu a kumutumbisha nawu. (Ebelu 4:12) Tuanjayi kukonkonona ne ntema mukanda muisatu wa Misambu.

‘BIDI BIMPE BUA MEME KUSEMENA PABUIPI NE NZAMBI’

(Musambu 73:1–89:52)

Misambu 11 ya kumpala ya mu mukanda muisatu ivua mifunda kudi Asafa anyi kudi bana bende. Musambu wa ntuadijilu udi umvuija tshivua tshiambuluishe Asafa bua diela meji mabi kadimupambuishi. Wakafika ku nkomenu mulenga pakambaye ne: ‘Bidi bimpe bua meme kusemena pabuipi ne Nzambi.’ (Musambu 73:28) Musambu wa 74 udi ne muadi bua dibutuka dia Yelushalema. Musambu wa 75, wa 76 ne wa 77 idi ileja mudi Yehowa Mulumbuluishi muakane, Mupandishi wa bapuekele ne Muteleji wa masambila. Musambu wa 78 udi ulondolola malu a kale a Isalele, kubangila ku tshikondo tshia Mose too ne ku tshia Davidi. Musambu wa 79 udi ne muadi wa dibutuka dia ntempelo. Mu udi ulonda badi balomba Nzambi bua apingaje bantu bende mu buloba buabu muvuabu kale. Musambu wa 81 udi ulomba bantu bua kutumikila Yehowa. Musambu wa 82 ne wa 83 mmasambila menza bua kulomba Nzambi bua abutule balumbuluishi babi ne baluishi bende.

Kamue kasala ka bana ba Kola kadi kamba ne: ‘Mutshima wanyi udi ujinga, ee, udi mupange ne dijinga dia biendedi bia mu tshitendelelu tshia Yehowa.’ (Musambu 84:2) Mu Musambu wa 85 badi balomba Nzambi bua abeneshe bena tshimuangi bavua bapingane mu buloba buabu. Musambu eu udi uleja bimpe ne: mabenesha a mu nyuma adi ne mushinga wa bungi menemene kupita mabenesha a ku mubidi. Mu Musambu wa 86, Davidi udi ulomba Nzambi bua amulame ne amuyishe. Musambu wa 87 nkasala kimbila Siona ne bantu badi baledibuemu, kalonda kudi disambila Yehowa didi mu Musambu wa 88. Musambu wa 89 uvua mufunda kudi Etana, pamuapa umue wa ku bantu banayi ba meji ba mu tshikondo tshia Solomo. Udi wakula bikole bua luse lujalame lua Yehowa anu muvualu luleja mu tshipungidi tshia Nzambi ne Davidi.​—1 Bakelenge 4:31.

 Mandamuna a nkonko ya mu Bible:

73:9​—Mmu ngumvuilu kayi mudi bantu babi ‘babandisha mêyi a mukana muabu too ne mulu, ne ndimi yabu yendakana pa buloba’? Bu mudi bantu babi kabayi bangata muntu ne mushinga ni mmu diulu ni mpa buloba, kabena belakana bua kupenda Nzambi ne mêyi a mukana muabu. Badi kabidi bashiminyina bantu malu ne ndimi yabu.

74:13, 14​—Ndîba kayi divua Yehowa ‘mutshibule mitu ya nyama minene ya mu mâyi manene ne mubele mitu ya Léviathan’? Badi babikila ‘Palô, mukalenge wa Ejipitu’ ne: ‘ngandu munene udi ulala munkatshi mua misulu yende.’ (Yehezekele 29:3) Léviathan udi mua kuikala uleja bilobo bia Palô. Dibela mitu yabu didi mua kuikala dileja mushindu uvua Yehowa mutshimune Palô ne tshiluilu tshiende pakapikulaye bena Isalele ku bupika mu Ejipitu.

75:4, 5, 10​—Muaku “lusengu” udi umvuija tshinyi? Nsengu ya nyama itu tshia mvita tshia bukole. Nunku, muaku “lusengu” udi tshimfuanyi tshia makanda anyi bukole. Yehowa udi ubandisha nsengu ya bantu bende, ubatumbishisha, padiye eku ‘ukosa nsengu ya bantu babi.’ Badi batudimuija bua ‘katuambudi lusengu luetu mulu’ mu ngumvuilu wa se: katuena ne bua kuikala ne lutambishi anyi ne diambu. Yehowa ke udi ubandisha muntu, nanku tudi ne bua kumona majitu adibu batupeshe mu tshisumbu bu adi afumina kudiye.​—Musambu 75:7.

76:10​—Mmunyi mudi “tshiji tshia bantu” mua kutumbisha Yehowa? Padi Nzambi ulekela bantu batuleja tshiji tshiabu bualu tudi basadidi bende, kudi mua kulua kumueneka bualu buimpe. Lutatu luonso lutudi mua kupeta ludi mua kutulongesha mu mushindu kampanda anyi kansanga. Yehowa udi ulekela dikenga dituvuila anu padidi ne tshipatshila tshia kutulongesha bualu kampanda. (1 Petelo 5:10) ‘Nzambi udi udiluatshisha ne tshiji tshia bantu tshidi tshishala.’ Kadi bituikala mua kukenga too ne ku lufu? Bualu ebu kabidi budi mua kutumbisha Yehowa Nzambi bualu bantu badi batumona tutantamena mateta ne lulamatu luonso badi bua kutuadija pabu kumutumbisha.

78:24, 25​—Bua tshinyi badi babikila mana ne: “blé wa mu diulu” ne “bidia bia bantu bakole”? “Bantu bakole” badibu bambe muaba eu mbanjelu ba mu diulu. Kadi biambilu bionso bibidi ebi kabiena biumvuija ne: mana avua tshiakudia tshia banjelu to. Avua “blé wa mu diulu” bualu avua mafumine mu diulu. (Musambu 105:40) Bu mudi banjelu anyi “bantu bakole” basombele mu diulu, tshiambilu tshia ne: “bidia bia bantu bakole” anyi banjelu tshidi mua kumvuija amu ne: Nzambi udi musombele mu diulu ke wakafila tshiakudia atshi. (Musambu 11:4) Yehowa uvua mua kuikala kabidi mutume banjelu bua kupesha bena Isalele mana.

82:1, 6​—Mbanganyi badibu babikile ne: “nzambi” ne “bana ba balume ba Mutambe Bunene wa mu diulu”? Biambilu bionso bibidi ebi bidi bileja bantu bavua balumbuluisha bilumbu mu Isalele. Mbiakanyine bualu bavua ne bua kuenza mudimu bu bakuidi ba Nzambi ne baleji-mpala bende.​—Yone 10:33-36.

83:2​—Padi ‘muntu wambula mutu’ bidi biumvuija tshinyi? Padi muntu wenza nunku bidi bileja ne: mmudiakaje bua kukokesha anyi bua kuenza bualu kampanda, misangu mivule bua kutua nkanana, kuluangana anyi kukengeshangana.

Malongesha adi atutangila:

73:2-5, 18-20, 25, 28. Katuena ne bua kuikala ne lubabu bua bubanji bua bantu babi ne kulonda njila yabu mibi nansha. Bantu babi badi pa muaba wa busenu.  Bushuwa ‘nebabele panshi mu dibutuka.’ Kabidi, bu mudi malu mabi onso kaayi mua kujika mu bukokeshi bua bantu budi kabuyi buakane, didienzeja dietu dionso bua kuajikija nedikale anu patupu. Anu bu Asafa, tudi bantu ba meji bituikala mua kuluangana ne malu mabi pa ‘kusemena pabuipi ne Nzambi’ ne pa kuikala nende mu malanda mimpe.

73:3, 6, 8, 27. Tuepuke diditambisha, diambu, disekangana ne dibila. Tudi ne bua kuepuka malu a nunku nansha mudiwu mua kumueneka bu adi ne dikuatshisha kutudi.

73:15-17. Tuetu bikale ne lungenyi lulubakana, tudi ne bua kudikanda bua kumanyisha bantu malu adi atulubakaja aa. ‘Kuakula nunku’ kudi anu mua kutekesha bakuabu mu maboko. Tudi ne bua kuelangana meji bimpe mu ditalala bua malu adi atutatshisha aa ne kuajikija pa kudisangisha ne bena kuitabuja netu.​—Nsumuinu 18:1.

73:21-24. Badi bafuanyikija kuikala ne ‘mutshima unyingalala bikole’ bua mudi bantu babi bamueneka bikale ne diakalenga ne kuenza malu bu nyama idi kayiyi yela meji. Ndienza malu mu tshiputuku didi dimanyine anu pa tshidi muntu umvua. Kadi, tudi ne bua kulekela meji a Yehowa atulombola, batekemene ne muoyo mujima ne: yeye ‘neatukuate ku tshianza tshietu tshia balume’ ne neatukuatshishe. Kabidi, Yehowa ‘neatubueje mu butumbi,’ mmumue ne: netuikale nende mu malanda mimpe.

77:6. Kuditatshisha ne muoyo mujima bua kumanya malu malelela a mu nyuma ne kuakeba bimpe kudi kulomba dîba dia kualonga ne kuelelapu meji. Mbimpe kuditekela dîba dia kuikalaku pa nkayetu amue matuku!

79:9. Yehowa udi uteleja masambila etu, nangananga padiwu atangila ditumbisha dia dîna diende.

81:13, 16. Kuteleja dîyi dia Yehowa ne kuendela mu njila yende kudi kupetesha mabenesha a bungi.​—Nsumuinu 10:22.

82:2, 5. ‘Bishimikidi bia buloba bidi bikankishibua’ bua dikosa dibi dia bilumbu. Nsangilu wa bantu kêna ushindama bua bienzedi bibi.

84:1-4, 10-12. Bafundi ba Misambu bavua bangata muaba wa ntendelelu wa Yehowa ne mushinga ne bavua basanka bua midimu ya pa buayi ivuabu babapeshe; badi bilejilu bimpe kutudi.

86:5. Tudi ne bua kuikala ne dianyisha bua mudi Yehowa “musue kubuikidila bantu mibi yabo”! Udi ukeba tshijadiki tshionso tshidi mua kuleja mudi muenji wa bubi munyingalale bua yeye kumufuila luse.

87:5, 6. Bantu bapeta muoyo mu Mparadizu pa buloba nebamanyeku mêna a bantu babishibua bua kuikala ne muoyo mu diulu anyi? Mvese eyi idi ileja ne: mbifuanyike kuikala nanku.

88:13, 14. Patudi katuyi tupeta lukasa diandamuna ku masambila etu pa bualu kampanda, bidi mua kuikala se: Yehowa udi usua bua tuleje ni tudi bamulamate bushuwa.

‘NUMUSAKIDILE, NUVUDIJILE DÎNA DIENDE DISANKA’

(Musambu 90:1–106:48)

Tangila malu kabukabu atudi ne bua kutumbishila Yehowa adibu bafunde mu mukanda muinayi wa Misambu. Mu Musambu wa 90, Mose udi uleja dishilangana didi pankatshi pa dikalaku dia ‘Mukalenge wa kashidi’ ne matuku makese a muoyo wa muntu. (1 Timote 1:17) Bilondeshile Musambu wa 91:2, Mose udi wamba bua Yehowa ne: udi ‘tshinyemenu tshiende ne musoko wende munyunguluke,’ mmumue ne: Yeye ke udi umukuba. Misambu mikese idi ilonda idi yakula bua ngikadilu milengele ya Nzambi, meji ende mapite, ne midimu yende ya kukema. Misambu isatu idi ituadija ne mêyi aa: “Yehowa udi ukokesha.” (Musambu 93:1; 97:1; 99:1) Mufundi wa Misambu udi wamba bua Yehowa ne: Nyeye mene wakatufuka, utulomba bua ‘kumusakidila ne kuvudijila dîna diende disanka.’​—Musambu 100:4.

Mukalenge udi utshina Yehowa udi ne bua kulongolola malu ende mushindu kayi? Musambu wa 101, uvua Mukalenge Davidi mufunde, udi ufila diandamuna. Musambu udi ulonda udi utuambila ne: Yehowa ‘neateleje matshi ende ku kulomba kua bakengi, kêna ulengulula mulombu wabu.’ (Musambu 102:17) Musambu wa 103 udi ukoka ntema yetu ku bulenga bua Yehowa ne luse luende. Mufundi wa Misambu udi wakula bua bintu bia bungi bidi Nzambi muenze pa buloba, ukema wamba ne: ‘Yehowa,  mona mudi bungi bua mishindu ya midimu yebe! Wewe wakenza buonso buayi ne lungenyi luebe.’ (Musambu 104:24) Misambu ibidi ya ndekelu ya mu mukanda muinayi idi itumbisha Yehowa bua malu ende a kukema.​—Musambu 105:2, 5; 106:7, 22.

Mandamuna a nkonko ya mu Bible:

91:1, 2​—“Tshisokomenu tshia Nzambi Mutambe Bunene wa mulu” ntshinyi, ne mmunyi mutudi mua ‘kushikamamu’? Eu mmuaba wa mu tshimfuanyi wa bukubi ne bupole bua mu nyuma, mmumue ne: nngikadilu anyi nsombelu wa muntu udi mukubibue ku bualu bubi budi mua kumukuata mu nyuma. Muaba eu mmusokome bualu ki mmumanyike kudi bantu badi kabayi beyemena Nzambi. Tudi tuangata Yehowa bu muaba wetu wa kusombela patudi tutangila kudiye bu tshinyemenu tshietu ne musoko wetu wa ngumbu, patudi tumutumbisha bu Mukalenge Mutambe Bunene wa diulu ne buloba, ne patudi tuyisha lumu luimpe lua Bukalenge. Tudi tudiumvua bakubibue mu nyuma bualu tudi bamanye ne: Yehowa udi pabuipi misangu yonso bua kutuambuluisha.​—Musambu 90:1.

92:12​—Mmu ngumvuilu kayi mudi bantu bakane ‘bakola bu dibue dia ngaji’? Dibue ndimanyike bua mutudi dipatula ngaji ya bungi. Muntu muakane udi bu dibue dia ngaji mu ngumvuilu wa se: udi muakane ku mêsu kua Yehowa ne udi utungunuka ne kukuama “mamuma mimpe,” anyi bienzedi bimpe.​—Matayo 7:17-20.

Malongesha adi atutangila:

90:7, 8, 13, 14. Malu mabi atudi tuenza adi anyanga misangu yonso malanda etu ne Nzambi mulelela. Ne katuena mua kusokoka malu mabi ku mêsu kuende to. Kadi tuetu banyingalale bushuwa ne balekele njila mubi au, Yehowa neatuanyishe tshiakabidi, ‘neuuje mitshima yetu tente ne luse luende lujalame.’

90:10, 12. Bu mudi muoyo wetu muîpi, tudi ne bua “kubala matuku etu onso.” Mushindu kayi? Mpa kudipetela “mutshima udi ne meji,” anyi pa kuikala ne meji bua katujimiji matuku etu adi mashale, kadi tuapitshishe mu mushindu udi usankisha Yehowa. Bua kuenza nunku bidi bilomba bua tuetu kudifundila bipatshila bia mu nyuma ne kuenza mudimu ne meji ne dîba dietu.​—Efeso 5:15, 16; Filipoi 1:10.

90:17. Mbiakanyine bua tuetu kulomba Yehowa bua ‘atujadikile mudimu wa bianza bietu tshishiki’ ne bua abeneshe mudimu wetu wa buambi.

92:14, 15. Padi bakulakaje badifila ne tshisumi mu dilonga Dîyi dia Nzambi ne badisangisha pa tshibidilu pamue ne bantu ba Yehowa, badi batungunuka ne kuikala ‘mitshi idi miûle ne idi mibishi’ anyi bakole mu nyuma, ne nunku nebikale diambuluisha dinene kudi tshisumbu.

94:19. Nansha “matata” adi munda muetu mua kufumina ku tshinyi, kubala ne kuelangana meji pa “masamba” atudi tusangana mu Bible nekutukoleshe ku muoyo.

95:7, 8. Tuetu tumvua mibelu ya mu Bible, tuteyaku ntema ne tuyilonda ne muoyo mujima, katuakukolesha mitshima yetu to.​—Ebelu 3:7, 8.

106:36, 37. Mvese eyi idi isuikakaja ditendelela dia mpingu ne milambu mipesha bademon. Bualu ebu budi buleja ne: muntu udi wenza mudimu ne mpingu udi mua kulua ku bukokeshi bua bademon. Bible udi utudimuija ne: “Nudilame kudi mpingu.”​—1 Yone 5:21.

‘Tumbishayi Yehowa!’

Misambu isatu ya ndekelu ya mu mukanda muinayi eu idi ijika ne dilomba edi: ‘Tumbishayi Yehowa!’ Musambu wa 106 udi utuadija kabidi ne mine mêyi aa. (Musambu 104:35; 105:45; 106:1, 48) Bushuwa, tudi tusangana misangu ya bungi tshiambilu tshia ‘Tumbishayi Yehowa!’ mu mukanda muinayi wa Misambu.

Bulelela tudi ne malu a bungi atudi ne bua kutumbishila Yehowa. Musambu wa 73 too ne wa 106 mmitupeshe malu a bungi atudi mua kuelelapu meji, miuuje mitshima yetu ne dianyisha bua Tatu wetu wa mu diulu. Patudi tuela meji bua bionso bikadiye mutuenzele ne biatuenzelaye mu matuku atshilualua, katuenaku tumvua bua ‘kutumbisha Yehowa’ ne bukole buetu buonso anyi?

[Tshimfuanyi mu dibeji 10]

Anu bu Asafa, tudi mua kuluisha malu mabi pa ‘kusemena pabuipi ne Nzambi’

[Tshimfuanyi mu dibeji 11]

Bakatshimuna Palô ku Mbuu Mukunze

[Tshimfuanyi mu dibeji 11]

Bua tshinyi badi babikila mana ne: “bidia bia bantu bakole”?

[Tshimfuanyi mu dibeji 13]

Ntshinyi tshidi tshituambuluisha bua kujikija “matata” munda muetu?